ភ្នំពេញ – មហោស្រពអក្សរសិល្ប៍ខ្មែរលើកទី៦ ចាប់ផ្ដើមទទួលស្នាដៃប្រកួតប្រជែងអក្សរសិល្ប៍ ក្រោមប្រធានបទ “សំឡេងចម្រុះពណ៌” ផ្នែករឿងខ្លី និងកំណាព្យ ចាប់ពីថ្ងៃនេះតទៅ រហូតដល់ ថ្ងៃទី១០ ខែកញ្ញា ឆ្នាំ២០២៣។

លោក ចេង រតនា​ ​អ្នកសម្របសម្រួលកម្មវិធីប្រកួតប្រជែងអក្សរសិល្ប៍នៃមហោស្រពអក្សរសិល្ប៍ខ្មែរលើកទី៦ មានប្រសាសន៍ថា ការ​ប្រកួតប្រជែងស្នាដៃអក្សរសិល្ប៍នេះ ធ្វើឡើងដើម្បីចូលរួមលើកកម្ពស់វិស័យអក្សរសាស្ត្រ អក្សរសិល្ប៍ជាតិ ក៏ដូចជាលើកទឹកចិត្តដល់កវី អ្នកនិពន្ធវ័យក្មេងដែលចង់បង្ហាញសមត្ថភាពផ្នែកតែងនិពន្ធ។ ជាពិសេស ចង់លើកទឹកចិត្តដល់អ្នកដែលពុំធ្លាប់ដាក់ស្នាដៃចូលរួមប្រកួតប្រជែងកន្លងមកឱ្យចូលរួម ព្រមទាំងចង់ឃើញស្នាដៃច្នៃប្រតិដ្ឋថ្មីៗពីកវី និងអ្នកនិពន្ធខ្មែរគ្រប់ជំនាន់ផងដែរ។

លោក រតនា បន្ថែមថា ស្នាដៃដែលបេក្ខជនដាក់ចូលរួមប្រកួត ចាំបាច់ត្រូវគោរពទៅតាមគ្រប់លក្ខខណ្ឌទាំងអស់នៃកម្មវិធី ទាំងចំនួនទំព័រ ទំហំអក្សរ ការឆ្លើយតបទៅនឹងប្រធានបទ ជាស្នាដៃដែលមិនធ្លាប់ចូលរួមប្រឡង ឬបោះពុម្ពផ្សាយ ឆ្លងកាត់ការត្រួតពិនិត្យអក្ខរាវិរុទ្ធរួចរាល់ជាដើម។ លោកបន្តថា ប្រធានបទ “សំឡេងចម្រុះពណ៌” សំដៅលើស្នាដៃដែលអាចលើកឡើងពីសំឡេងអ្វីក៏បាន ជាពិសេស សំឡេងដែលមិនសូវមានអ្នកឮ ឬយកចិត្តទុកដាក់ស្ដាប់ តួយ៉ាងដូចជា រឿងអយុត្តិធម៌ ជាដើម។ អាចជាសំឡេងធម្មជាតិ មនុស្ស សត្វ ឬអ្វីផ្សេងទៀតដែលកើតចេញពីការស្រមើស្រមៃរបស់អ្នកនិពន្ធ ឬក៏អាចជាសំឡេងរបស់អ្នកនិពន្ធផ្ទាល់តែម្ដង។ ជាទូទៅ មហោស្រពនឹងជ្រើសតាំងគណៈកម្មការវិនិច្ឆ័យពិនិត្យ និងដាក់ពិន្ទុទៅលើស្នាដៃបេក្ខជនដោយសុក្រឹត ពោលគឺគណៈកម្មការពុំដឹងថាស្នាដៃណាជារបស់បេក្ខជនរូបណានោះឡើយ។

លោក ចេង រតនា​ ​អ្នកសម្របសម្រួលកម្មវិធីប្រកួតប្រជែងអក្សរសិល្ប៍នៃមហោស្រពអក្សរសិល្ប៍ខ្មែរលើកទី៦

