ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – បើយោងតាមទិន្នន័យរបស់ក្រុមប្រឹក្សាអភិវឌ្ឍនកម្ពុជា (CDC) បានបង្ហាញថា នៅក្នុងរយៈពេលប៉ុន្មានឆ្នាំចុងក្រោយនេះ លំហូរចូល នៃការវិនិយោគផ្ទាល់ពីក្រៅប្រទេសមកកម្ពុជាបានកើនឡើងយ៉ាងខ្លាំង ក្នុងនោះវិស័យឧស្សាហកម្ម និងសំណង់ គឺឈានមុខគេ ដែលវិស័យទាំងនេះមានតម្រូវការកម្លាំងពលកម្មជំនាញយ៉ាងច្រើន។
ដោយសារសន្តិភាព និងស្ថេរភាពនយោបាយ គេកត់សម្គាល់មើលឃើញថា មានក្រុមហ៊ុនធំៗ និងល្បីៗជាច្រើនបានចាប់អារម្មណ៍មកបណ្តាក់ទុករកស៊ីនៅក្នុងប្រទេសកម្ពុជា ហើយបើនិយាយពីក្រុមហ៊ុនផលិតរថយន្ត បើតាមទិន្នន័យរបស់ CDC បច្ចុប្បន្នមានក្រុមហ៊ុនចំនួន៨បានកំពុងប្រតិបត្តិការ និងស្នើសុំបង្កើតរោងចក្រតម្លើងរថយន្តរបស់ខ្លួននៅកម្ពុជា ដូចជា ៖ ក្រុមហ៊ុន Toyota Tsusho Manufacturing (Cambodia) Co., Ltd. បានស្នើបង្កើតរោងចក្រផ្គុំ និងតម្លើងរថយន្តតូយ៉ូតា នៅរាជធានីភ្នំពេញ, ក្រុមហ៊ុន GTV MOTOR CO., LTD. បង្កើតរោងចក្រតម្លើងរថយន្ត នៅខេត្តកំពង់ស្ពឺ, ក្រុមហ៊ុន K (CAMBODIA) CO., LTD បង្កើតរោងចក្រផ្គុំតម្លើងរថយន្ត អ៊ីស៊ូហ្ស៊ុ (ISUZU) នៅខេត្តកំពង់ស្ពឺ, ក្រុមហ៊ុន HGB MOTORS ASSEMBLY CO., LTD បង្កើតរោងចក្រផ្គុំ និងតម្លើងរថយន្ត នៅក្រុងប៉ោយប៉ែត, ក្រុមហ៊ុន R M A AUTOMOTIVE (CAMBODIA) CO., LTD បង្កើតរោងចក្រផ្គុំ និងតម្លើងរថយន្តហ្វត នៅខេត្តពោធិ៍សាត់, ក្រុមហ៊ុន EM AUTOMOBILE CO., LTD បង្កើតរោងចក្រផ្គុំតម្លើងគ្រឿងចក្រ រថយន្តសណ្តោង និងរថយន្តដឹកទំនិញធុនធ្ងន់គ្រប់ប្រភេទ ខេត្តកោះកុង, ក្រុមហ៊ុន Hyundai បង្កើតរោងចក្រដំឡើងរថយន្តរបស់ខ្លួន នៅតំបន់សេដ្ឋកិច្ចពិសេសនៃខេត្តកោះកុង និង រោងចក្រដំឡើងរថយន្ត Daehan នៅខេត្តស្វាយរៀង។
ត្រឹមតែក្រុមហ៊ុនតម្លើងរថយន្តទាំង៨ខាងលើនេះ គឺបានស្រូបយក និងមានតម្រូវការអ្នកជំនាញរាប់ពាន់នាក់ ដែលវាជាឱកាសរបស់យុវជនកម្ពុជាក្នុងការក្លាយជាអ្នកបច្ចេកទេសរបស់ក្រុមហ៊ុនផលិតរថយន្តធំៗទាំងនោះ។
តើកម្ពុជាមានកម្លាំងពលកម្មជំនាញគ្រប់គ្រាន់សម្រាប់ឧស្សាហកម្មទាំងនោះហើយ ឬនៅ?
