ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឆ្លៀតក្នុងឱកាសចូលរួមជាអធិបតីក្នុងពិធីសម្ពោធអគារអន្តេវាសិកដ្ឋានតេជោសន្តិភាព និងសមិទ្ធផលនានានៅវត្តស្វាយពពែ រាជធានីភ្នំពេញ នៅព្រឹកថ្ងៃទី៩ ខែឧសភា ឆ្នាំ២០២៥ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើការអំពាវនាវដល់អ្នកលេងបណ្ដាញសង្គមនានា សូមចូលរួមផ្សព្វផ្សាយពីភាពវិជ្ជមាន និងសារអប់រំល្អៗដើម្បីលុបបំបាត់រឿងអវិជ្ជមាន អសីលធម៌ ពីសង្គមកម្ពុជា។
សម្តេចធិបតីមានប្រសាសន៍ថា អ្នកលេងបណ្ដាញសង្គមខ្លះសុខចិត្តធ្វើអ្វីៗគ្រប់យ៉ាង ទោះបីបំពានសិទ្ធិអ្នកដទៃ ប្រាសចាកពីសីលធម៌ វប្បធម៌ បាត់បង់តម្លៃជាស្ដ្រីខ្មែរ ព្រោះតែចង់បានចំនួនអ្នកមើលច្រើន។ តែយ៉ាងណាសម្តេចនៅកត់សម្គាល់ឃើញមានចំណុចវិជ្ជមានពីប្រជាជនយើងច្រើនដែលប្រើហ្វេសប៊ុក ដើម្បីចែករំលែកនូវបទពិសោធល្អៗ ផ្សាយល្អៗ អប់រំល្អៗ រួមទាំងព្រះសង្ឃផង។
សម្តេចបានសង្កត់ធ្ងន់ថា ការប្រើប្រាស់បណ្តាញសង្គមត្រូវ គឺជួយផ្តល់ផលល្អ និងវិជ្ជមានក្នុងសង្គម បង្កើតការចេះគិតគូរ, អំណត់, ថ្លឹងថ្លែង, ពិចារណា មុននឹងធ្វើសកម្មភាពអ្វីមួយ។ សម្តេចនាយករដ្ឋមន្រ្តីបញ្ជាក់ថា រាជរដ្ឋាភិបាលកម្ពុជា ចង់ឃើញប្រជាពលរដ្ឋបញ្ចេញសារអប់រំល្អៗ នៅតាមបណ្ដាញសង្គមរបស់ខ្លួន ដើម្បីបន្សាបរាល់សារអវិជ្ជមានគ្មានក្រមសីលធម៌ ប្រសើរជាជាងរដ្ឋប្រើប្រាស់ច្បាប់ទៅលើអ្នកដែលដើរហួសព្រំដែនសីលធម៌សង្គម។
ក្នុងន័យនេះ ប្រមុខរាជរដ្ឋាភិបាលកម្ពុជា បញ្ជាក់ថា ពលរដ្ឋនីមួយៗត្រូវប្រកាន់ខ្ជាប់នូវឥរិយាបថ សីលធម៌ គុណធម៌ ដើម្បីក្លាយខ្លួនជាមនុស្សវិជ្ជមាននៅក្នុងសង្គម។ ជាមួយគ្នានេះ ឪពុកម្ដាយ បងប្អូន មិត្តភក្ដិ ត្រូវរួមគ្នាអប់រំគ្នាទៅវិញទៅមក។ សម្ដេចបញ្ជាក់បន្ថែមថា នេះគឺជា កត្តាចីរភាពដែលឆ្លុះបញ្ចាំងពីសង្គមមួយមានសុខដុមនីយកម្ម៕
