ភ្នំពេញ – អង្គការសហប្រជាជាតិបានប្រកាសយកថ្ងៃទី២៤ ខែមករា ជារៀងរាល់ឆ្នាំ ជាទិវាអប់រំអន្តរជាតិ ដើម្បីអបអរសាទរតួនាទីនៃការអប់រំដើម្បីសន្តិភាពនិងការអភិវឌ្ឍន៍។ បើគ្មានការអប់រំប្រកបដោយគុណភាព និងសមភាព និងឱកាសពេញមួយជីវិតសម្រាប់ទាំងអស់គ្នាទេ ប្រទេសនានានឹងមិនជោគជ័យក្នុងការសម្រេចបានសមភាពយេនឌ័រ និងការបំបែកវដ្តនៃភាពក្រីក្រដែលកំពុងបន្សល់ទុកកុមារ យុវជន និងមនុស្សពេញវ័យរាប់លាននាក់នៅថ្ងៃក្រោយនោះទេ។

សម្រាប់ទិវាអប់រំអន្តរជាតិឆ្នាំ២០២៣នេះ ប្រារព្ធឡើងក្រោមប្រធានបទ “វិនិយោគលើធនធានមនុស្ស ផ្តល់អទិភាពលើការអប់រំ”។ ទិវានេះត្រូវបានបង្កើតឡើងក្នុងគោលបំណងធ្វើយុទ្ធនាការកំណែទម្រង់ការអប់រំឱ្យកាន់តែប្រសើរឡើង និងលើកកម្ពស់លទ្ធភាពទទួលបានការអប់រំសម្រាប់ទាំងអស់គ្នា។

បើតាមអង្គការសហប្រជាជាតិ សព្វថ្ងៃនេះ កុមារ និងយុវជនចំនួន ២៤៤លាននាក់បានឈប់រៀន ហើយមនុស្សពេញវ័យ ៧៧១លាននាក់ មិនចេះអក្សរ។ សិទ្ធិទទួលបានការអប់រំរបស់ពួកគេកំពុងត្រូវបានរំលោភបំពាន ហើយវាមិនអាចទទួលយកបាន និងដល់ពេលដែលត្រូវផ្លាស់ប្តូរ។

សម្រាប់ ក្រសួងអប់រំ យុវជន និងកីឡា បានអនុម័តផែនទីបង្ហាញផ្លូវគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ស្តីពីការអប់រំនៅកម្ពុជា នៅដើមឆ្នាំ២០១៩ ដើម្បីធានាឱ្យការអប់រំមានគុណភាព ប្រកបដោយសមធម៌ បរិយាបន្ន និងលើកកម្ពស់ឱកាសក្នុងការសិក្សាពេញមួយជីវិតសម្រាប់ទាំងអស់គ្នា ដោយបានកំណត់អាទិភាពគោលនយោបាយអប់រំធំៗចំនួន ៥ រួមមាន៖ ទី១. កុមារគ្រប់រូបទទួលបានការគាំពារនិងអភិវឌ្ឍន៍កុមារតូច ការអប់រំកម្រិតមត្តេយ្យសិក្សា ការបញ្ចប់ការអប់រំកម្រិតមូលដ្ឋានដោយឥតបង់ថ្លៃនៅកម្រិតបឋមសិក្សា និងមធ្យមសិក្សាបឋមភូមិ ដោយទទួលបានលទ្ធផលសិក្សាប្រកបដោយគុណភាព ប្រសិទ្ធភាព សមធម៌ និងភាពឆ្លើយតប, ទី២. កុមារនិងយុវជនគ្រប់រូបបញ្ចប់ការសិក្សានៅកម្រិតអប់រំមធ្យមសិក្សាទុតិយភូមិ ការអប់រំបច្ចេកទេសនិងវិជ្ជាជីវៈ ដោយទទួលបានលទ្ធផលសិក្សាប្រកបដោយគុណភាពនិងភាពឆ្លើយតប, ទី៣. ធានាឱ្យអ្នកសិក្សាគ្រប់រូបមានលទ្ធភាពស្មើគ្នាក្នុងការទទួលបានការអប់រំបច្ចេកទេសវិជ្ជាជីវៈនិងឧត្តមសិក្សាប្រកបដោយគុណភាព, ទី៤. យុវជននិងមនុស្សពេញវ័យគ្រប់រូបទទួលបានចំណេះដឹងអក្ខរកម្ម និងលេខនព្វន្ត និងមានឱកាសកាន់តែច្រើនក្នុងការសិក្សាពេញមួយជីវិត និង ទី៥. អភិបាលកិច្ចនិងការគ្រប់គ្រងវិស័យអប់រំ មានភាពល្អប្រសើរជាងមុននៅគ្រប់កម្រិត។

គួរជម្រាបជូនថា ទិវាអប់រំអន្តរជាតិ ជាការអំពាវនាវឱ្យមានសកម្មភាពនាំបុគ្គល សង្គមស៊ីវិល និងអ្នកបង្កើតគោលនយោបាយ ចាត់វិធានការដ៏រឹងមាំឆ្ពោះទៅរកការធានាថា ការអប់រំបឋមសិក្សា និងមធ្យមសិក្សាត្រូវបានផ្តល់ឱ្យកុមារ ក៏ដូចជាការកែលម្អការចូលរួមរបស់យុវជនក្នុងវិស័យអប់រំ ហើយ​ជាមួយ​គ្នានេះ កម្មវិធីសិក្សាគួរតែត្រូវបានរចនាឡើងសម្រាប់តម្រូវការនៃប្រជាជនផ្សេងៗគ្នា ដោយបង្រួបបង្រួមទៅនឹងគោលដៅសំខាន់មួយ ផ្ដល់កុមារនូវការអប់រំដែលមានត្រូវការការងារ និងអនាគតកាន់តែប្រសើរ៕