បរទេស ៖ ជារៀងរាល់ឆ្នាំ Times Higher Education (THE) តែង​ស្នើឱ្យអ្នកសិក្សារាប់ពាន់នាក់នៅទូទាំងពិភពលោកចូលរួម​បោះឆ្នោត ដោយ​ដាក់ឈ្មោះសាកលវិទ្យាល័យល្អបំផុតនៅលើពិភពលោក ។ តាមរយៈការបោះឆ្នោតពីមនុស្សជាង ១០០ប្រទេស មានសាកលវិទ្យាល័យចំនួនប្រាំមួយស្ថិត​នៅ​តំបន់អឺរ៉ុប និង​អាមេរិក ត្រូវ​បាន​កត់សម្គាល់ថា មាន​ភាព​លេចធ្លោជាងគេ។

សាកលវិទ្យាល័យ​ ៦ ទាំងនោះមានដូចជា ៖  សាកលវិទ្យាល័យ Harvard, Massachusetts Institute of Technology, Stanford, Oxford, Cambridge និង the University of California Berkeley។ ក្នុងរយៈពេលជាងមួយទស្សវត្សរ៍នេះ សាកលវិទ្យាល័យ Harvard តែងតែឈរនៅលំដាប់កំពូលលេខមួយ។

លោក Mark Sudbury ប្រធាន World 100 Reputation Network បានហៅសាកលវិទ្យាល័យទាំងនោះថា “ជោគជ័យបង្កើតភាពជោគជ័យ” ។ ការសិក្សាដែលមកពីសាកលវិទ្យាល័យល្បីទាំងនេះអាចធ្វើឱ្យសិស្សទទួលបានជោគជ័យ ក្លាយជាបុគ្គលមួយដែលមានប្រយោជន៍ដល់សង្គមជាតិ និងពិភពលោក។ ​នៅពេល​ពិចារណា​លើ​គុណភាព​នៃ​ស្ថាប័នទាំងនេះ មិន​ថា​តាម​រយៈ​ការ​ចាត់​ថ្នាក់ ឬ​ការ​វាយ​តម្លៃ​គុណភាពនោះទេ ប៉ុន្តែជោគជ័យ​ពិត​ជា​បង្កើត​ភាព​ជោគជ័យ​មែន។

តើហេតុអ្វីទៅបានជាសាកលវិទ្យាល័យទាំងប្រាំមួយនេះមានភាពលេចធ្លោខ្លាំង និង ចាត់ទុកថាមានកេរ្តឹឈ្មោះល្បី?

លោក Nick Dirks ជាប្រធាននៃ New York Academy of Sciences ចង្អុលបង្ហាញថា ស្ថាប័នទាំងប្រាំមួយនេះ គឺមកជាគូរៀងៗខ្លួន ឬ​ជាការ​សហការណ៍ ដែលគូនីមួយៗតភ្ជាប់ដោយសារទីតាំងក្នុងតំបន់តែមួយ ក៏ដូចជាដោយការរួមផ្សំគ្នានូវលក្ខណៈជាច្រើនផ្សេងទៀត ដែលបង្កើតបានជាប្រព័ន្ធអេកូឡូស៊ីដែលមានថាមពលខ្លាំងជាងសាកលវិទ្យាល័យផ្សេងៗទៀត។

សាកលវិទ្យាល័យ Stanford ត្រូវបានផ្គូផ្គងជាមួយសាកលវិទ្យាល័យ Berkeley នៅតំបន់ San Francisco របស់អាមេរិក។ Stanford បានក្លាយជាសាកលវិទ្យាល័យដ៏អស្ចារ្យមួយបន្ទាប់ពីសង្គ្រាមលោកលើកទី ២ តាមរយៈការទទួលបានការគាំទ្រពីសហព័ន្ធសម្រាប់ការស្រាវជ្រាវ ប៉ុន្តែវាក៏ពឹងផ្អែកលើធនធានដែលមានស្រាប់របស់ UC Berkeley ផងដែរ។

ដូចគ្នានេះដែរ នៅចក្រភពអង់គ្លេស Oxford និង Cambridge ក៏ត្រូវបានផ្គូផ្គងគ្នា ដោយស្ថាប័នទាំងពីរពង្រឹងទៅវិញទៅមកដោយការផ្សារភ្ជាប់គ្នា។ ទន្ទឹមនឹងនេះ ភាពខ្លាំងបែបប្រពៃណីរបស់ Harvard បានជួយផ្តល់អំណាច ក៏ដូចជាបង្កើតទីផ្សារពិសេសសម្រាប់វិទ្យាស្ថានបច្ចេកវិទ្យា Massachusetts នៅក្នុងផ្នែកផ្តោតសំខាន់ដំបូងរបស់វាទៅលើវិទ្យាសាស្ត្រអនុវត្ត និងវិស្វកម្ម។

យ៉ាងណាក៏ដោយ បើមើលទៅ​តាមចំណាត់ថ្នាក់សាកលវិទ្យាល័យ ពេលនេះ​សាកលវិទ្យាល័យ​ល្បីៗទាំង៦នៅអឺរ៉ុបទាំងនោះ ចាប់ផ្តើម​មាន​គូ​ប្រជែងដ៏​ធំផងដែរ នោះ​គឺសាកលវិទ្យាល័យ​មកតំបន់អាស៊ី ដូចជា​ពីទីក្រុងប៉េកាំង ប្រទេសចិន ដែល​កំពុង​មានសក្តានុពលយ៉ាងខ្លាំង។

ក្នុងចំណាត់ថ្នាក់កំពូលទាំងដប់ នៃ Word Reputation Rankings សាកលវិទ្យាល័យ Tsinghua នៅទីក្រុងប៉េកាំងបានជាប់ចំណាត់ថ្នាក់ទី៩ ខណៈសាកលវិទ្យាល័យ​ប៉េកាំង បានទទួលចំណាត់ថ្នាក់ទី១០ ។ ជាមួយ​គ្នានេះ ប្រទេសសិង្ហបូរី ក៏​កំពុងរីកចម្រើនជាមួយប្រព័ន្ធអប់រំផងដែរ ដោយសាកលវិទ្យាល័យជាតិសិង្ហបុរី ទទួលបាន​ចំណាត់ថ្នាក់ទី១៩ ជា​សាកលវិទ្យាល័យ​ល្អនៅ​លើពិភពលោកផងដែរ៕