ក្នុងឱកាស​ចូលរួមជាអធិបតីក្នុងពិធីប្រគល់សញ្ញាបត្រដល់និស្សិតសាកលវិទ្យាល័យធនធាន​មនុស្ស នាព្រឹកថ្ងៃទី២៦ ធ្នូ ឆ្នាំ​២០២៤ សម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានលើកទឹកចិត្ត​ដល់គ្រឹះស្ថានឧត្តមសិក្សា​ទាំងអស់ បន្ត​ចូលរួម​លើក​កម្ពស់​គុណភាពអប់រំ បណ្តុះបណ្តាល​នៅ​កម្រិត​ឧត្តមសិក្សា​ឱ្យ​កាន់តែប្រសើរ​ឡើងថែមទៀត ដើម្បី​ចូលរួម​ចំណែក​ក្នុងការ​កសាង​មូលធន​មនុស្ស​ឱ្យ​កាន់តែខ្ពស់។

សម្តេចធិបតី ហ៊ុន ម៉ាណែត មានប្រសាសន៍ថា ជាការពិត គ្រឹះស្ថានអប់រំគឺជាថ្នាលបណ្តុះធនធានបញ្ញាញាណ, បណ្តុះមនសិការស្នេហាជាតិ និងបណ្តុះ​លក្ខ​ណៈ​សម្បត្តិសមស្របដល់យុវជនគ្រប់ៗជំនាន់ ឱ្យក្លាយជាសសរ​ទ្រូង និងជាអ្នកបន្តវេនក្នុងការអភិវឌ្ឍប្រទេសជាតិ ក្នុងយុគនៃការកសាងកំណើន សេដ្ឋកិច្ច ដែលពឹងផ្អែកលើចំណេះដឹង។ ជាពិសេសបណ្តុះបណ្តាល​និស្សិត​ឱ្យឆ្លើយតបតម្រូវការទីផ្សារការងារសម្រាប់ស្ថាប័នរដ្ឋ និង ឯកជន ស្របតាមគោលដៅអភិវឌ្ឍប្រកបដោយចីរភាព និង ទស្សនវិស័យអភិវឌ្ឍ​កម្ពុជាទៅស្របតាមចក្ខុវិស័យកម្ពុជា២០៥០។

ក្នុងន័យនេះ រាជរដ្ឋាភិបាល ជានិច្ចជា​កាល តែងតែយកចិត្តទុកដាក់, ឱ្យតម្លៃខ្ពស់ និងផ្ដល់អាទិភាពដល់វិស័យ អប់រំ ដែលដើរតួនាទីស្នូល ក្នុងការអភិវឌ្ឍធនធានមនុស្សដ៏មានតម្លៃខ្ពស់, មានគុណភាព ផ្តល់ចំណេះដឹង សមត្ថភាព ជំនាញវិជ្ជាជីវៈ គំនិតនវានុវត្តន៍ និង ការអប់រំអត្តចរិត ឱ្យក្លាយជាពលរដ្ឋល្អ ដែលជាមូលដ្ឋានគ្រឹះ​នៃការ​អភិ​វឌ្ឍជាតិលើគ្រប់វិស័យ ព្រមទាំងលើកកម្ពស់វប្បធម៌, អរិយធម៌, កិត្តិយស, កិត្យានុភាព និងមោទនភាពជាតិ។

