តួនាទីរបស់យុវជនក្នុងនាមជាកាយរឹទ្ធិ គឺត្រូវមានការចូលរួម លើកកម្ពស់សន្តិភាព ដើម្បីដោះស្រាយបញ្ហាវិសមភាព និងការការពារបរិស្ថាន ។ នេះគឺជាប្រសាសន៍លើកឡើងរបស់ ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា និងជាអនុប្រធានកាយរឹទ្ធិជាតិកម្ពុជា ក្នុងកម្មវិធីបោះជំរំកាយរឹទ្ធិតាមរលកធាតុអាកាស និងប្រព័ន្ធអ៊ីនធឺណិត ឆ្នាំ២០២៣ (JOTA-JOTI 2023) កាលពីថ្ងៃទី២២ តុលា ក្រោមមូលបទជាសាកល ៖ «ភាពជាអ្នកដឹកនាំវ័យក្មេងដើម្បីសន្តិភាព Youth Leadership in Peace)»។

ឯកឧត្តម សេរី ជំនះ បានថ្លែងក្នុងសន្ទរកបើកកម្មវិធីថា ព្រឹត្តិការណ៍នេះលើសពីការបោះជំរំធម្មតា ដោយសារយុវជនកាយរឹទ្ធិអាចមានឱកាសស្គាល់មិត្តភក្តិ ដែលជាសមាជិកកាយរឺទ្ធិនៅតាមប្រទេសមួយចំនួននៅទូទាំងពិភពលោក ក្រៅពីការទំនាក់ទំនងនៃសមាជិកកាយរឹទ្ធិនៅក្នុងព្រះរាជាណាចក្រកម្ពុជា។

ឯកឧត្តមបន្ថែមថា អ្វីដែលពាក់ព័ន្ធនឹងប្រធានបទក្នុងកម្មវិធីនេះ ពិតជាមានសារៈសំខាន់ ក្នុងការអភិវឌ្ឍយុវជននេះ ដែលនេះគឺជាដំណើរសកម្មភាពមួយ ដើម្បីការអភិវឌ្ឍសង្គមប្រកបដោយចីរភាព និងសម្រេចទៅដល់សសរស្ដម្ភទាំងបួន នៃគោលដៅប្រកបដោយចីរភាពរបស់អង្គការសហប្រជាជាតិដែលមាន និរន្តភាព និងបរិស្ថាន, សន្តិភាព និងទំនាក់ទំនងនៅក្នុងសហគមន៍, សុខភាព និងសុខុមាលភាព, និងបំណិនជីវិត។

តាមរយៈកម្មវិធីនេះ យុវជនកាយរឹទ្ធិអាចពង្រឹងសមត្ថភាព បំណិនជីវិត មានគំនិតច្នៃប្រឌិត និងចេះរំលែក ចេះធ្វើការងារជាក្រុម ប្រកបដោយប្រសិទ្ធភាព និងប្រសិទ្ធផល។

ឯកឧត្តម សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា និងជា អនុប្រធានកាយរឹទ្ធិជាតិកម្ពុជា

គួរជម្រាបជូនផងដែរថា កម្មវិធីនេះត្រូវបានប្រារព្ធឡើងដើម្បីផ្តល់ឱកាសដល់យុវជនកាយរឹទ្ធិអភិវឌ្ឍ និងបង្ហាញនូវភាពប៉ិនប្រសព្វ សមត្ថភាពលើបំណិនបច្ចេកវិទ្យាព័ត៌មាន បំណិន STEM ការអប់រំឌីជីថល បណ្តុះគំនិតអាជីវកម្មលើផ្នែកបច្ចេកវិទ្យា ការបន្ស៉ាំខ្លួន និងការត្រៀមខ្លួនបើកចំហកាន់តែទូលំទូលាយទៅកាន់សង្គម និងសំដៅបណ្តុះយុវជនឱ្យក្លាយជាប្រជាពលរដ្ឋមានទំនួលខុសត្រូវ និងសមត្ថភាពច្បាស់លាស់ក្នុងការប្រកួតប្រជែងទីផ្សារការងារ និងមុខរបរក្នុងបរិបទសមាហរណកម្មសេដ្ឋកិច្ចក្នុងតំបន់ និងពិភពលោក ។ កម្មវិធីមានកាយរឹទ្ធិរៀមច្បង និងកាយរឹទ្ធិជំទង់ចូលរួមប្រមាណជាង ១០០នាក់៕