គណៈកម្មការវាយតម្លៃលទ្ធផលបេក្ខជន នៃកម្មវិធីប្រកួតប្រជែងគំនិតបង្កើតថ្មី កម្ពុជា ៤.០ រដូវកាលទី ៤ បានបង្ហាញអំពីសារៈសំខាន់ នៃការធ្វើបទបង្ហាញជាសាធារណៈ និងការពង្រឹងភាពភាពក្លាហានរបស់យុវជនសម័យនេះ ទៅកាន់យុវជនជំនាន់ក្រោយៗ។

ធម្មទានាចារ្យ ស៊ាង លាប  អ្នកចិត្តសាស្រ្ត និងជាអ្នកសម្របសម្រួលគម្រោងនៃអង្គការចិត្តសង្គម អន្តរវប្បធម៌ បានឱ្យដឹងថា បេក្ខជនមានភាពក្លាហាន ហើយភាពក្លាហានសំខាន់ណាស់ ពីព្រោះថា នៅក្នុងចិត្តសាស្រ្ត ពាក្យពីរមាត់ ដែលកំណត់ជោគវាសនារបស់យើងគឺ ការជឿជាក់លើខ្លួនឯង និងការឱ្យតម្លៃខ្លួនឯង។

នៅពេលនិយាយ បើយើងផ្តោតតែទៅលើខ្លួន​ឯងពេក នោះយើងនឹងបាត់សិល្បៈ។ ពេលដែលយើងឡើងមកលើឆាក យើងត្រូវស្រមៃថា យើងគឺជាអ្នកចម្រៀង អ៊ីចឹងពេលដែលយើងច្រៀង ឬពេលដែលយើងនិយាយ ហើយផ្តោតត្រឹមខួរក្បាល វាមិនធ្វើឱ្យការនិយាយអាចអង្រួនបេះដូងទស្សនិកជនបាននោះទេ ។

ធម្មទានាចារ្យ ស៊ាង លាប  អ្នកចិត្តសាស្រ្ត និងជាអ្នកសម្របសម្រួលគម្រោងនៃអង្គការចិត្តសង្គម

ចំណែក លោក លឹម តូនី អ្នកស្រាវជ្រាវ នៃមជ្ឈមណ្ឌលកម្ពុជា ៤.០ បានបន្ថែមថា បើផ្តោតទៅលើទ្រឹស្ដី និងការប្រើប្រាស់ចំណេះដឹងពេក នោះមិនអាចទទួលបានជោគជ័យក្នុងកាធ្វើបទបង្ហាញជាសាធារណៈនោះទេ។ បេក្ខជន គួរតែមានរួមបញ្ចូលគ្នា រវាងទ្រឹស្ដី ហើយនឹងការអនុវត្តន៍ឱ្យមានភាពទូលាយ រួមទាំងការលើកយកករណីសិក្សា ឬក៏ចំណុចដែលអាចដាក់ឱ្យប្រើប្រាស់បានក្នុងសង្គមបច្ចុប្បន្ន។

ខ្ញុំចង់ឱ្យ បេក្ខជន ចែករំលែកគំនិតដែលមានទៅកាន់យុវជនដទៃទៀត ដើម្បីលើកទឹកចិត្តឱ្យពួកគេ ក្នុងការបង្កើនទំនុកចិត្ត រួមទាំងពង្រឹងសមត្ថភាពបន្ថែមក្នុងការចូលមកប្រឡងនាឱកាសក្រោយ។

លោក លឹម តូនី អ្នកស្រាវជ្រាវនៃមជ្ឈមណ្ឌលកម្ពុជា ៤.០

លោក អ៊ុំ វ័ណថារិទ្ធ អ្នកជំនាញអភិវឌ្ឍធុរកិច្ចថ្មីជាន់ខ្ពស់ នៃមជ្ឈមណ្ឌលកម្ពុជា ៤.០ បណ្តុះធុរកិច្ចថ្មី “តេជោ” បន្ថែមថា បើយើងចង់ទទួលបានសុខភាពល្អ គឺទាល់តែបរិភោគអាហារដែលមានជីវជាតិ ឬពាក់ព័ន្ធនឹងសុខភាព។ ហើយចំពោះការទទួលបានព័ត៌មានក៏ដូចគ្នា បើយើងមិនចេះជ្រើសយកព័ត៌មានដែលល្អ មិនចេះវិភាគ ផ្ទៀងផ្ទាត់ វាបង្ហាញឱ្យឃើញថា យើងកំពុងរស់នៅក្នុងរូបភាពមួយអវិជ្ជមាន ។

ខ្ញុំមានសុទិដ្ឋិនិយមខ្ពស់ ដោយសារតែខ្ញុំមានគ្រួសារ មានកូនស្រីកូនប្រុស​ ដូច្នេះហើយ បេក្ខជនជាគំរូថ្មី អ៊ីចឹង! អ្នកទាំងអស់គ្នានឹងហើយ ជាអ្វីដែលខ្ញុំអាចឱ្យកូនប្រុសស្រីខ្ញុំរៀនតាម នៅជំហានបន្ទាប់។

លោក អ៊ុំ វ័ណថារិទ្ធ អ្នកជំនាញអភិវឌ្ឍធុរកិច្ចថ្មីជាន់ខ្ពស់នៃមជ្ឈមណ្ឌលកម្ពុជា ៤.០ បណ្តុះធុរកិច្ចថ្មី “តេជោ“

ជាយោបល់បន្ថែម កញ្ញា ថូ ម៉ុនីហ្សា អ្នកស្រាវជ្រាវនៃមជ្ឈមណ្ឌលកម្ពុជា ៤.០  បានឱ្យដឹងថា ការខិតខំប្រឹងប្រែង វាបានបង្ហាញអំពីឆន្ទៈ និងការតស៊ូ ហើយកម្មវិធីនេះ ជួយបង្កើនសមត្ថភាព ក៏ដូចជា ចំណេះដឹងដល់អ្នកទាំងអស់គ្នា មិនត្រឹមតែទាក់ទងទៅនឹងប្រធានបទផ្ទាល់ សុខភាពផ្លូវចិត្ត និងសុខមាលភាពនោះទេ។ ប៉ុន្តែគឺអាចជួយបង្កើនសមត្ថភាពអ្នកទាំងអស់គ្នា បង្កើនភាពក្លាហាន ក្នុងការធ្វើបទបង្ហាញជាសាធារណៈ៕