ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ទិវាជាតិអំណាន គឺជាទិវាមួយដែលរាជរដ្ឋាភិបាលកម្ពុជា បានសម្រេចរៀបចំឡើងចាប់ពីឆ្នាំ២០១៥ ក្នុងទិសដៅសំខាន់ដើម្បីបណ្ដុះទម្លាប់អាន លើកកម្ពស់សមត្ថភាពអាន ក៏ដូចជាការតែងនិពន្ធ។
ទិវាជាតិអំណាន ប្រារព្ធធ្វើឡើងនៅថ្ងៃទី១១ ខែមីនា ជារៀងរាល់ឆ្នាំ ដែលជាថ្ងៃប្រសូត្ររបស់សម្តេចព្រះសង្ឃរាជ ជួន ណាត ដើម្បីរំលឹកដល់ស្នាដៃ និងការចូលរួមអភិរក្សភាសាខ្មែរ និងចងក្រងវចនានុក្រមខ្មែរ ដែលមានការទទួលស្គាល់ និងប្រើប្រាស់មកដល់បច្ចុប្បន្ន។
អ្នកនាំពាក្យក្រសួងអប់រំ បន្ថែមថា ឆ្នាំនេះ ជាលើកទី៩ហើយ នៃការប្រារព្ធទិវាជាតិអំណាន ដោយកំណត់យកប្រធានបទ “អំណានជាមូលដ្ឋានគ្រឹះ សម្រាប់ទាំងអស់គ្នាក្នុងជីវិត”។ លោកស្រីបណ្ឌិតបញ្ជាក់ថា អត្ថន័យប្រធានបទនេះ ក្នុងគោលបំណងជំរុញការអាន និងរៀនពេញមួយជីវិត ពីព្រោះនៅក្នុងសម័យឌីជីថលដែលមានការរីកចម្រើនយ៉ាងឆាប់រហ័សនូវប្រព័ន្ធឌីជីថលទាមទារឱ្យប្រជាពលរដ្ឋរៀនសូត្រពេញមួយជីវិតដោយខ្លួនឯង មានលក្ខណៈងាយស្រួល និងធ្វើជាប្រចាំ។
លោកស្រីបណ្ឌិត ឃួន វិច្ឆិកា បន្ថែមទៀតថា ទិវាជាតិអំណាន លើកទី៩ នឹងមានការតាំងពិព័រណ៌សៀវភៅរយៈពេល ៣ថ្ងៃ ចាប់ពីថ្ងៃទី០៩ ដល់ថ្ងៃទី១១ ខែមីនា ឆ្នាំ២០២៤ នៅវិទ្យាស្ថានបច្ចេកវិទ្យាកម្ពុជា។ ទន្ទឹមគ្នានេះ ក៏មានបទបាឋកថា ស្ដីពី តួនាទីអំណានក្នុងការលើកកម្ពស់គុណភាពអប់រំ និងសាលារៀនគំរូ ព្រមទាំងមានវេទិការតុមូលក្រោម ប្រធានបទ អំណានជាមូលដ្ឋានគ្រឹះសម្រាប់ទាំងអស់គ្នាក្នុងជីវិត។ ជាពិសេសមានបទបង្ហាញស្ដីពីអំណាន នៅក្នុងបរិបទកម្មវិធីរង្វាយតម្លៃលទ្ធផលសិក្សាសិស្សអន្តរជាតិ (PIZA) ដោយ ឯកឧត្តមបណ្ឌិសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ផងដែរ។
អ្នកនាំពាក្យក្រសួងអប់រំ បន្តថា ក្រៅពីនោះ ក៏មានកម្មវិធីផ្ដល់រង្វាន់ដល់បេក្ខជនជ័យលាភីថ្នាក់ជាតិចំណាត់ថ្នាក់លេខ១ ដល់លេខ៣ ពានរង្វាន់សម្ដេចតេជោ ហ៊ុន សែន ក្នុងការប្រឡងប្រណាំង អានអត្ថបទ ស្មូតកំណាព្យ តែងនិពន្ធ និងក្នុងការបកស្រាយប្រធានបទ។
លោកស្រីបណ្ឌិត ឃួន វិច្ឆិកា បានអំពាវនាវដល់សាធារណៈជន ក៏ដូចជាបុគ្គលិកអប់រំ និងសិស្សានុសិស្សទាំងអស់ចូលរួមបន្តការអានជាប្រចាំ ហើយចូលរួមក្នុងការតែងនិពន្ធ ដើម្បី ទី១. លើកកម្ពស់សមត្ថភាពផ្ទាល់ខ្លួន និងបន្តរៀនពេញមួយជីវិត ទី២. រួមចំណែកថែរក្សា និងអភិរក្សអក្សរសាស្រ្តខ្មែរ ទី៣. ចូលរួមតែងនិពន្ធសៀវភៅជាភាសាខ្មែរ ដើម្បីឱ្យធនធានជាភាសាខ្មែរកាន់តែសម្បូរបែប ហើយឆ្លើយតបទៅនឹងតម្រូវការនៃការអភិវឌ្ឍសមត្ថភាពរប់កូនខ្មែរក្នុងបច្ចុប្បន្ន ក៏ដូចជាពេលអនាគត។ ក្នុងនោះលោកស្រីក៏សំណូមពរដល់មិត្តអ្នកអានទាំងអស់ចូលរួមគាំទ្រសៀវភៅជាភាសាខ្មែរ ក៏ដូចជាទិញសភៅដែលមានកម្មសិទ្ធិបញ្ញាត្រឹមត្រូវ ដើម្បីលើកទឹកចិត្តដល់អ្នកតែងនិពន្ធក៏ដូចជាលើកកម្ពស់គុណភាពនៃការតែនិពន្ធ៕