សម្តេចនាយករដ្ឋមន្រ្តីបញ្ជាក់ថា ដើម្បីកសាងមូល​ដ្ឋាន​គ្រឹះ​ឆ្ពោះទៅសម្រេចចក្ខុវិស័យអប់រំ រាជរដ្ឋាភិបាល បានបន្តអនុវត្តយុទ្ធសាស្រ្ត​កសាង និងអភិវឌ្ឍប្រទេសជាតិ តាមរយៈការដាក់ចេញនូវ យុទ្ធសាស្រ្ត​បញ្ច​កោណ-ដំណាក់កាលទី ១ដោយកំណត់យកបញ្ចកោណទី១ ការអភិវឌ្ឍធន​ធានមនុស្ស ជាយុទ្ធសាស្រ្តអាទិភាព។ ជាពិសេស ការពង្រឹងគុណភាព​វិស័យ​អប់រំ កីឡា វិទ្យាសាស្រ្ត បច្ចេកវិទ្យា និង ការបណ្តុះបណ្តាល​ជំនាញ​បច្ចេក​ទេស ប្រកបដោយសីលធម៌ និង សមធម៌ នៅតាមគ្រឹះស្ថាន​សិក្សា​គ្រប់​កម្រិត ទាំងរដ្ឋ និង ឯកជន ដោយផ្ដោតលើចំណេះដឹង, បទពិសោធ ជំនាញបច្ចេកទេស ជំនាញវិជ្ជាជីវៈ សមត្ថភាពសហគ្រិនភាព, ការច្នៃប្រតិដ្ឋ, គុណធម៌ សីលធម៌,មនសិការស្នេហាជាតិ និង ស្មារតីទទួលខុសត្រូវ ដើម្បីតម្រង់ទិសឱ្យឆ្លើយតបទៅនឹងតម្រូវការទីផ្សារការងារក្នុងពេលបច្ចុប្បន្ន និងអនាគត។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត ក៏​បានធ្វើការ​កត់សម្គាល់ដែរថា ក្នុងបរិការណ៍កើនឡើងនៃបរិវត្តកម្មឌីជីថល, កម្ពុជាពិតជាត្រូវការជាចាំបាច់នូវធនធានមនុស្ស ប្រកបដោយជំនាញខ្ពស់, គំនិតច្នៃប្រតិដ្ឋកម្រិតបច្ចេកទេសល្អ និងរបកគំហើញថ្មីៗ ដើម្បីធានាបាននូវសក្ដានុពលភាពប្រកួតប្រជែងជាអន្តរជាតិ, ការធ្វើពិពិធកម្មសេដ្ឋកិច្ច និង ចីរភាពនៃការអភិវឌ្ឍសង្គម-សេដ្ឋកិច្ច។

ដូច្នេះសម្តេចលើកទឹកចិត្តឱ្យក្រសួងអប់រំ យុវជន និងកីឡានិង វិស័យឯកជន ត្រូវបន្តធ្វើការកែទម្រង់ប្រព័ន្ធសិក្សា ឱ្យកាន់តែល្អ​ប្រសើរ និងអភិវឌ្ឍកម្មវិធីសិក្សាថ្មីៗ ដោយផ្តោតការយកចិត្តទុកដាក់បន្ថែម​លើចំណេះដឹង និង ជំនាញផ្នែកបច្ចេកវិទ្យា និងឌីជីថល ស្របតាម​បរិការ​ណ៍​នៃការរីកចម្រើននៃសេដ្ឋកិច្ចនិង សង្គម, ការប្រែប្រួលអាកាសធាតុ, ការប្រកួតប្រជែងនៃទីផ្សារការងារ និងសកលភាវូបនីយកម្ម។

សូម​បញ្ជាក់ថា នៅក្នុងយុទ្ធសាស្រ្តបញ្ចកោណ​ រាជរដ្ឋាភិបាលកម្ពុជា​បាន​កំណត់​ចក្ខុវិស័យកម្ពុជា​ឆ្នាំ​២០៥០ ពោល​គរយៈពេល​២៥ឆ្នាំទៅមុខទៀត កម្ពុជា​នឹង​ក្លាយ​ទៅជា​សង្គម​ជាតិ​មួយ​ដ៏​រស់រវើក, ជា​ប្រទេស​មានចំណូល​ខ្ពស់ និង​មានសេដ្ឋកិច្ច​ធន់រឹងមាំ, ប្រជាជន​កម្ពុជា​ មានចំណេះ​ដឹង​ខ្ពស់ និង​ជំនាញ​មួយ​យ៉ាង​តិច​ប្រចាំជីវិត, ប្រជាជន​កម្ពុជា រស់​នៅ​ក្នុង​សេចក្តី​ថ្លៃថ្នូរ សុភមង្គល និង​ទទួលបាន​ការ​គាំពារ​សង្គម​ប្រកប​ដោយ​សមធម៌ ស្មើសិទ្ធិ ស្មើឱកាស, កម្ពុជា នឹង​ក្លាយជា​ប្រទេស​មាន បរិស្ថាន​រូបវន្ត ធម្មជាតិ​ប្រកប​ដោយ​សុខដុម​ភាព ភាពទន់ បរិយាបន្ន និងតុល្យភាព​រវាង​ការ​អភិវឌ្ឍ និង​ការ​អភិរក្ស​ធនធាន​ធម្មជាតិ៕