ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងបាឋកថាពិសេស សម្រាប់អន្តរជាតិសម្រាប់យុវជន ឆ្នាំ២០២៤ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី និងជារដ្ឋមន្រ្តីក្រសួងអប់រំ យុវជន និងកីឡា បានលើកឡើងថា គោលដៅនៃការអប់រំ គឺធ្វើយ៉ាងណាឱ្យការអប់រំនោះ ឆ្លើយតបទៅនឹងតម្រូវការ នៃការអភិវឌ្ឍប្រទេសជាតិ, ដូច្នេះហើយ សម្រាប់គោលដៅអប់រំរបស់កម្ពុជា គឺត្រូវផ្តល់ឱ្យយុវជននូវបំណិនសតវត្សរ៍ទី២១ ចំណេះដឹង ដើម្បីចូលរួមចំណែកជាធនធានមនុស្សប្រកបដោយសក្តានុពល ដើម្បីអភិវឌ្ឍប្រទេសជាតិ។
បើតាមប្រសាសន៍របស់ឯកឧត្តមបណ្ឌិតសភាចារ្យ ប្រសិនបើមិនមានធនធានមនុស្សប្រកបដោយគុណភាពទេ ប្រទេសនានាលើពិភពលោកគឺមិនអាចអភិវឌ្ឍប្រទេសបានឡើយ។ ឯកឧត្តមថា ប្រទេសមួយដែលជាមហាអំណាច គឺជាប្រទេសដែលសម្បូរដោយធនធានមនុស្ស ដែលមានលក្ខខណ្ឌចាំបាច់សម្រាប់ទាក់ទាញក្រុមហ៊ុន ទាក់ទាញនូវប្រព័ន្ធអេកូឡូហ្ស៊ី ដើម្បីអភិវឌ្ឍ ។ ឯកឧត្តមរដ្ឋមន្រ្តីក៏បានបញ្ជាក់ដែរថា ជាការពិត ក៏មានធនធានផ្សេងទៀតដូចជាធនធានធម្មជាតិ ប្រព័ន្ធអភិបាលកិច្ចជាដើម ប៉ុន្តែបើមិនមានធនធានមនុស្ស ប្រទេសនោះក៏មិនអាចអភិវឌ្ឍបានដែរ ដោយជាឧទាហរណ៍ប្រទេសខ្លះមិនមានធនធានធម្មជាតិ ដូចជាជប៉ុន កូរ៉េខាងត្បូង ឬក៏សឹង្ហបុរីជាដើម ដែលមិនមានធនធានធម្មជាតិសម្បូរបែប តែប្រទេសទាំងនោះមានធនធានមនុស្ស និងប្រព័ន្ធអភិបាលកិច្ច ទើបនាំមកនូវជោគជ័យក្នុងការអភិវឌ្ឍ។
យ៉ាងណាក៏ដោយ បើតាមប្រសាសន៍របស់ ឯកឧត្តម ហង់ជួន ណារ៉ុន ដើម្បីសម្រេចបាននូវគោលដៅ នៃការអប់រំ បង្កើតធនធានមនុស្ស មានមធ្យោបាយជាច្រើន ប៉ុន្តែក្នុងចំណោមនោះ ក៏មានការលើកកម្ពស់គុណភាពអប់រំ ដែលមានកត្តាទាំង៤ គឺកត្តាសាលារៀន កត្តាគ្រូបង្រៀន កត្តាសិស្ស និងកត្តាគាំទ្ររបស់គ្រួសារ រួមទាំងវិធីសាស្រ្តផ្សេងៗ ដូចជាការបង្កើតសាលារៀនជំនាន់ថ្មី សាលារៀនគំរូ ក៏ដូចជាការពង្រឹងអភិបាលកិច្ចប្រព័ន្ធអប់រំ អភិបាលកិច្ចសាលារៀន ការចូលរួមរបស់មាតាបិតា និងវិធីសាស្រ្តផ្សេងទៀតដើម្បីសម្រេចបាននូវចក្ខុវិស័យ។
យ៉ាងណាមិញ បើតាមការបញ្ជាក់របស់ឯកឧត្តមរដ្ឋមន្រ្តី ដើម្បីឈានទៅអភិវឌ្ឍប្រទេសបាន ក៏ត្រូវមានលក្ខខណ្ឌសំខាន់ គឺត្រូវមានសុខសន្តិភាព មានសាមគ្គីភាព ឯកភាពជាតិ ហើយក៏ត្រូវមានការដឹកនាំប្រកបដោយគតិបណ្ឌិត ក៏ដូចជាចីរភាពរបស់រដ្ឋាភិបាល, ក្នុងន័យនេះ សម្តេចធិបតី ហ៊ុន ម៉ាណែត នឹងបន្តការដឹកនាំនេះ ដើម្បីនាំកម្ពុជាឆ្ពោះទៅរកភាពសម្បូររុងរឿង៕
