ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីថ្ងៃទី១៦ ខែធ្នូ ឆ្នាំ២០២៥ ក្រសួងអប់រំ យុវជន និងកីឡា បានចុះកិច្ចព្រមព្រៀងជាមួយអង្គការមូលនិធិកុមារកម្ពុជា និងក្រុមហ៊ុន ដាណន់ ស្ពេសស៊លឡាយដ៏ នូទ្រីសិន ក្នុងការគាំទ្រការសាងសង់ឡើងវិញនូវហេដ្ឋារចនាសម្ព័ន្ធអប់រំ ដែលរងការប៉ះពាល់ដោយសង្រ្គាម នៅតាមបណ្តោយព្រំដែនកម្ពុជា-ថៃ។
កិច្ចព្រមព្រៀងនេះ រួមមានការសាងសង់អគារសាលារៀនថ្មីមួយខ្នង ដែលមានថ្នាក់រៀនចំនួន ៦បន្ទប់ នៅក្នុងតំបន់រងផលប៉ះពាល់ ដើម្បីផ្តល់ទីជម្រកសិក្សាប្រកបដោយសុវត្ថិភាព និងគាំទ្រដល់សិស្សានុសិស្ស និងលោកគ្រូអ្នកគ្រូ ដែលរងផលប៉ះពាល់ពីការឈ្លានពានរបស់ប្រទេសថៃ។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានថ្លែងអំណរគុណដល់ក្រុមហ៊ុន ដាណន់ និងអង្គការមូលនិធិកុមារកម្ពុជា ដែលបានជួយគាំទ្រវិស័យអប់រំនៅកម្ពុជានាពេលកន្លងមក ជាពិសេសនាពេលលំបាកនេះ ដោយបញ្ចាក់សក្ខីភាពនៃភាពជាដៃគូដ៏រឹងមាំរវាងរដ្ឋ និងឯកជន ក្នុងការជួយសង្គ្រោះ និងលើកកម្ពស់អនាគតរបស់កុមារកម្ពុជាក្នុងកាលៈទេសៈដ៏តឹងតែងនេះ។
ឯកឧត្តមរដ្ឋមន្រ្តីមានប្រសាសន៍ថា សាលារៀនដែលនឹងត្រូវសាងសង់នេះ នឹងក្លាយជាគ្រឹះដ៏រឹងមាំក្នុងការផ្តល់ចំណេះដឹង និងក្តីសង្ឃឹមឡើងវិញដល់សិស្សានុសិស្សដែលរងផលប៉ះពាល់ ហើយគម្រោងនេះនឹងត្រូវអនុវត្តក្នុងរយៈពេល ១២ខែ ដោយចាប់ផ្តើមអនុវត្តភ្លាមៗ ដើម្បីឆ្លើយតបទៅនឹងតម្រូវការជាក់ស្តែងរបស់សហគមន៍នៅតាមព្រំដែន។
យោងតាមរបាយការណ៍ចុងក្រោយរបស់ក្រសួងអប់រំ គិតត្រឹមថ្ងៃទី១៦ ខែធ្នូ ឆ្នាំ២០២៥ មានសាលារៀនក្នុងខេត្តជាប់បន្ទាត់ព្រំដែន៦ខេត្ត ត្រូវបានបិទទ្វារ សរុបចំនួន ១០៤២សាលារៀន ដោយសារការប៉ះទង្គិចគ្នារវាងកងទ័ពកម្ពុជា និងថៃ ដោយក៏ប៉ះពាល់ដល់គ្រូបង្រៀនចំនួន ៩៨៦៥នាក់ និងសិស្ស ២៤៥០០១នាក់៕
