សាលារៀនចំនួន២១ ក្នុងនោះសាលាបឋមសិក្សាចំនួន១៦ និងអនុវិទ្យាល័យចំនួន៥ នៅស្រុករវៀង ខេត្តព្រះវិហារ ទទួលបានជោគជ័យលើការអនុវត្តន៍គម្រោង «សុខភាពនិងអនាម័យពេលមករដូវរបស់ក្មេងស្រី»។

ក្នុងពិធីបិទគម្រោងស្ដីពី “សុខភាពនិងអនាម័យពេលមករដូវរបស់ក្មេងស្រី” លោកជំទាវបណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា ទោះបីរយៈពេលនៃកិច្ចសហការរវាងអង្គការទឹកភ្លៀងកម្ពុជាជាមួយក្រសួងអប់រំ យុវជន និងកីឡា មានរយៈពេលខ្លីក៏ដោយ តែលទ្ធផលនៃគម្រោងបានបញ្ជាក់យ៉ាងច្បាស់ថា គ្រប់ភាគីពាក់ព័ន្ធបានធ្វើការរួមគ្នាដើម្បីដោះស្រាយប្រធានបទដែលមានសារៈសំខាន់បំផុត នោះគឺការពង្រឹងប្រសិទ្ធភាពសុខភាពបន្តពូជសម្រាប់កុមារនិងយុវនារីដែលនឹងក្លាយជាសមាជិកមាតាពិភពលោក។

លោកជំទាវបណ្ឌិត សឿ សុជាតា បន្ថែមថា រាជរដ្ឋាភិបាលកម្ពុជា បានប្ដេជ្ញាចិត្តដើម្បីចូលរួមលើកកម្ពស់បញ្ហាសុខភាពបន្តពូជសម្រាប់កុមារ និងយុវនារី ដែលជាមូលដ្ឋានគ្រឹះសម្រាប់ការអភិវឌ្ឍរួមរបស់ពួកគេ ដែលចាំបាច់ត្រូវចាប់ផ្តើមពីចំណេះដឹង បំណិន និងឥរិយាបថ ពាក់ព័ន្ធទៅនឹងសុខភាពបន្តពូជ ជាពិសេសគឺ ក្មេងស្រីដែលទើបចាប់ផ្តើម និងកំពុងមានរដូវ។

អនុរដ្ឋលេខាធិការក្រសួងអប់រំ បញ្ជាក់ថា កម្ពុជាត្រូវរៀបចំជាគោលនយោបាយជាតិស្តីពីសុខភាពសិក្សា ជាផែនការសកម្មភាពលម្អិត ជាសៀវភៅសិក្សាស្តីពីការអប់រំសុខភាពគ្រប់កម្រិតថ្នាក់សិក្សា និងបានបណ្តុះបណ្តាលគ្រូឧទ្ទេស គ្រូបង្រៀន និងជនបង្គោល​ទទួលបន្ទុក​សុខភាពសិក្សាជាបន្តបន្ទាប់ ដើម្បីឆ្លើយតបទៅនឹងទិសដៅអភិវឌ្ឍធនធានមនុស្សក្នុងយុគសម័យសតវត្សទី២១នេះ។

“ការយល់ច្រឡំវប្បធម៌ ការប្រកាន់ទម្លាប់បុរាណ ភាពអៀនព្រៀន និងធនធានមិនគ្រប់គ្រាន់ជាញឹកញាប់រារាំងសមត្ថភាពរបស់យុវជនវ័យក្មេងក្នុងការជ្រើសរើសព័ត៌មានពិត ឬព័ត៌មានមានប្រយោជន៍ ស្តីអំពីសុខភាពបន្តពូជរបស់ពួកគេ”

លោក ផេង គា នាយកប្រតិបត្តិអង្គការទឹកភ្លៀងកម្ពុជា មានប្រសាសន៍ថា អង្គការទឹកភ្លៀងកម្ពុជា ធ្វើការផ្តោតសំខាន់ទៅលើវិស័យទឹកស្អាត និងអនាម័យនៅក្នុងប្រទេសកម្ពុជា។ លោក ផេង គា បន្តថា បច្ចុប្បន្នអង្គការមានគោលដៅអនុវត្តការងារនៅខេត្តពោធិ៍សាត់ បាត់ដំបង កំពង់ធំ និងខេត្តព្រះវិហារ ខណៈនៅក្នុងខេត្តព្រះវិហារមានកម្មវិធីពីរសំខាន់ៗ គឺ ទី១. គម្រោងស្ថិតក្រោមការគ្រប់គ្រងធនធាទឹកចម្រុះអាងស្ទឹងសែនរបស់អាជ្ញាធរទន្លេសាបនៃក្រសួងធនធានទឹក និងឧតុនិយម និងទី២. ទាក់ទងទៅនឹងសុខភាព និងអនាម័យពេលមករដូវរបស់ក្មេងស្រី។

នាយកប្រតិបត្តិរូបនេះ បញ្ជាក់ថា កម្មវិធីនេះ បានចូលរួមចំណែកលើកកម្ពស់សុខភាពរបស់ប្រជាពលរដ្ឋ ជាពិសេស​ផ្តោត​លើកុមារ ឆ្លើយតបទៅហ្នឹងយុទ្ធសាស្រ្តជាតិ លើការលើកកម្ពស់សុខភាព តាមរយៈការអប់រំសុខភាព ការបង្ការជំងឺ ការផ្តល់សេវា សុខភាពចាំបាច់ ការលើកកម្ពស់អនាម័យ បរិស្ថាន និងការផ្គត់ផ្តង់ទឹកស្អាតដល់បុគ្គលិកអប់រំ និងអ្នកសិក្សាជាដំណាក់កាលៗ។ ក្រៅពីនេះអង្គការទឹកភ្លៀងកម្ពុជា បាននឹងកំពុងធ្វើការទាក់ទងនឹងវិស័យសុខភាព និងអនាម័យពេលមករដូវរបស់កុមារីនៅក្នុងខេត្តព្រះវិហារសម្រាប់គម្រោងជំហានទី២ចំនួន ២៧សាលារៀនទៀតនៅក្នុងស្រុករវៀង។

គួរជម្រាបជូនថា គម្រោងសាកល្បងស្តីពីសុខភាព និងអនាម័យពេលមករដូវរបស់ក្មេងស្រី នៅតាមសាលារៀន ចាប់ផ្តើមអនុវត្តសកម្មភាពនៅខែកញ្ញា ឆ្នាំ២០២៤ ដល់ខែមករា ឆ្នាំ២០២៥ គាំទ្រថវិកាដោយអង្គការ ខេអេចអេ (KHA) តាមរយៈ មូលនិធិ Phoinix e.V.។ គម្រោងនេះ មានគោលបំណងជំរុញការអប់រំផ្សព្វផ្សាយពីសុខភាពនិងអនាម័យពេលមករដូវរបស់ក្មេងស្រីនៅតាមសាលារៀន តាមរយៈការកែលម្អបរិក្ខារអនាម័យដែលមានស្រាប់សម្រាប់អនុវិទ្យាល័យចំនួន៥ និងផ្តល់កំណាត់អនាម័យស្ត្រីចំនួន ៧១១ឈុត ទៅដល់សិស្សស្រី ដើម្បីរួមចំណែកកាត់បន្ថយសំឡីប្លាស្ទិច៕