ភ្នំពេញ – «ការសរសេរធ្វើឱ្យយើងចាំ ព្រោះនៅពេលយើងសរសេរ យើងស្រាវជ្រាវ  យើងអាន នៅពេលនោះហើយដែលយើងចាំ»។  នេះជាការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ក្នុងបទបង្ហាញ និងកិច្ចពិភាក្សាស្ដីពី “សារៈសំខាន់នៃអំណានចំពោះការសិក្សា” ដើម្បីអបអរសាទរទិវាជាតិអំណាន លើកទី៨ កាលពីថ្ងៃទី១១ ខែមីនា ឆ្នាំ២០២៣កន្លងទៅ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា បន្ទាប់ពីអានស្នាដៃរបស់អ្នកនិពន្ធជនជាតិបារាំងក្នុងទស្សវត្សរ៍ទី ៦០ ទាក់ទងទៅនឹង សេដ្ឋកិច្ចកម្ពុជា  ឯកឧត្តមបណ្ឌិតសភាចារ្យក៏មានបំណងសរសេរសៀវភៅ «សេដ្ឋកិច្ចកម្ពុជា» ជាភាសាខ្មែរ ។ ទន្ទឹមគ្នានេះ ដោយអំឡុងពេលធ្វើការក្នុងក្រសួងសេដ្ឋកិច្ចហិរញ្ញវត្ថុ ធ្វើការផង ប្រមូលឯកសារដើម្បីសរសេរសៀវភៅផង ឯកឧត្តមបាន​ប្រើ​ពេល​វេលាជិត​១០​ឆ្នាំ ​ដើម្បី​ចង​ក្រង​សៀវ​ភៅនេះ​ឡើង​ ប៉ុន្តែនៅពេលដែលសរសេររួចហើយគឺឯកឧត្តមនៅចាំទាំងអស់។

– ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា

“ពេលសរសេរសៀវភៅហើយគឺចាំទាំងអស់ នៅពេលមានភ្ញៀវជួបចង់ដឹងរឿងអ្វី មិនបាច់មើលសៀវភៅទេ គឺយើងអាចនិយាយប្រាប់គាត់ វិភាគប្រាប់គាត់ពាក់ព័ន្ធនឹងសេដ្ឋកិច្ចកម្ពុជាតែម្ដង”

រដ្ឋមន្រ្តីក្រសួងអប់រំ បញ្ជាក់បន្ថែមថា ដើម្បីជួយឱ្យយើងឆាប់ចងចាំបានល្អ គឺទី១. អានច្រើនដង និងអានអ្វីដែលយើងចូលចិត្ត ព្រោះអ្វីដែលយើងចូលចិត្តយើងនឹងចងចាំឆាប់ ទី២.សរសេរច្រើន និងស្រាវជ្រាវច្រើន។ លើសពីនេះ ផ្សារភ្ជាប់វិធីសាស្រ្តក្នុងការរៀនសូត្រ ដូចជា ការរៀនពាក្យដោយប្រើវិធីសាស្រ្តអំណានដំបូង រៀនពាក្យថ្មីត្រូវអានអត្ថបទជារឿង ព្រោះនៅពេលអានអត្ថបទជារឿង គឺជួយឱ្យចាំបានលឿន។ ម៉្យាងវិញទៀត តាមទ្រឹស្ដីនៃការរៀនភាសា គឺនៅពេលដែលរៀនពាក្យថ្មី ត្រូវតែអានបន្ថែមច្រើនដង ដើម្បីឱ្យមានការចងចាំល្អ។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា

“ខ្ញុំប្រើវិធីសាស្រ្ត “អំណានដំបូង” នេះ រៀនភាសាបរទេសផ្សេងៗហើយភាសាចុងក្រោយនេះ ជាភាសាមួយដែលពិបាកជាងគេក្នុងពិភពលោកដែរ”

ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានបញ្ជាក់បន្ថែមថា ដើម្បីអាចចងចាំបានល្អ យុវជនគួរអានអត្ថបទឱ្យបានច្រើនដង ស្ដាប់ឱ្យច្រើន រួមទាំងហ្វឹកហាត់និយាយបន្ថែមទៀត ទើបយើងអាចចងចាំបានល្អ និងចេះច្បាស់៕