ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅព្រឹកថ្ងៃអង្គារ ទី៩ ខែមករា ឆ្នាំ២០២៤ ក្នុងពិធីជួបសំណេះសំណាលជាមួយជាបេក្ខជននិទ្ទេស A សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានលើកទឹកចិត្តដល់ក្មួយៗសិស្សានុសិស្សទាំងអស់ដែលបានប្រឡងជាប់ សូមបន្តការសិក្សានៅកម្រិតឧត្តមសិក្សា ឬគ្រឹះស្ថានបណ្តុះបណ្តាលវិជ្ជាជីវៈ ដោយបន្តខិតខំប្រឹងប្រែងរៀននូវមុខជំនាញដែលខ្លួនបានជ្រើសរើស ដើម្បីក្លាយជាធនធានមនុស្សដ៏រឹងមាំសម្រាប់គ្រួសារ ពលរដ្ឋសាកល និងសម្រាប់មាតុភូមិជាទីស្នេហា នៃយើងទាំងអស់គ្នា សំដៅរួមចំណែកជំរុញសន្ទុះនៃការអភិវឌ្ឍសង្គមសេដ្ឋកិច្ច ឱ្យឈានសម្រេចបានចក្ខុវិស័យឆ្នាំ២០៥០។
សម្តេចធិបតីមានប្រសាសន៍ថា នៅផ្លូវបំបែកមួយនេះ មានក្មួយៗជាច្រើនពិបាកក្នុងការសម្រេចចិត្ត ហើយបានចោទជាសំណួរថា ជំនាញណា ល្អជាងជំនាញណា? សម្តេចធិបតីលើកឡើងថា គ្មានជំនាញណាអាក្រក់នោះទេ ហើយក៏គ្មានជំនាញណាល្អជាងជំនាញណាដែរ គឺអាស្រ័យលើអ្វីដែលយើងចង់បាន ក៏ដូចជាទិសដៅ ពោលគឺរៀនអ្វីក៏ដោយ រៀនឱ្យចេះ ឱ្យប្រាកដ។
…វាគ្មានជំនាញណាអាក្រក់ទេ ហើយគ្មានជំនាញណាល្អជាងជំនាញណាទេ អាស្រ័យលើអ្វីដែលយើងចង់បាន…ចេះអីក៏ដោយឱ្យតែប្រាកដ អ្វីក៏មានតម្លៃដែរ ការងារទាំងអស់គឺការងារថ្លៃថ្នូរ…
សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
សម្តេចធិបតី ក៏បានផ្តល់ដំបូន្មានដល់សិស្សានុសិស្សទាំងអស់គួររៀនដោយផ្សារភ្ជាប់ជាមួយការអនុវត្តជាក់ស្តែង ។ សម្តេចបញ្ជាក់ថា សញ្ញាបត្រ និងសញ្ញាឃើញ គឺត្រូវដើរជាមួយគ្នា ក្នុងនោះសញ្ញាបត្រជួយបើកទ្វារឱ្យក្មួយៗចូល ប៉ុន្តែសញ្ញាឃើញ គឺជាអ្វីជួយឱ្យក្មួយឡើងកាំជណ្តើរបាន។
ជាមួយគ្នានេះ សម្តេចនាយករដ្ឋមន្រ្តី ក៏បានផ្តល់អានុសាសន៍ ដល់ក្រសួងអប់រំ យុវជន និងកីឡា ពិនិត្យលទ្ធភាព បង្កើតកម្មវិធី និងសេវាប្រឹក្សាយោបល់ដល់សិស្សានុសិស្ស និងនិស្សិត នៅក្នុងការតម្រង់ទិសការជ្រើសរើសអាជីព និងមុខជំនាញ នៅតាមវិទ្យាល័យ និងគ្រឹះស្ថាន ឧត្តមសិក្សាដើម្បីជួយ តម្រង់ទិសនៃការសិក្សា របស់សិស្សានុសិស្សសំដៅបង្រួមឱ្យបានជាអប្បរមា នូវគម្លាតចំពោះការផ្គត់ផ្គង់ជំនាញ និងតម្រូវការជំនាញនៅក្នុងទីផ្សារការងារនៅកម្ពុជា៕
