ក្នុងកិច្ចប្រជុំ​ពិនិត្យ​លើ​សេចក្តី​ព្រាង​ណែនាំ​ស្តីពី “ការប្រមូលកុមារចំណូលស្រុកពីប្រទេសថៃឱ្យចូលរៀន” កាលពីរសៀលថ្ងៃទី១៤ សីហា ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានធ្វើការ​ណែនាំ​ទៅ​ដល់​ថ្នាក់ដឹកនាំ និង​មន្រ្តីពាក់ព័ន្ធ ធ្វើការ​សម្របសម្រួល​លក្ខខណ្ឌ នីតិវិធី ឱ្យ​គ្រឹះស្ថាន​សិក្សាសាធារណៈទាំងអស់ ទទួលកុមារ​ចំណូលស្រុកពី​ប្រទេសថៃ ឱ្យចូលរៀន កុំ​ឱ្យ​មានភាពស្មុគស្មាញ សម្រាប់ឆ្នាំសិក្សា​២០២៥-២០២៦ខាងមុខនេះ។

បើតាម​ប្រសាសន៍​របស់ ឯកឧត្តមបណ្ឌិតសភាចារ្យ ហង់ជួន ណារ៉ុន នៅ​ឆ្នាំសិក្សា២០២៥-២០២៦ នេះ ជាឆ្នាំសិក្សាដែលក្រសួងអប់រំ យុវជន និងកីឡា ផ្តោតការយកចិត្តទុកដាក់បន្ថែមចំពោះកុមារ ឬសិស្សដែលវិលត្រឡប់ពីប្រទេសថៃ ឱ្យបានចូលរៀន នៅតាមគ្រឹះស្ថានសិក្សាសាធារណៈ ឬទីកន្លែងសិក្សានានា ដើម្បីធានាឱ្យកុមារ/សិស្សទទួលបានការអប់រំប្រកបដោយគុណភាព សមធម៌ បរិយាបន្ន និងលើកកម្ពស់ឱកាសសិក្សាពេញមួយជីវិត។

នៅ​ក្នុង​សេចក្តីព្រាងឯកសារសេចក្តីណែនាំស្តីពី “ការប្រមូលកុមារ និងសិស្សនុសិស្សចំណូលស្រុកពីប្រទេសថៃឱ្យបានចូលរៀន” ដែល​ក្រសួងកំពុងរៀបចំ បើតាម​ប្រសាសន៍របស់ ឯកឧត្តមបណ្ឌិតសភាចារ្យ សេចក្តីព្រាងនេះ ​មាន​ចំណុច​សំខាន់ៗ​ដូចជា ៖ វិធីសាស្ត្រក្នុងការទទួលកុមារ ឬសិស្សដែលវិលប្រឡប់ពីប្រទេសថៃ, លក្ខខណ្ឌក្នុងការដាក់ពាក្យចូលរៀន, កម្មវិធីបំប៉នបន្ថែមសម្រាប់សិស្សរៀនខ្សោយ, ការត្រៀមមុនថ្ងៃបើកបវេសនកាល ឆ្នាំសិក្សា២០២៥-២០២៦, ការរៀបចំការបង្រៀននិងរៀន, ការរៀបចំថ្នាក់រៀន ឬទីកន្លែងសិក្សា,ការរៀបចំសម្ភារសិក្សា និងការផ្គត់ផ្គង់,ការរៀបចំគ្រូបង្រៀន, ការចូលរួមរបស់សហគមន៍ និងដៃគូអភិវឌ្ឍ, ពិនិត្យតាមដាន និងវាយតម្លៃការសិក្សា។

តាមរបាយការណ៍របស់ក្រសួងការងារ និង​បណ្តុះបណ្តាលវិជ្ជាជីវៈ ជម្លោះព្រំដែនរវាងកម្ពុជា និងថៃ រយៈពេលជាង២ខែមកនេះ បានធ្វើឱ្យពលករចំណាកស្រុកកម្ពុជាវិលត្រឡប់ពីប្រទេសថៃវិញយ៉ាងតិច ៩១ម៉ឺននាក់, របាយការណ៍​មិន​បាន​បញ្ជាក់​ទេ​​​​​ពីចំនួន​កុមារដែល​តាម​ឪពុកម្តាយ​ទៅធ្វើការ​នៅ​ប្រទេសថៃ ហើយ​បានវិលត្រឡប់មកវិញឡើយ។ តែ​យ៉ាងណា បើតាម​ប្រសាសន៍របស់ ឯកឧត្តមបណ្ឌិតសភាចារ្យ ហង់ជួន ណារ៉ុន គ្រប់មន្ទីរអប់រំ យុវជន និងកីឡា រាជធានី ខេត្ត ការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ និងគ្រឹះស្ថានសិក្សាសាធារណៈទាំងអស់ បានត្រៀម​ខ្លួន​ក្នុង​ការ​សម្របសម្រួល ដើម្បី​ជួយ​ឱ្យ​កុមារ​ដែលចំណូលស្រុកពីប្រទេសថៃ​បាន​ចូលរៀន សំដៅលើកទឹកចិត្តដល់មាតាបិតា អ្នកអាណាព្យាបាល ឱ្យបញ្ជូនកូនទៅរៀនឱ្យបានច្រើន ដើម្បីទទួលបានការអប់រំស្របតាមវ័យរបស់ពួកគេ បើទោះជាស្ថានភាពនៅតាមព្រំដែនមិនទាន់មានភាពប្រក្រតីក៏ដោយ៕