ក្រសួងអប់រំ យុវជន និងកីឡា សហការជាមួយក្រុមហ៊ុន TF MOTORS (CAMBODIA) Co.,LTD បានប្រកាសផ្តល់រង្វាន់​រថយន្តអគ្គិសនី Leapmotor TO3 ចំនួនមួយគ្រឿង ជូនដល់សិស្សានុសិស្សដែលទទួលបានកម្រិតពិន្ទុប្រឡងសញ្ញាបត្រមធ្យមសិក្សាទុតិយភូមិខ្ពស់ជាងគេប្រចាំប្រទេស (តែម្នាក់គត់) សម្រាប់សម័យប្រឡង ថ្ងៃទី១៨ ខែសីហា ឆ្នាំ២០២៥ ខាងមុននេះ។

បើតាមក្រសួងអប់រំ ការផ្តល់រង្វាន់រថយន្តអគ្គិសនីដល់សិស្សជ័យលាភីនេះ គឺដើម្បីលើកទឹកចិត្តដល់សិស្សានុសិស្សឱ្យខិតខំប្រឹងប្រែងរៀនសូត្រ លើកស្ទួយវិស័យអប់រំឱ្យកាន់តែរីកចម្រើន និងជាផ្នែកគាំទ្រការប្រើប្រាស់រថយន្តអគ្គិសនីដើម្បីថែទាំដល់បរិស្ថាន និងកាត់បន្ថយឧស្ម័នពុលដែលប៉ះពាល់ដល់បរិយាកាស។

លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កន្លងមកក្រសួងអប់រំ តែងតែធ្វើការងារស្និទ្ធជាមួយនឹងដៃគូនានា ក៏ដូចជាខិតខំប្រឹងប្រែងក្នុងការស្វែងរកសប្បុរសជននានានៅក្នុងការគាំទ្រដល់ប្អូនៗទទួលបានពិន្ទុល្អ ជាពិសេសនិទ្ទេស A នៅក្នុងការប្រឡងសញ្ញាបត្រមធ្យមសិក្សាទុតិយភូមិ។ លោកជំទាវបញ្ជាក់ថា ការផ្តល់រង្វាន់លើកទឹកចិត្តជារថយន្តអគ្គិសនីនេះ ជាការខិតខំប្រឹងប្រែងរបស់ក្រសួងអប់រំដែលទទួលបានការសហការពីដៃគូពាក់ព័ន្ធនៅក្នុងការផ្ដល់ជារង្វាន់ដល់ប្អូនៗដែលទទួលបានពិន្ទុខ្ពស់ជាលំដាប់ពិន្ទុខ្ពស់ជាងគេនៅក្នុងការប្រឡងសញ្ញាបត្រមធ្យមសិក្សាទុតិយភូមិនៅក្នុងពេលអនាគតនេះ។

ក្នុងនាមក្រសួងអប់រំ លោកជំទាវបណ្ឌិត ឃួន វិច្ឆិកា ក៏បានអំពាវនាវទៅដល់ប្អូនៗសិស្សានុសិស្ស ឱ្យ​ខិតខំប្រឹងប្រែងរៀនសូត្រ ហើយជឿជាក់ថា ការប្រឡងនេះដំណើរការទៅតាមគោលការណ៍អ្នកចេះគឺជាប់ និងគោរពតាមច្បាប់បញ្ញត្តិនានាដែលបានដាក់ចេញ។ ដូច្នេះសូមប្អូនៗតាមដានរាល់ព័ត៌មានដែលបានផ្សព្វផ្សាយនៅក្រសួងអប់រំ និងគោរពឱ្យបានហ្មត់ចត់នូវគោលការណ៍ណែនាំដែលបានដាក់ចេញ។

ជាមួយ​គ្នានេះ លោកជំទាវបណ្ឌិត ក៏បានលើកទឹកចិត្តប្អូនៗជាបេក្ខជនបាក់ឌុប ថែរក្សាសុខភាពឱ្យបានល្អ ទាំងផ្លូវកាយ និងសតិបញ្ញាចូលរួមក្នុងការប្រឡង ដើម្បីទទួលបានលទ្ធផលល្អ នៅក្នុងការប្រឡងបាក់ឌុប ក៏ដូចជាទទួលបានពិន្ទុល្អ ចូលរួមក្នុងការប្រកួតប្រជែងដណ្ដើមយករង្វាន់នានាដែលរៀបចំដោយក្រសួងអប់រំ ក៏ដូចជាសប្បុរសជននានា។

សម្រាប់ លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា មានប្រសាសន៍គាំទ្រចំពោះការផ្តល់រង្វាន់បែបនេះ ដើម្បីជំរុញសិស្សានុសិស្សឱ្យប្រឹងប្រែងរៀនសូត្រ ប៉ុន្តែលោកថា ក្រសួងអប់រំ គួរតែជ្រើសរើស និងកំណត់បេក្ខជនប្រឡងដែលអាចទទួលបានរង្វាន់រថយន្តនេះដោយត្រឹមត្រូវ និងមិនលម្អៀង។

សូមជំរាបជូនថា រង្វាន់​រថយន្តអគ្គិសនី ម៉ាក Leapmotor T03 city car ទ្វារ-5 ចំនួនមួយ​គ្រឿងនេះ មាន​តម្លៃ ១ម៉ឺន៥ពាន់ ៩៩០ដុល្លារ អាចបើកបរបាន ៣១០គីឡូម៉ែត្រពេលមានថាមពលពេញ៕