ការរក្សាទម្ងន់កំឡុងពេលវិស្សមកាល អាចជាសកម្មភាពដ៏លំបាកមួយ ហើយរឹតតែពិបាកនោះគឺចំពេលដែលមានកម្មវិធីជួបជុំច្រើន ដែលតម្រូវឱ្យ​បរិភោគនៅខាងក្រៅច្រើន ដូច្នេះគឺមានភាពចាំបាច់ណាស់នៅក្នុងការរក្សាតុល្យភាពនៃការបរិភោគ។ តាមរយៈ Piedmont បង្ហាញគន្លឹះប្រាំចំណុចដើម្បីរក្សាទម្ងន់ឱ្យមានតុល្យភាព ខណៈស្ថិតក្នុងបរិយាកាស ដែលពោរពេញទៅដោយអាហារកុះករ។

១​. មានបែបបទ នៃការគ្រប់គ្រងខ្លួនឯង ៖ ប្រសិនបើនៅក្នុងកម្មវិធីជួបជុំដែលមានអាហារសម្បូរបែប ក្នុងការជ្រើសរើសមកទទួលទាន ជាដំបូងត្រូវប្រាកដថា អាហារដែលរៀបនៅក្នុងចានគួរមានពណ៌ចម្រុះលាយឡំគ្នា ដោយមានបន្លែបង្ការប្រមាណជាង៥០ភាគរយនៅក្នុងចាន ហើយផ្លែឈើ២៥ភាគរយ រួមទាំងប្រភេទគ្រាប់ធញ្ញជាតិចំនួន២៥ភាគរយ។

២. ញ៉ាំឱ្យហើយមុនពេលទៅកម្មវិធី ៖ ជាចំណុចមួយដែលមិនគួរមើលរំលងដែរ ជាការពិតមួយការចេញទៅខាងក្រៅ ជួបមនុស្សម្នាច្រើន គឺត្រូវការថាមពល ដូច្នេះវាពិបាកនឹងទប់ចិត្តមិនឱ្យបរិភោគអាហារ ខណៈខ្លួនឯងផ្ទាល់ក៏មិនមានជម្រើសគ្រប់ពេលក្នុងការចាប់យកអាហារដែលផ្តល់នូវសារធាតុចិញ្ចឹមរហូតដែរ។ ដូច្នេះការទទួលទានអាហារពីផ្ទះ អាចជួយទប់ចិត្តកុំឱ្យបរិភោគអាហារដែលមិនផ្តល់លទ្ធភាពទ្រទ្រង់ទៅកាន់សុខភាព។

៣. ជ្រើសរើសដោយភាពហ្មត់ចត់ ៖ ពេលដែលឈានជើងចូលទៅក្នុងកម្មវិធី និងក្រឡេកឃើញអាហារគ្រប់យ៉ាងនៅលើតុ នោះការជ្រើសរើសអាចនឹងមិនមានភាពងាយស្រួលប៉ុន្មាននោះទេ។ ដើម្បីរួមចំណែកដោះនូវចំណោទបញ្ហាក្នុងការជ្រើសរើស ដោយភាពហ្មត់ចត់ គឺផ្តោតទៅលើអាហារដែលមានពណ៌ ដោយបញ្ចៀសនូវសារធាតុផ្អែមខ្លាំង និងអាហារចៀនបំពងជាដើម។ បំពេញអាហារក្នុងចានដោយមានពណ៌បៃតង ផ្លែឈើ ឬក៏អាហារមានជាតិប្រូតេអីន បន្ទាប់មករើសតែមួយ ឬពីរប្រភេទអាហារប៉ុណ្ណោះដែលចង់ញ៉ាំ បើទោះបីជាអាហារចៀនក៏ដោយ ឱ្យតែព្យាយាមក្នុងចំនួនតិច។

៤. ពិនិត្យជាតិអាល់កុលដែលកំពុងពិសា ៖ កាឡូរីដែលទទួលបានពីអាល់កុល មានឥទ្ធិលពលលឿនរហ័សជំរុញឱ្យទម្ងន់ឡើងលឿន ដូច្នេះព្យាយាមពិសាទឹកឱ្យបានច្រើនដើម្បីទប់ចិត្តក្នុងការជ្រើសយកភេសជ្ជៈ ដែលបង្កបាននូវសារធាតុធ្វើឱ្យទម្ងន់មិនមានតុល្យភាព។ ហើយផ្លូវដើម្បីទៅរកការរក្សាទម្ងន់ឱ្យស្របតាមការចង់បានរបស់ខ្លួន មិនមែនដោយការជ្រើសយកភេសជ្ជៈ និងអាហារដែលមានជាតិកាឡូរីខ្ពស់នោះទេ។

៥. ត្រូវតែមានពេលហាត់ប្រាណ ៖ ការជួបជុំគ្នា បើអាចគួរតែទៅដើរនិយាយគ្នាលេង ជំនួសឱ្យការទៅជួបជុំបរិភាគអាហារ ឬក៏យ៉ាងហោចណាស់ប្រើប្រាស់ពេលប្រមាណ១៥០នាទីក្នុងការពង្រឹងសាច់ដុំ ដោយការដាក់គោលដៅជាក់ទៅក្នុងកាលវិភាគ និងធ្វើវាឱ្យទៅជាទម្លាប់ប្រចាំថ្ងៃ៕