ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់ការបណ្តុះបណ្តាលជំនាញបច្ចេកទេស និងវិជ្ជាជីវៈ ទៅដល់យុវជន ក៏ដូចជាបងប្អូនប្រជាពលរដ្ឋ ចំនួន១លាន៥សែននាក់ ដែលគ្រោងនឹងប្រកាសឱ្យអនុវត្តនៅពេលដ៏ខ្លីខាងមុខនេះ សម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា ការបណ្តុះបណ្តាលជំនាញបច្ចេកទេស និងវិជ្ជាជីវៈ សម្រាប់យុវជន ក៏ដូចជាប្រជាពលរដ្ឋ គួរធ្វើឱ្យចំគោលដៅ ពោលគឺធ្វើយ៉ាងណាឱ្យស្របទៅនឹងស្ថានភាពភូមិសាស្រ្តមូលដ្ឋាន។
ក្នុងជំនួបជាមួយបងប្អូនកម្មករ និយោជិត ជិត២ម៉ឺននាក់នៅក្រុងតាខ្មៅ នាព្រឹកថ្ងៃទី២ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត មានប្រសាសន៍ថា ការបណ្តុះបណ្តាលជំនាញវិជ្ជាជីវៈ គួរតែឆ្លើយតបទៅនឹងមូលដ្ឋាន ដើម្បីប្រជាពលរដ្ឋ ក៏ដូចជាយុវជនពេលរៀនចប់ ពួកគេអាចធ្វើការងារនៅមូលដ្ឋានរបស់ពួកគេបាន ស្របទៅនឹងកិច្ចខិតខំប្រឹងប្រែងរបស់រាជរដ្ឋាភិបាលដែលខំរុញការងារឱ្យដល់មូលដ្ឋានដូច្នោះដែរ ។
ឧទាហរណ៍នៅពោធិ៍សាត់ ដែលគ្រោងតម្លើងរោងចក្រមានបច្ចេកវិទ្យា យើងបើកវគ្គបណ្តុះបណ្តាលជំនាញបច្ចេកវិទ្យាសម្រាប់រោងចក្រនៅទីនោះ… យើងខំរុញការងារឱ្យដល់មូលដ្ឋាន ដើម្បីអ្នកមូលដ្ឋាន អញ្ចឹងការបណ្តុះបណ្តាលរបស់យើងឱ្យចំស្របជាមួយនឹងការងារ…
សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា
សម្តេចធិបតីមានប្រសាសន៍បញ្ជាក់ថា ការបណ្តុះបណ្តាលជំនាញស្របតាមភូមិសាស្រ្តមូលដ្ឋាន គឺលើកទឹកចិត្តដល់អ្នកនៅមូលដ្ឋាន ក៏ដូចជាខេត្តនៅជុំវិញ ដោយពួកគាត់មិនចាំបាច់ចល័តច្រើន នៅក្បែរផ្ទះងាយស្រួល មិនចាំបាច់ចំណាយថ្លៃផ្ទះជួល នៅក្បែរឪពុកម្តាយ ហើយអាចរក្សាកម្លាំងនៅមូលដ្ឋានបានទៀត។
ជាមួយគ្នានេះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តី ក៏បានណែនាំដល់ក្រសួងការងារ និងបណ្តុះបណ្តាលវិជ្ជាជីវៈ ធ្វើយ៉ាងណាការបណ្តុះបណ្តាលជំនាញវិជ្ជាជីវៈនេះ ត្រូវមានសមត្ថភាព គុណភាព ផលិតភាព និងឥរិយាបទការងារល្អ ដោយឈរលើទិសដៅ ចប់ ចេះ មានការងារ។
គួរជំរាបជូនដែរថា រាជរដ្ឋាភិបាលកម្ពុជាបានដាក់ចេញនូវគោលនយោបាយក្នុងការបណ្តុះបណ្តាលជំនាញបច្ចេកទេស និងវិជ្ជាជីវៈ ទៅដល់យុវជនមកពីគ្រួសារក្រីក្រ និងងាយរងហានិភ័យចំនួន១លាន៥សែននាក់ ដែលគ្រោងនឹងប្រកាសឱ្យអនុវត្តនៅថ្ងៃទី១៤ ខែវិច្ឆិកា ឆ្នាំ២០២៣ខាងមុខនេះ ។ ក្នុងនោះបើតាម ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានជំនាញចំនួន៣៨ នៅក្នុងវិស័យចំនួន១០ ដែលក្រសួងការងារនឹងផ្តោតធ្វើការបណ្តុះបណ្តាល ខណៈការវាយតម្លៃបានរកឃើញថា វិស័យទាំងនោះកំពុងមានតម្រូវការខ្លាំង៕
