ថ្លែងក្នុងពិធីបើកសិក្ខាសាលាស្តីពីការអប់រំ “ភាសាចិន និង ជំនាញវិជ្ជាជីវៈ” ក្នុងប្រទេសអាស៊ាន ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លើកឡើងថា ការអភិវឌ្ឍការអប់រំ «ភាសាចិន និងជំនាញវិជ្ជាជីវៈ» ជាគំរូថ្មីលើកិច្ចសហប្រតិបត្តិការ នៃការបណ្តុះបណ្តាលធនធានមនុស្សលើជំនាញវិជ្ជាជីវៈ ក៏ ដូចជាការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជាគន្លឹះក្នុងការបង្កើតកម្លាំងពលកម្មជំនាញដែលមានសមត្ថភាពខ្ពស់ ដើម្បីបំពេញសេចក្តីត្រូវការទីផ្សារការងារ ជាក់ស្តែងក្នុងវិស័យឧស្សាហកម្ម និងសេដ្ឋកិច្ចសង្គមក្នុងតំបន់។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ការអភិវឌ្ឍការអប់រំ «ភាសាចិន និង ជំនាញវិជ្ជាជីវៈ» តាមរយៈកិច្ចសហប្រតិបត្តិការក្នុងបណ្តាប្រទេសអាស៊ាន ក៏ដូចជា ជាមួយកម្ពុជា គឺជាគំរូថ្មីមួយលើកិច្ចសហប្រតិបត្តិការជាក់ស្តែង ឆ្លើយតបនឹងអនុសាសន៍របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានដាក់ចេញក្នុងយុទ្ធសាស្ត្របញ្ចកោណ ឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និង ឆ្នាំ២០៥០ កម្ពុជាទទួលអត្ថប្រយោជន៍ជាច្រើនចេញពីកិច្ចសហប្រតិបត្តិការអប់រំ «ភាសាចិន និង ជំនាញវិជ្ជាជីរៈ» ជាមួយប្រទេសចិន តាមរយៈ (១) កម្មវិធីផ្លាស់ប្តូរវប្បធម៌ និងយុវជន (២) ការបង្កើតមជ្ឈមណ្ឌលអប់រំរួមគ្នាលើការអភិវឌ្ឍកម្មវិធីសិក្សា (៣) ការពង្រឹងសមត្ថភាពគ្រូបង្រៀន។

រដ្ឋមន្ត្រីក្រសួងអប់រំ បញ្ជាក់បន្ថែមថា សិក្ខាសាលានេះ នឹងផ្តល់ឱកាសឱ្យយើងអាចពិភាក្សា និងផ្លាស់ប្តូរយោបល់គ្នាស្តីពីការអភិវឌ្ឍស្តង់ដារួមគ្នាលើការអប់រំ «ភាសាចិន និង ជំនាញវិជ្ជាជីវៈ» និង ប្រព័ន្ធទទួលស្គាល់ជំនាញវិជ្ជាជីវៈ ដោយស្របតាមស្ថានភាពជាក់ស្តែងនៅក្នុងក្របខ័ណ្ឌតំបន់ ដើម្បីលើកកម្ពស់សហប្រតិបត្តិការស៊ីជម្រៅក្នុងវិស័យអប់រំបច្ចេកទេស និងវិជ្ជាជីវៈ ឱ្យកាន់តែមានវិសាលភាពទូលំទូលាយ សក្តានុពលខ្លាំងក្លា និងផ្តល់ផលជះជាវិជ្ជមានសម្រាប់មនុស្សជាតិ និងការអភិវឌ្ឍសង្គមក្នុងតំបន់។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅចំពោះមជ្ឈមណ្ឌលផ្លាស់ប្តូរ និងសហប្រតិបត្តិការភាសាចិននៃក្រសួងអប់រំប្រទេសចិន ដែលតែងតែគាំទ្រយ៉ាងខ្លាំងដល់ការអនុវត្តកម្មវិធីអប់រំភាសាចិននៅតាមគ្រឹះស្ថានមធ្យមសិក្សាសាធារណៈនៅកម្ពុជា និងសូមវាយតម្លៃខ្ពស់ ចំពោះលទ្ធផលជាវិជ្ជមានដែលកើតចេញពីកិច្ចសហប្រតិបត្តិការនេះផងដែរ ដោយជឿជាក់ថា សិក្ខាសាលានេះមិនត្រឹមតែបានរៀនសូត្រនិងចែករំលែកចំណេះដឹង និងបទពិសោធលើការងារអប់រំរវាងគ្នាប៉ុណ្ណោះទេ ថែមទាំងជាឱកាសក្នុងការពង្រឹងទំនាក់ទំនង កិច្ចសហប្រតិបត្តិការ និងការផ្លាស់ប្តូរវប្បធម៌ដ៏សម្បូរបែបរវាងចិននិងអាស៊ាន។

គួរជំរាបជូនថា សិក្ខាសាលាស្តីពី ការអប់រំ «ភាសាចិន និង ជំនាញវិជ្ជាជីវៈ» ក្នុងប្រទេសអាស៊ាន ឆ្នាំ២០២៥ ធ្វើ​ឡើង​ក្រោមប្រធានបទ «ការបង្កើតស្តង់ដា និងការបណ្តុះធនធានទេពកោសល្យរួមគ្នា» គឺជាមាគ៌ារួមបញ្ចូលគ្នារវាងការអប់រំភាសាចិន និងការអប់រំជំនាញវិជ្ជាជីវៈ ដើម្បីលើកកម្ពស់សហប្រតិបត្តិការស៊ីជម្រៅ និងការអភិវឌ្ឍរួមគ្នា ក្នុងវិស័យអប់រំរវាងបណ្តាប្រទេសជាសមាជិកអាស៊ាន និងសាធារណរដ្ឋប្រជាមានិតចិន៕