នាឱកាសអញ្ជើញជួបសំណេះសំណាលជាមួយបងប្អូន កម្មករ និយោជិត ចំនួន ១៨ ១០៤នាក់ មកពីបណ្តារោងចក្រ សហគ្រាស មានមូលដ្ឋាននៅក្នុងស្រុកបាទី ខេត្តតាកែវ នាព្រឹកថ្ងៃអង្គារ​ ទី១៩ កញ្ញា​ ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍លើកទឹកចិត្តដល់ប្រជាពលរដ្ឋយកកូនឱ្យបានច្រើន ខណៈពិភពលោកកំពុងមានកង្វះខាតយុវជនជំនាន់ក្រោយ ស្របពេលការព្យាករណ៍រកឃើញថា នៅឆ្នាំ២០៥០កម្ពុជានឹងមានមនុស្សវ័យចាស់ច្រើន។

សម្ដេចធិបតី ហ៊ុន ម៉ាណែត មានប្រសាសន៍ថា បើតាមរបាយការណ៍របស់ក្រសួងផែនការបានព្យាករណ៍ថា ប្រទេសកម្ពុជានឹងក្លាយជាប្រទេសមានមនុស្សចាស់ច្រើន​នៅឆ្នាំ២០៥០។ ស្របគ្នានេះ សម្ដេចធិបតី ក៏បានស្នើឱ្យក្រសួងផែនការ និងក្រសួងពាក់ព័ន្ធទាំងអស់គិតគូរ និងពិនិត្យពិនិត្យមើលទិន្ន័យឡើងវិញ ប្រសិនមានភាពប្រាកដប្រជាចាប់ផ្ដើមវាយតម្លៃដោយត្រូវគិតគូរអំពីក្របខណ្ឌគោលនយោបាយប្រជាសាស្រ្តឡើងវិញ ព្រោះ២៧ឆ្នាំទៀតមិនយូរទេ ដើម្បីកុំឱ្យដល់ពេលនោះ កម្ពុជាចាប់ផ្ដើមបង្កើនសេដ្ឋកិច្ចខ្លាំង ស្រាប់តែប្រជាពលរដ្ឋចាប់ផ្ដើមមានអាយុច្រើន (មនុស្សចាស់) អ្នកកើតថ្មីតិច (មនុស្សវ័យក្មេង) ។

«ខ្ញុំគិតថាក្មេងៗរបស់យើងកម្លាំងនៅពេញនៅឡើយ អាចយកកូនច្រើនបាន តែយើងត្រូវគិតអំពីតុល្យភាពរវាងកំណើនសេដ្ឋកិច្ច និងប្រជាជន»។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា

នាយករដ្ឋមន្ត្រីកម្ពុជា បន្ថែមថា ប្រសិនជាត្រូវឱ្យប្រជាពលរដ្ឋកើនច្រើន គឺត្រូវចាប់ពីពេលនេះទៅ ដោយមិនរង់ចាំដល់ឆ្នាំ២០៥០មកដល់នោះឡើយ ព្រោះពេលនោះមិនមានអ្នកចង់មានកូនទេ គឺទី១. តម្លៃនៃការចិញ្ចឹមថ្លៃ និងទី២. របៀបរបបនៃការរស់នៅមិនចង់មានកូនច្រើន ។ ស្របគ្នានេះ នៅប្រទេសសឹង្ហបុរី ប្រទេសជប៉ុន ចំនួនមនុស្សចាប់ផ្ដើមថយចុះ ហើយប្រទេសបារាំង ចង់បង្កើនអាយុប្រជាជនចូលនិវត្តន៍ ព្រោះដោយសារអស់កម្លាំងពលកម្ម។ ដោយឡែក ប្រទេសចិនមានប្រជាជនច្រើន ប៉ុន្តែប្រជាជនវ័យចាស់ក៏ច្រើន ដោយសារពីដើមកំណត់យកកូនតែមួយ ប៉ុន្តែនៅពេលរដ្ឋាភិបាលអនុញ្ញតិឱ្យប្រជាជនមានសិទ្ធិយកកូនពីរឬកូនបី ក៏អត់មានអ្នកចង់បានកូនច្រើន។  

សម្ដេចធិបតី ហ៊ុន ម៉ាណែត បន្តថា តាមរយៈបទពិសោធន៍ទាំងមុន ទាំងក្រោយរបស់បណ្ដាប្រទេសជិតខាង កម្ពុជាចាំបាច់ត្រូវគិតគូរអំពីគោលនយោបាយដោយព្យាករណ៍ទុកឱ្យហើយ ដើម្បីធានាកម្រិតតុល្យភាពធនធានមនុស្ស កុំឱ្យហួសសមត្ថភាពចិញ្ចឹម ប៉ុន្តែកុំឱ្យដល់ពេល ២៥ឆ្នាំទៅ៣០ឆ្នាំក្រោយចាប់ផ្ដើមថយកម្លាំងពលកម្ម៕