ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ដើម្បីជាការលើកទឹកចិត្តដល់ការខិតខំរៀនសូត្ររបស់សិស្សនិទ្ទេស A ចំនួន១៧នាក់នៅក្នុងខេត្តស្វាយរៀង ឯកឧត្តម ម៉ែន វិបុល អភិបាលខេត្ត បានផ្តល់រង្វាន់ជាម៉ូតូម្នាក់មួយគ្រឿង រួមជាមួយនឹងថវិកាមួយចំនួនទៀត។
ថ្លែងក្នុងឱកាសជួបសំណេះសំណាលជាមួយសិស្សនិទ្ទេស A ទាំង១៧នាក់ ដែលធ្វើឡើងកាលពីថ្ងៃទី២៥ ខែមករា កន្លងទៅនេះ ឯកឧត្តម ម៉ែន វិបុល បានថ្លែងអំណរគុណដល់មាតាបិតា អាណាព្យាបាលសិស្ស ដែលបានលើកទឹកចិត្តជំរុញតាមដាន និងចូលរួមគាំទ្រគ្រប់សកម្មភាពទាំងឡាយនៃការសិក្សារបស់កូនចៅខ្លួន ។ ក្នុងនោះគណៈគ្រប់សាលា ព្រមទាំងលោកគ្រូ អ្នកគ្រូទាំងអស់បានខិតខំយកចិត្តទុកដាក់បង្រៀនសិស្សនៅក្នុងស្ថានភាពដ៏លំបាកទាំងដោយផ្ទាល់ផង ទាំងអនឡាញផងទើបនាំឱ្យទទួលបានលទ្ធផលដ៏ល្អប្រសើរបែបនេះ ។
ឯកឧត្តម ម៉ែន វិបុល អភិបាលខេត្តស្វាយរៀង
“ក្នុងនាមអាជ្ញាធរខេត្ត ពិតជាមានការកោតសរសើរ និងមានមោទកភាព បើទោះកំឡុងពេលសិក្សាបានជួបនឹងបញ្ហាប្រឈមដោយសាវិបត្តិនៃជំងឺកូវីដ១៩ ក៏យើងសង្កេតឃើញថា តាមរយៈលទ្ធផលប្រឡងខេត្ត ក៏នៅតែទទួលបានលទ្ធផលយ៉ាងល្អប្រសើរ ដោយមានអត្រាសិស្សប្រឡងជាប់សរុបប្រមាណជាង ៧០% និងទទួលបាននិទ្ទេស A ចំនួន ១៧នាក់”
ជាមួយគ្នានេះ ឯកឧត្តមអភិបាលខេត្តស្វាយរៀង ក៏បានផ្តល់នូវមតិផ្តាំផ្ញើមួយចំនួនដល់ក្មួយៗមួយចំនួនដូចជា ៖ ត្រូវចេះតស៊ូអំណត់ព្យាយាម ដោយយកចិត្តទុកដាក់រៀនសូត្រឱ្យបានពូកែថែមទៀត, ត្រូវធ្វើអំពើណាដែលល្អ និងមានផលប្រយោជន៍ដល់សង្គម, ត្រូវចៀសឱ្យឆ្ងាយពីគ្រឿងញៀន និងគ្រឿងស្រវឹងគ្រប់ប្រភេទ, ចៀសវាងឱ្យបាននូវអំពើអបាយមុខផ្សេងៗ ជាពិសេសល្បែងស៊ីសង, ត្រូវបន្តប្រតិបត្តិខ្លួនជាកូនល្អ សិស្សនិស្សិតល្អ និងមិត្តភក្ដិល្អ, ត្រូវអភិវឌ្ឍន៍ខ្លួនឱ្យក្លាយជាយុវជន ដែលប្រកបដោយគុណសម្បត្តិបួនយ៉ាង គឺបញ្ញា សីលធម៌ សុជីវធម៌ និងកាយសម្បទាមាំមួន, មិនត្រូវមានមោទកភាពភ្លេចខ្លួន និងមិនត្រូវធ្វេសប្រហែសជាដាច់ខាត ត្រូវបន្តខិតខំដើម្បីសម្រេចនូវគោលដៅ និងគោលបំណងរបស់ខ្លួន, ត្រូវចូលរួមគោរពប្រតិបត្តិច្បាប់ចរាចរណ៍ឱ្យបានខ្ជាប់ខ្ជួនដើម្បីសុវត្ថិភាពខ្លួនឯងផង និងអ្នកដទៃផង «បើធ្វើដំណើរតាមម៉ូតូ ត្រូវពាក់មួកសុវត្ថិភាព បើធ្វើដំណើរតាមរថយន្តត្រូវពាក់ខ្សែក្រវ៉ាត់ឱ្យបានត្រឹមត្រូវ»។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២២ ដែលប្រព្រឹត្តទៅកាលពីថ្ងៃទី៥ ខែធ្នូ ឆ្នាំ២០២២ ខេត្តស្វាយរៀង មានសិស្សប្រឡងជាប់និទ្ទេស A សរុបចំនួន ១៧នាក់ ក្នុងនោះមានស្រី៦នាក់, សិស្សនិទ្ទេស B ចំនួន២០៦នាក់ ស្រី១៣៣នាក់, សិស្សនិទ្ទេស C ចំនួន៦២៧នាក់ ស្រី៣៧៩នាក់, សិស្សនិទ្ទេស D ចំនួន១០២៤នាក់ ស្រី៥៩៥នាក់ និងសិស្សនិទ្ទេសE ចំនួន១០០៦នាក់ ស្រី៥២១នាក់ ៕
