ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសជួបសំណេះសំណាលជាមួយបងប្អូនកម្មករនិយោជិតមកពីបណ្តារោងចក្រក្នុងស្រុកកណ្តាលស្ទឹង និងក្រុងតាខ្មៅ នាព្រឹកថ្ងៃទី០២ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើកទឹកចិត្តដល់បងប្អូន រៀនជំនាញបន្ថែមដើម្បីបង្កើនសមត្ថភាពវិជ្ជាជីវៈ។
សម្តេចធិបតីមានប្រសាសន៍ថា កម្មវិធីបណ្តុះបណ្តាលយុវជន១លាន៥សែននាក់ បើនិយាយទៅគឺផ្តោតទៅលើបងប្អូនកូនចៅប្រជាពលរដ្ឋក្រីក្រ និងងាយរងហានិភ័យ ប៉ុន្តែជាមួយគ្នានេះ បងប្អូនកម្មករកម្មការិនី បងប្អូននៅក្នុងសេដ្ឋកិច្ចក្រៅប្រព័ន្ធ ក៏ទទួលបានការបណ្តុះបណ្តាលនេះដែរ។ តាមប្រសាសន៍របស់សម្តេចធិបតី នៅក្នុងរោងចក្រមួយបងប្អូនមិនបាច់ប្ដូរការងារក៏ដោយ តែបងប្អូនក៏អាចទទួលបណ្ដុះបណ្ដា លបន្ថែមនៅមុខជំនាញដើម្បីឡើងតួនាទី ឡើងសមត្ថភាព ឡើងប្រាក់ខែរបស់ខ្លួន ។ សម្ដេចធិបតីនាយករដ្ឋមន្រ្ដីបានអះអាងថា ការបណ្ដុះបណ្ដាលនេះគឺមិនបង់លុយទេ។
ជាមួយគ្នានេះ សម្តេចធិបតីក៏បានណែនាំដល់ក្រសួងការងារ និងបណ្តុះបណ្តាលវិជ្ជាជីវៈ រៀបចំកម្មវិធីបណ្តុះបណ្តាលប្រកបដោយភាពបត់បែន ពោលគឺផ្តល់ភាពងាយស្រួលដល់បងប្អូនកម្មករនិយោជិតអាចទទួលបានការបណ្តុះបណ្តាលដូចជាថ្ងៃចុងសប្តាហ៍ ឬក៏ការសិក្សានៅពេលយប់ជាដើម។
បើតាមប្រសាសន៍បញ្ជាក់របស់សម្តេចធិបតី ហ៊ុន ម៉ាណែត ការបណ្តុះបណ្តាលមានមុខជំនាញចំនួន៣៨ នៅក្នុងវិស័យចំនួន១០ដែលបងប្អូនអាចជ្រើសរើសបាន រួមមាន ៖ វិស័យសំណង់, អគ្គិសនី, អេឡិចត្រូនិច, បរិក្ខាក្តៅត្រជាក់, មេកានិកទូទៅ, មេកានិករថយន្ត, កសិកម្ម, កសិឧស្សាហកម្ម, ធុរកិច្ច និងបច្ចេកវិទ្យាព័ត៌មាន៕