តាមប្រសាសន៍របស់ ឯកឧត្តម ថង សាម៉ុន អគ្គនាយករង នៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ ថា ក្នុងមួយឆ្នាំៗកម្ពុជាបានបណ្តុះបណ្តាលអ្នកបច្ចេកទេសវិជ្ជាជីវៈប្រមាណជាជាង៥ម៉ឺននាក់ ហើយសិស្សដែលកំពុងសិក្សាគឺមានប្រមាណ៧ម៉ឺននាក់ ។ ទោះយ៉ាងណា ជាទស្សនៈរបស់ឯកឧត្តម ផ្ទាល់ យុវជនកម្ពុជាគួរតែងាកមករៀនជំនាញបច្ចេកទេស និងវិជ្ជាជីវៈឱ្យបានច្រើនជាងបច្ចុប្បន្ននេះ ដោយសារតែការរៀនជំនាញវិជ្ជាជីវៈប្រើប្រាស់រយៈពេលខ្លី ហើយចំណាយធនធានថវិកាតិច និងពេលរៀនចប់សម្បូរទីផ្សារការងារ។
ឯកឧត្តម ថង សាម៉ុន
“អញ្ចឹងគាត់មករៀនក្នុងរយៈពេលខ្លី ចំណាយថវិកាតិច ចេញទៅបានការងារធ្វើ បានទទួលប្រាក់ខែ ហើយគាត់អាចបន្តការសិក្សាពេលយប់ ឬថ្ងៃសៅរ៍-អាទិត្យ ដើម្បីបានបន្តដល់ថ្នាក់វិស្វករ ដល់ថ្នាក់កម្រិតខ្ពស់ៗទៀត អាហ្នឹងងាយស្រួលសម្រាប់គាត់ ជាជាងគាត់ចំណាយរយៈពេល៤ឆ្នាំ ឬក៏៥ឆ្នាំនៅឧត្តមសិក្សា ហើយចេញទៅទទួលបានប្រាក់ខែមិនខុសគ្នាប៉ុន្មានជាមួយអ្នករៀនវិជ្ជាជីវៈក្នុងរយៈពេលតែ១ឆ្នាំ ឬ២ឆ្នាំ”
ឯកឧត្តម ថង សាម៉ុន មានប្រសាសន៍ថា បើនិយាយពីគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ បច្ចុប្បន្នគឺមាននៅទូទាំងប្រទេស ហើយគ្រប់សាលាទាំងអស់មានឧបករណ៍សម្ភារៈបច្ចេកទេសទំនើបៗ ដើម្បីផ្តល់ការបណ្តុះបណ្តាល ផ្តល់ការអនុវត្តជាក់ស្តែងឱ្យស្របតាមទីផ្សារការងារ ក៏ដូចជាមានការផ្តល់កន្លែងស្នាក់នៅជូនសម្រាប់យុវជនដែលខ្វះខាត មកពីទីជនបទដាច់ស្រយាល ក៏ដូចជាមានផ្តល់ប្រាក់អាហារូបករណ៍ជូនដល់ពួកគាត់សម្រាប់ការសិក្សាជាដើម។
អគ្គនាយករង នៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងាររូបនេះសង្កត់ធ្ងន់ថា ប្រទេសកម្ពុជាបានកំណត់ចក្ខុវិស័យឆ្នាំ២០៣០ ដើម្បីប្រែក្លាយប្រទេសឱ្យទៅជាប្រទេសដែលមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសដែលមានចំណូលខ្ពស់ គឺទាមទារឱ្យប្រជាជនកម្ពុជា ពិសេសយុវជនមានជំនាញវិជ្ជាជីវៈមួយ ដើម្បីចូលទៅធ្វើការនៅក្នុងឧស្សាហកម្មដែលមានស្រាប់ និងឧស្សាហកម្មដែលនឹងមកថ្មីៗខាងមុខនេះ៕
