រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា មានប្រសាសន៍ថា ក្រសួងបានសម្រេចបង្កើតមូលនិធិ ដើម្បីជួយគាំទ្រ​លោកគ្រូអ្នកគ្រូ ដែលផ្ទះសម្បែងត្រូវបានហ៊ុមព័ទ្ធ និង​ខូចខាតពីការឈ្លានពានរបស់កងទ័ពថៃ​នៅ​តាមតំបន់ព្រំដែន។

ក្នុងពិធីសំណេះសំណាល សួរសុខទុក្ខ និង​ប្រគល់សម្ភារៈ​ប្រើប្រាស់ គ្រឿងឧបភោគបរិភោគ ព្រមទាំង​ថវិកា ជូន​ដល់​លោក​គ្រូអ្នកគ្រូ​ដែល​រងផលប៉ះពាល់​តាមព្រំដែន ក្នុង​ខេត្ត​បន្ទាយមានជ័យ កាលពីចុងសប្តាហ៍កន្លងទៅនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានថ្លែង​ដោយ​កោតសរសើរ ចំពោះសមានចិត្ត និងវីរៈភាពអង់អាចក្លាហានរបស់លោកគ្រូ អ្នកគ្រូ ដែលបានតស៊ូជម្នះរាល់ឧបសគ្គ ដើម្បីបន្តបេសកកម្មអប់រំសិស្សានុសិស្សនៅតាមតំបន់ព្រំដែន ទោះបីស្ថិតក្នុងស្ថានភាពលំបាកយ៉ាងណាក៏ដោយ។

ដើម្បីជួយសម្របសម្រួល និងសម្រាលការលំបាករបស់លោកគ្រូ អ្នកគ្រូ និងបុគ្គលិកអប់រំ ឯឧត្តមរដ្ឋមន្រ្តីមានប្រសាន៍ថា កន្លងមកក្រសួងបានផ្ដល់គ្រឿងឧបភោគបរិភោគ សម្ភារៈសិក្សា សម្ភារៈប្រើប្រាស់ចាំបាច់ និងថវិកាមួយចំនួនតាមរយៈ​លោកប្រធានមន្ទីរអប់រំ ដើម្បីបែងចែកបន្តជួយ​សម្រួលដល់ជីវភាពរបស់បុគ្គលិកអប់រំ។ ឯកឧត្តមរដ្ឋមន្រ្តីគូសបញ្ជាក់ថា ការជួយគាំទ្រនេះ ក្រសួងនឹងនៅតែបន្តជួយដល់សាលារៀនដែលរងគ្រោះ និងលោកគ្រូ អ្នកគ្រូភៀសសឹក ដោយ​ក្រសួងបានសម្រេចបង្កើតមូលនិធិជួយគាំទ្រលោកគ្រូ អ្នកគ្រូ ដែលផ្ទះសម្បែងត្រូវបានហ៊ុមព័ទ្ធ និងខូចខាតពីការ​ឈ្លានពាន​របស់កងទ័ពថៃ ហើយនឹងបន្តផ្សព្វផ្សាយឱ្យបានទូលំទូលាយ ដើម្បីរួមគ្នាជាធ្លុងមួយ​ក្នុងការជួយ​គាំទ្រ និងសាងសង់លំនៅឋានថ្មីជូនលោកគ្រូ អ្នកគ្រូដែលរងផលប៉ះពាល់ឱ្យមានលំនឹងជីវភាព និងភាពកក់ក្តៅឡើងវិញ ក្នុងនាមជាគ្រួសារអប់រំតែមួយ។

តាមរបាយការណ៍របស់ក្រសួងមហាផ្ទៃ គិតត្រឹមព្រឹកថ្ងៃទី១១ ខែមករា ឆ្នាំ២០២៦ នៅ​មានពលរដ្ឋ​ភៀសសឹកប្រមាណជាង ១៦ម៉ឺននាក់ទៀត ដែល​នៅក្នុងនោះ​ក៏​មានគ្រូបង្រៀន កំពុងស្នាក់នៅតាមជំរំ ដោយសារភូមិឋានរបស់ពួកគាត់មិនអាច​ចូលទៅរស់នៅវិញបាន​ ព្រោះតែមានបន្សល់នូវគ្រាប់យុទ្ធភណ្ឌមិនទាន់ផ្ទុះ ខណៈភូមិឋានខ្លះត្រូវបំផ្លាញទាំងស្រុង និង​ហ៊ុំព័ទ្ធដោយ​កងទ័ពថៃ៕