ក្នុងសិក្ខា​សាលា​អប់រំ​ដែលរៀបចំ​ឡើងដោយ​សហព័ន្ធសេវាអប់រំនៅកម្ពុជា កាលពីពេលថ្មីៗនេះ លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប លើក​ឡើងថា ការសិក្សា​ទ្រឹស្តី​ដែលផ្សារភ្ជាប់ទៅនឹងការអនុវត្តជាក់ស្តែង នឹងធ្វើ​ឱ្យសិស្សឈ្វេងយល់បានកាន់តែច្រើនពីបញ្ហា​នៅ​ក្នុងសហគមន៍ ហើយ​ផ្តល់​ឱកាស​ឱ្យ​ពួកគេ​រកដំណោះស្រាយ និង​ចូលរួមគំនិត សកម្មភាព ក្នុងការ​អភិវឌ្ឍសហគមន៍ ។

លោកឧកញ៉ា ប៉ិច បូឡែន មានប្រសាសន៍ថា ការបង្កើតកម្មវិធីឱ្យ​សិស្ស​ចុះជួបថា្នក់ដឹកនាំឃុំ សង្កាត់ ខណ្ឌ ស្រុក និងក្រុង គឺដើម្បីផ្តល់ឱកាសដល់សិស្សបានឈ្វេងយល់ពីការងារគ្រប់គ្រងរដ្ឋបាល និងបណ្តុះទឹកចិត្តពួកគេឱ្យស្រឡាញ់កិច្ចការសាធារណៈ ព្រមទាំងបណ្តុះមន្ត្រីរាជការថ្មីៗ ដើម្បីបម្រើប្រជាពលរដ្ឋមូលដា្ឋន ក្នុងគោលទិសដៅឱ្យ​សង្គមជាតិរបស់យើងមានការរីកចម្រើន។

លោកឧញ៉ាបន្ថែមថា ការងាររបស់យើងក្នុងវិស័យអប់រំមិនមែនត្រឹមតែបណ្តុះបណ្តាលធនធានមនុស្សសម្រាប់តែវិស័យឯកជនប៉ុណ្តោះទេ ប៉ុន្តែយើងចង់ឃើញធនធានរបស់យើងបម្រើការងារក្នុងវិស័យរដ្ឋផងដែរ។ ជាពិសេស យើងចង់ឃើញអ្នកដឹកនាំឆ្នើម ដែលជាឈាមជ័រថ្មីបម្រើការក្នុងវិស័យសាធារណៈ ។

“សកម្មភាពចុះសហគមន៍ និងទស្សនកិច្ចសិក្សានៅតំបន់រមណីយដ្ឋាននានាមិនមែនត្រឹមតែដើរទៅទស្សនាកម្សាន្តលេងប៉ុណ្ណោះទេ ប៉ុន្តែត្រូវជំរុញឱ្យ​សិស្សបានឈ្វេងយល់ពីសក្តានុពលនៅតំបន់ទាំងនោះ”

ឧកញ៉ា ប៉ិច បុឡែន

សម្រាប់មុខវិជ្ជាសហគ្រិនភាពវិញនេះ លោកឧកញ៉ាបានផ្តល់មតិណែនាំ ដោយថា លោកគ្រូអ្នកគ្រូមិនអាចបង្រៀន​តាមសៀវភៅបន្តទៀតនោះទេ ដោយ​ត្រូវមានម៉ោងពេលវេលាសម្រាប់សិស្សចុះអនុវត្តជាក់ស្តែងនៅតំបន់សេដ្ឋកិច្ចពិសេស និងសហគ្រាសពាណិជ្ជកម្មនានា ដើម្បីផ្សាភ្ជាប់ទ្រឹស្តីនឹងការអនុវត្តជាក់ស្តែង ក្នុងបំណងឱ្យ​សិស្សទទួលបានបទពិសោធន៍ និងឈ្វេងយល់ពីសក្តានុពល និងដំណើរការគ្រប់គ្រងឱ្យ​បានច្បាស់លាស់។

បើតាមប្រសាសន៍​បញ្ជាក់របស់លោក សំ ហន ​នាយកសិក្សាធិកាកម្មវិធីចំណេះទូទៅខ្មែរនៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ថា ការ​ចុះកម្មសិក្សា​ផ្ទាល់​ទៅ​កាន់សហគមន៍ វាបានផ្តល់ផលវិជ្ជាទៅ​លើការសិក្សារបស់សិស្សជាច្រើន ដូចជា​ការសិក្សា​​បែបគម្រោង និងការសិក្សាថ្មីៗជាច្រើនទៀត។ លោក​បានលើក ឧទាហរណ៍ថា នៅពេលសិស្ស​ចុះ​ទៅកាន់សហគមន៍ ពួកគេមានគំនិតចង់កែប្រែកន្លែងចាក់សំរាមនៅក្នុងសហគមន៍​នោះ​ទៅ​ជាសួនច្បារស្អាត ដូច្នេះដើម្បីអាចធ្វើកិច្ចការនោះបាន ពួកគេ​ត្រូវ​គិតថា ត្រូវធ្វើដូចម្តេច? ចុះទៅយ៉ាងណា? ត្រូវ​ការ​សម្ភារៈអ្វីខ្លះ? ត្រូវ​ប្រើប្រាស់ថវិកាប៉ុន្មាន? គាត់ត្រូវចូលរួមគ្នា​យ៉ាងម៉េច? ​ ​ឬធ្វើអ្វីៗផ្សេងទៀត…។

យ៉ាងណាក៏​ដោយ​ជាការកត់សម្គាល់របស់លោក សំ ហន ក្រោយ​សិស្ស​ចុះ​ទៅតាមសហគមន៍ លោក​សង្កេត​ឃើញថា សិស្សមានការ​អភិវឌ្ឍទាំងផ្ទាល់ខ្លួន បញ្ញា និងសង្គម មានជំនាញគិតកម្រិតខ្ពស់ ជំនាញទាក់ទងដោយផ្ទាល់, ជំនាញសង្កេត​ដោយ​ការ​សួរ​សំណួរ វិនិច្ឆ័យ អនុវត្ត, ចេះស្វែងយល់អំពីអាជីវកម្ម​ដែលមាន​ក្នុងសហគមន៍, មានសមត្ថភាព​ក្នុងការ​ទំនាក់ទំនង​ជាមួយ​មនុស្ស​ពីមជ្ឈដ្ឋាន​ដ៏ធំទូលាយ និង​ស្ថានភាពជីវិត, មានការ​ទទួលខុសត្រូវ គណនេយ្យភាព និង​ភាពម្ចាស់ការ​ក្នុងការ​បង្កើត​សង្គម​ដ៏​ល្អមួយ៕