ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការតាំងស្មារតី ឬពង្រឹងសតិដឹងជាប្រចាំ ស្ថិតក្នុងទម្រង់នៃសមាធិ ដែលមានតួនាទី និងសមត្ថភាពក្នុងការស្គាល់អំពីការគិតរបស់ខ្លួនឯង ក៏ដូចជាកាត់បន្ថយស្រ្តេស និងបង្កើនភាពស្រស់ស្រាយ។ តាមរយៈគេហទំព័រ Wealth Of Geeks បានបង្ហាញគន្លឹះ៥ចំណុចដើម្បីធ្វើឱ្យស្មារតីមានសតិដឹងជាប្រចាំ។
១. ធ្វើសកម្មភាពដែលនាំនូវប្រយោជន៍ពេលព្រឹកព្រលឹម ៖ ដើម្បីបង្កើតថាមពលពេលព្រឹកប្រចាំថ្ងៃដ៏ល្អ ចាំបាច់ត្រូវមានទម្លាប់ និងសកម្មភាពល្អប្រចាំថ្ងៃភ្ជាប់មកជាមួយ។ ក្រោកពីគេងភ្លាម ត្រូវផ្តោតលើរឿងរ៉ាវដែលនាំឱ្យអារម្មណ៍មានសុភមង្គល មានថាមពល និងទំនុកចិត្តចេញពីខាងក្នុង ។ ការប្រើប្រាស់ពាក្យពេចន៍វិជ្ជមាន ក៏ជាការផ្តល់ប្រយោជន៍ចំពោះខ្លួនឯងបានមួយកម្រិតដែរ។ ឧទាហរណ៍ ខ្ញុំបានយកចិត្តទុកដាក់ជាមួយខ្លួនឯង ឬក៏យកពេលទៅរំលឹកអំពីគោលដៅដែលច្បាស់លាស់ និងធ្លាប់ដៅទុកពីមុន។ ពេលដែលក្រោកមកជាមួយនឹងការប្រត្តិបត្តិត្រឹមត្រូវ វាគឺជាកត្តាជំរុញឱ្យអ្នកចំណាយពេលយ៉ាងមានប្រសិទ្ធភាពបានពេញមួយថ្ងៃដូចគ្នាដែរ។
២. មិនរំពឹងអ្វីទាំងអស់ ៖ មានមនុស្សជាច្រើនបានដាក់ក្ដីរំពឹងខ្ពស់ នៅពេលចាប់ផ្តើមថ្ងៃថ្មី ពួកគេបានកំណត់គោលដៅធំៗ ហើយសង្ឃឹមថា ភាពតានតឹងនឹងរសាយបាត់ក្នុងរយៈពេលត្រឹមតែមួយអាទិត្យ ឬក៏មួយខែ។ ការដាក់ក្ដីរំពឹងបែបនេះ អាចជាសត្រូវដ៏អាក្រក់ក្នុងរយៈពេលវែង ពីព្រោះកត្តានេះនឹងមិនអាចកើតមានបាននោះទេ។ ជាងនេះទៅទៀត វាបន្ថែមនូវអារម្មណ៍ស្រ្តេស បាត់បង់កម្លាំងចិត្ត រួមទាំងប៉ះពាល់ដល់ការកំណត់គោលដៅជីវិត។ ជំនួសឱ្យការគិតតែក្ដីរំពឹង ឬការគិតតែអំពីលទ្ធផល គួរទុកពេលឱ្យខួរក្បាលគិតនិងសង្កេតសកម្មភាពដែលកើតមាននៅជុំវិញខ្លួន ក៏ដូចជាបង្កើនសតិដឹងត្រូវ។
៣. បញ្ចៀសប្រតិកម្ម ៖ ប្រសិនបើអ្នកប្រតិកម្ម ទៅនឹងរឿងដែលមិនចាំបាច់ ឬឆ្លើយតបនឹងសកម្មភាពដែលមិនចាំបាច់ ប្រៀបដូចជា អនុញ្ញាតិឱ្យបុគ្គលដទៃ មកកាត់ចង្វាក់ដំណើរជីវិតរបស់ខ្លួនឯង។ មួយវិញទៀត ការចំណាយពេលទៅព្រួយបារម្ភអំពីការគិតរបស់អ្នកដទៃមកកាន់ខ្លួនឯង ហាក់ពុំនាំនូវផលចំណេញនោះទេ គឺបានត្រឹមតែផ្តល់នូវភាពមន្ទិលសង្ស័យ ឬការបាត់បង់ទំនុកចិត្តចំពោះខ្លួនឯង។ ជំនួសឱ្យការប្រតិកម្ម គួរយកពេលទៅធ្វើសកម្មភាពដែលនាំជាប្រយោជន៍វិញ ហើយផ្តោតទៅលើរឿងរ៉ាវដែលកើតមានប្រចាំថ្ងៃ។
៤. យកចិត្តទុកដាក់ ៖ ជារឿយៗក្រោកពីគេងភ្លាម មានមនុស្សមួយចំនួនបានគិតអំពីរឿងរ៉ាវដែលបានកន្លងផុតកាលពីម្សិលមិញ ប៉ុន្តែមិនព្យាយាមយកចិត្តទុកដាក់ចំពោះរឿងរ៉ាវដែលបានកើតមានជុំវិញខ្លួនវិញ។ ក្រោកឡើងភ្លាម គួរតែមើលជុំវិញមាត់បង្អួច សម្លឹងនិងពិនិត្យរាល់ជុំវិញអ្វីៗ ដែលកើតមាន ឬក៏ញ៉ាំអាហារសម្រន់ពេលព្រឹកដោយសន្សឹមៗ ដើម្បីមានពេលគ្រប់គ្រាន់ក្នុងការគិតឆ្លុះបញ្ចាំង។
៥. កុំបង្ខំខ្លួនឯង ៖ ការរក្សាភាពស្ងប់ស្ងាត់ និងមានសតិដឹងជាប្រចាំ មិនមែនជាការបង្ខំខ្លួនឯងនោះទេ គួរតែរីករាយនឹងដំណើរនៃការធ្វើសមាធិ ប្រសិនបើមានអារម្មណ៍មិនទម្លាប់ និងមិនមានផាសុកភាពជាមួយនឹងសមាធិទេ សាកល្បងនឹងវិធីសាស្រ្តផ្សេងៗ ឬក៏ទៅរកកន្លែងដែលទទួលបង្វឹកបង្ហាត់ និងមានការណែនាំត្រឹមត្រូវអំពីការអប់រំចិត្ត៕
