ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា ការអប់រំនៅសាលា និងអប់រំនៅផ្ទះ ជាកត្តាសំខាន់ដើម្បីជួយលប់បំបាត់ឥទ្ធិពលសង្គមខាងក្រៅ។ សម្តេចវរធិបតី លើកឡើងបែបនេះ ក្នុងពិធីបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២២-២០២៣ និងទិសដៅឆ្នាំសិក្សា២០២៣-២០២៤ ។
បើតាមប្រសាសន៍សម្តេចមហាបវរធិបតី ហ៊ុន ម៉ាណែត ការអប់រំ មានចំនួន៣ប្រភេទ គឺការអប់រំនៅផ្ទះ ការអប់រំនៅសាលា និងការអប់រំនៅក្នុងសង្គម។ សម្តេចបន្តថា ប្រសិនបើសាលារៀនមានលោកគ្រូ អ្នកគ្រូ និងនៅផ្ទះមានឪពុកម្ដាយឯកភាពគ្នាពង្រឹងការអប់រំ នោះកត្តាសង្គមខាងក្រៅនឹងមិនអាចមានឥទ្ធិពលមកលើសិស្សានុសិស្ស ឬកូនៗបានឡើយ។
នាយករដ្ឋមន្រ្តី នៃព្រះរាជាណាចក្រកម្ពុជា សង្កត់ធ្ងន់ថា ការអប់រំរបស់ឪពុកម្ដាយ និងគ្រូង្រៀន ជាកត្តាកំណត់តម្លៃក្នុងខ្លួនមនុស្ស។ នេះមានន័យថា ប្រសិនបើមនុស្សម្នាក់ៗមានតម្លៃមួយច្បាស់លាស់ ដឹងថាអ្វីខុស អ្វីត្រូវ នោះយើងនឹងចេះយកគំរូតាមតែលើចំណុចល្អ ហើយចំណុចមិនល្អ មិនយកតាម ប៉ុន្តែបើមិនស្គាល់តម្លៃច្បាស់គឺពិបាក។
ជាមួយគ្នានេះដែរ សម្តេចធិបតី ក៏បានស្នើឱ្យគ្រប់ភាគីពាក់ព័ន្ធធ្វើយ៉ាងណាបង្កើនការគាំទ្រគ្នារវាងឪពុកម្ដាយ សហគមន៍ សាលារៀន គ្រូបង្រៀន ដែលហៅថា ភាពជាដៃគូរដ្ឋ និងសហគមន៍ ដើម្បីអប់រំមនុស្ស ដោយរដ្ឋតំណាងឱ្យសាលា ចូលរួមគាំទ្រពីមន្ទីរអប់រំ ការិយាល័យអប់រំ ចំណែក សហគមន៍ សំដៅលើមាតាបិតាសិស្ស ប្រជាពលរដ្ឋ សហការរួមគ្នាលើកកម្ពស់វិស័យអប់រំ។
គួរជម្រាបជូនថា ការបង្កើតទំនាក់ទំនងល្អរវាងមាតាបិតាសិស្ស និងគ្រូបង្រៀន ត្រូវគេមើលឃើញថា បានដើរតួនាទីយ៉ាងសំខាន់ក្នុងការជំរុញឱ្យមានបរិយាកាសអប់រំ និងគាំទ្រដល់ការសិក្សារបស់សិស្សឱ្យកាន់តែប្រសើរឡើង តាមរយៈការជួយគ្នាទៅវិញទៅមកក្នុងការអប់រំសិស្ស ក៏ដូចជាការលើកទឹកចិត្តកូនៗឱ្យខិតខំរៀនសូត្រជាដើម សំដៅដល់ការបង្កើនធនធានមនុស្សជំនាន់ថ្មី ដើម្បីចូលរួមចំណែកអភិវឌ្ឍប្រទេសជាតិឱ្យរីកចម្រើន៕
