អង្គការស៊ីប៉ា (Sipar) ចេញផ្សាយរបាយការណ៍របស់ខ្លួននាពេលថ្មីៗនេះ បានឱ្យដឹងថា អង្គការស៊ីប៉ាបានដំណើរការបណ្ណាល័យចល័តរបស់ខ្លួនចំនួន ១០៤ទីកន្លែងជារៀងរាល់សប្តាហ៍ និងបានផ្តល់ផលដល់អ្នកអានជាង ១ម៉ឺនប្រាំពាន់នាក់នៅតាមខេត្តគោលដៅទាំងប្រាំពីរដែលកំពុងធ្វើដំណើរការ ។ បណ្ណាល័យបានជួយឱ្យកុមារ ក្មេងជំទង់ និងមនុស្សពេញវ័យ មានលទ្ធភាពរៀនបំប៉នជាប្រចាំលើមុខវិជ្ជាសំខាន់ៗ ដូចជា គណិតវិទ្យា និងភាសាខ្មែរ ។

បណ្ណាល័យចល័តរបស់អង្គការស៊ីប៉ាមានចំនួន១៤ រួមមានបណ្ណាល័យរថយន្តចំនួន ០៩, តុកតុកចំនួន ០៣, បណ្ណាល័យកាណូតចំនួន ០១, និងបណ្ណាល័យម៉ូតូចំនួន ០១ ។ សកម្មភាពទូទៅរបស់បណ្ណាល័យចល័ត ចាប់ផ្តើមដោយការនិទានរឿង និងអំណានសេរី ល្បែងអប់រំ និងច្នៃប្រតិដ្ឋ និងបញ្ចប់ដោយការខ្ចីសងសៀវភៅ ។ ថ្មីៗនេះ ក្រុមការងារបណ្ណាល័យចល័តបានរៀបចំថ្នាក់បំប៉នរៀងរាល់សប្តាហ៍លើមុខវិជ្ជាសំខាន់ៗដូចជា ភាសាខ្មែរ និងគណិតវិទ្យា ។

ស្របជាមួយសកម្មភាពអំណាន ក្រុមការងារបណ្ណាល័យចល័តក៏រៀបចំវគ្គយល់ដឹងលើប្រធានបទសំខាន់ៗ ដូចជាការអប់រំសុខភាព និងអាហារូបត្ថម្ភ សុវត្ថិភាពចរាចរណ៍ ការអប់រំកម្មវិធីបរិយាបន្នសម្រាប់អ្នករស់នៅជាមួយពិការភាព យោគៈ និងសមាធិ បរិស្ថាន និងស្ទីម (STEAM – វិទ្យាសាស្ត្រ បច្ចេកវិទ្យា វិស្វកម្ម សិល្បៈ និងគណិតវិទ្យា) ។ បណ្ណាល័យចល័តចំនួនបួនមានឯកទេសលើប្រធានបទទាំងនេះ ដើម្បីលើកកម្ពស់ការយល់ដឹងក្នុងចំណោមកុមារ ក្មេង ជំទង់ និងមនុស្សពេញវ័យ ។

អង្គការស៊ីប៉ាបានឱ្យដឹងថា ស៊ីប៉ាបានបង្កើតបណ្ណាល័យខ្នាតតូចនៅតាមភូមិ ដើម្បីធានាបាននូវ និរន្តរភាពនៃបេសកកម្ម ដោយធ្វើការយ៉ាងជិតស្និទ្ធជាមួយអ្នកស្ម័គ្រចិត្តក្នុងសហគមន៍ ។ បណ្ណាល័យខ្នាតតូចចំនួន៣៤ មានសៀវភៅសរុបចំនួន ២ប្រាំមួយពាន់ក្បាលត្រូវបានដាក់ឱ្យដំណើរការ និងគ្រប់គ្រងដោយអ្នកស្ម័គ្រចិត្តក្នុងសហគមន៍ ។ ក្រុមការងារស៊ីប៉ាផ្ដល់ការគាំទ្រផ្នែកបច្ចេកទេសសម្រាប់ការគ្រប់គ្រងបណ្ណាល័យ និងបច្ចេកទេសផ្នែកនិទានរឿង ក៏ដូចជាការលើកកម្ពស់ការយល់ដឹងលើប្រធានបទផ្សេង ។

គួរបញ្ជាក់ថា បើតាមអង្គការស៊ីប៉ា លទ្ធភាពទទួលបានសៀវភៅ និងចំណេះដឹងសម្រាប់សហគមន៍នៅជាយក្រុងភ្នំពេញ និងជនបទនៅមានកម្រិតនៅឡើយ ដោយខ្វះហេដ្ឋារចនាសម្ព័ន្ធអប់រំ ដូចជាបណ្ណាល័យសាធារណៈជាដើម ។ ចាប់តាំងពីឆ្នាំ២០០០ កម្មវិធីបណ្ណាល័យចល័តរបស់ស៊ីប៉ាបានចាប់ផ្ដើមដំណើការដោយនាំយកសកម្មភាពអំណាន សំណេរ និងសៀវភៅទៅដល់កុមារ ព្រមទាំងផ្តល់ការអប់រំ និងការលើកកម្ពស់ការយល់ដឹងអំពីបញ្ហាសង្គមផ្សេងៗ៕