“ឆ្នាំទៅ យើងទទួលបានស្នាដៃដាក់ប្រកួតចំនួនជិត ២០០ ហើយឆ្នាំនេះ យើងរំពឹងថា នឹងទទួលបានស្នាដៃដាក់ប្រកួតលើសពី ២០០ស្នាដៃ”

អ្នកសម្របសម្រួលកម្មវិធីប្រកួតប្រជែងអក្សរសិល្ប៍ នៃមហោស្រពអក្សរសិល្ប៍ខ្មែរលើកទី៦ ក៏បានលើកទឹកចិត្តឱ្យមហាជន ជាពិសេសអ្នកដែលមានចំណង់ចំណូលចិត្តផ្នែកតែងនិពន្ធ សូមមានចិត្តក្លាហានឡើង និងសាកល្បងដាក់ស្នាដៃប្រកួតរបស់ខ្លួន។ លោកថា បើមិនសាកល្បង យើងមិនដឹងថា សមត្ថភាពយើងបានដល់កម្រិតណា? ទោះបីបរាជ័យ ក៏យើងអាចសម្រេចបានជាស្នាដៃមួយ និងអាចស្គាល់ពីចំណុចខ្វះខាតដើម្បីឱ្យមានការអភិវឌ្ឍទៅថ្ងៃក្រោយ។ លើសពីនេះ សូមចូលរួមជួយចែករំលែក និងគាំទ្រកម្មវិធីនេះឱ្យបានច្រើនតាមដែលអាចធ្វើទៅបាន ព្រោះនេះគឺជាការចូលរួមលើកស្ទួយវិស័យអក្សរសាស្ត្រ និងអក្សរសិល្ប៍របស់ជាតិយើង។

សូមបញ្ជាក់ថា សម្រាប់វិញ្ញាសារឿងខ្លី ដែលត្រូវ​ដាក់ចូលរួមប្រកួត បេក្ខជនតម្រូវឱ្យ​សរសេរសំណេរចន្លោះពី ៥ ដល់ ៨ ទំព័រ នៃក្រដាស A4ទំហំ 12pt (Khmer OS SiemReap)។ ផ្នែកកំណាព្យ សំណេរបេក្ខជនមិនត្រូវលើសពី ៣ ទំព័រ នៃក្រដាស A4 ទំហំ 12pt (Khmer OS SiemReap)។ សម្រាប់វិញ្ញាសាទាំងពីរនេះ បេក្ខជនម្នាក់អាចដាក់បាន ២ ចំណងជើង។

ចំពោះអត្ថប្រយោជន៍ដែលទទួលបាន សម្រាប់ជ័យលាភីលេខ ១ ទទួលបានទឹកប្រាក់ ៨សែនរៀល និងប័ណ្ណសរសើរ, ជ័យលាភីលេខ ២ ទទួលបានទឹកប្រាក់ ៦សែនរៀល និងប័ណ្ណសរសើរ,ជ័យលាភីលេខ ៣ ទទួលបានទឹកប្រាក់ ៤សែនរៀល និងប័ណ្ណសរសើរ។ ក្នុងនោះ បេក្ខជនជ័យលាភីនឹងត្រូវបានអញ្ជើញឱ្យចូលរួមក្នុងមហោស្រពអក្សរសិល្ប៍ខ្មែរលើកទី៦។

បេក្ខជនទាំងពីរភេទដែលចាប់អារម្មណ៍ដាក់ប្រកួតស្នាដៃអក្សរសិល្ប៍ សូមផ្ញើស្នាដៃមកកាន់អ៊ីមែល [email protected]   ឬប្រអប់សាររបស់ទំព័រហ្វេសប៊ុក មហោស្រពអក្សរសិល្ប៍ខ្មែរ Khmer Literature Festival ។ សម្រាប់គម្រូស្នាដៃជ័យលាភីរឿងខ្លីនិងកំណាព្យ តាមរយៈតំណភ្ជាប់ https://bit.ly/KLFStoriesPoetriesSamples ៕