កុមារប្រមាណ ១៣០នាក់​នៅ​តំបន់ឱរ៉ាល់ កំពុង​តែទទួលបានការផ្គត់ផ្គង់សម្ភារៈសិក្សា អាហារមួយថ្ងៃ២ពេល និងការសិក្សាឥតគិតថ្លៃលើ មុខវិជ្ជា អង់គ្លេស កុំព្យូទ័រ កសិកម្ម និងបរិស្ថាន បន្ថែមបន្ទាប់ពីម៉ោងសិក្សារដ្ឋ ពីយុវជនមួយក្រុមដែលមានឈ្មោះថា យុវជនគ្រូ។

លោក សាន ដារ៉ាវីត ដែលជាស្ថាបនិកគម្រោងសាលាសហគមន៍ ភ្នំឱរ៉ាល់ មានទីតាំងក្នុងភូមិស្រែចិន ឃុំត្រពាំងជោរ ស្រុក​ឱរ៉ាល បានលើកឡើងថា មូលហេតុដែលលោកផ្ដួចផ្ដើមឱ្យមានសាលាសហគមន៍ភ្នំឱរ៉ាល់ ក៏ព្រោះលោកចង់ចូលរួមកាត់បន្ថយការបោះបង់ចោលការសិក្សារបស់កុមារនៅតំបន់ដាច់ស្រយាល ហើយជំរុញឱ្យពួកគេបន្តការសិក្សា ដើម្បីគេចចេញពីការទៅធ្វើការងារទាំងវ័យក្មេង និងមានឱកាសទទួលបានការសិក្សាសមរម្យ។

លោក ដារ៉ាវីត បន្តថា សម្រាប់លោក ការអប់រំ និងកសាងធនធានមនុស្សពិតជាសំខាន់ណាស់ ព្រោះនេះជាចំណែកមួយ ដែលជួយ​ឱ្យកុមារមានអនាគតល្អប្រសើរ និងមានលទ្ធភាពចូលរួមអភិវឌ្ឍសង្គមឱ្យខ្លាំងបាន។ យ៉ាងណាក៏ដោយ លោកមើលឃើញថា បច្ចុប្បន្ននៅតាមតំបន់ដាច់ស្រយាល កុមារប្រឈមនឹងហានិភ័យ នៃការបោះបង់ការសិក្សា ព្រោះមានការអូសទាញច្រើន ដោយសារកត្តាជីវភាព ដែលបណ្ដាលមកពីម្ដាយឪពុករបស់គេ មានបំណុល និងការចំណាកស្រុក។

បើតាមលោក ដារ៉ាវីត គម្រោងរបស់លោកនេះ​បានដំណើរការជិតមួយឆ្នាំហើយ ក្រោយ​ពីចាប់ផ្ដើមកាលពីដើមឆ្នាំ២០២៤ ដោយ​ទទួលបានការគាំទ្រ និងចូលរួមយ៉ាងច្រើនពីសំណាក់ប្រជាជនក្នុងតំបន់។ ចំពោះមូលហេតុ ដែលលោកសម្រេចជ្រើសរើសតំបន់ឱរ៉ាល់ជាទីតាំងអនុវត្តគម្រោង ព្រោះទីតាំងនេះជាតំបន់ជនបទ ដែលមិនឆ្ងាយពេកពីទីប្រជុំ ដោយមានចម្ងាយប្រមាណ ១៣០គីឡូម៉ែត្រពីភ្នំពេញ និង៩៤គីឡូម៉ែត្រ ពីទីរួមខេត្តកំពង់ស្ពឺ។

ត្បិតថា មានការគាំទ្រពីអាជ្ញាធរ និងប្រជាពលរដ្ឋក្នុងតំបន់ ប៉ុន្តែបច្ចុប្បន្ន លោក ដារ៉ាវីត ក៏កំពុងជួបប្រឈមនឹងឧបសគ្គមួយចំនួនក្នុងការដឹកនាំ និងធ្វើឱ្យគម្រោងនេះ មាននិរន្តរភាពដែរ ហើយបញ្ហាចម្បងទាំងនោះមានដូចជា ភាពលំបាកក្នុងការរស់នៅ កង្វះធនធានមនុស្សដែលចូលរួមគម្រោងជាមួយលោក និងបញ្ហាហិរញ្ញវត្ថុ។

យ៉ាងណាក៏ដោយ លោក ដារ៉ាវីត ជឿជាក់ថា គម្រោងនេះ នឹងសម្រេចទៅតាមផែនការ និងចក្ខុវិស័យ ដែលលោកបានកំណត់ ខណៈបច្ចុប្បន្ន ប្រភពចំណូលដែលលោកទទួលបានសម្រាប់ការផ្គត់ផ្គង់គម្រោង ទទួលបានពីប្រាក់ចំណូលផ្ទាល់ខ្លួនរបស់លោកដែលបំពេញការងារឱ្យអង្គការនានា និងសប្បុរសជនឧបត្តម្ភជាបន្តបន្ទាប់។

“ការងារក្នុងរយៈពេលបីឆ្នាំដំបូងនេះ អាចនឹងរៀងហត់បន្តិច ប៉ុន្តែសម្រាប់ពួកយើង ចំពោះគម្រោងនេះ យើងជឿជាក់ថា យើងអាចសម្រេចបាន ១០០ភាគរយ…”

លោកបណ្ឌិត កាំង សុភាព អ្នកជំនាញវិទ្យាសាស្រ្តអប់រំ សម្ដែងការគាំទ្រចំពោះ​គំនិតផ្តួចផ្តើមគម្រោងនេះឡើង ដោយលោកមើលឃើញថា ការចូលរួមនេះ ជាការរួមចំណែកដ៏សំខាន់ក្នុង​ការអភិវឌ្ឍសង្គម។

លោកជំទាវ ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា មានប្រសាសន៍ថា ការចូលរួមរបស់សហគមន៍ និងគ្រប់ៗគ្នាក្នុងការលើកកម្ពស់ការរៀន និងបង្រៀន ជាអ្វីដែលក្រសួងកំពុងជំរុញ និងខិតខំ។ ទន្ទឹមនឹងនេះ បច្ចុប្បន្ន ក្រសួងបានកំណត់អត្រាចុះឈ្មោះចូលរៀន និងអត្រាបោះបង់ចោលការសិក្សា ជាសូចនាករសំខាន់ក្នុងការវាស់វែងសមិទ្ធផលអប់រំ ពោលគឺជំរុញ ឱ្យប្អូនៗគ្រប់អាយុចូលរៀន បានចូលរៀនគ្រប់ៗគ្នា កាត់បន្ថយអត្រាបោះបង់ចោលការសិក្សា៕