ភ្នំពេញ – លោក ហឿង ហេងហេង ជាកីឡាករកម្ពុជា​ដែលបានឈ្នះមេដាយប្រាក់ លើប្រភេទកីឡាយូដូជនពិការ វិញ្ញាសាទម្ងន់បូក៩០គីឡូក្រាម J2 ផ្នែកបុរស ក្នុងព្រឹត្ដិការណ៍កីឡាអាស៊ីប៉ារ៉ាហ្គេម លើកទី១២ ឆ្នាំ២០២៣ នៅអគាខេមរ៉ានី កាលពីថ្ងៃទី៥ ខែមិថុនា ឆ្នាំ២០២៣កន្លងទៅ។ កីឡាករជនមានពិការភាពរូបនេះ បានសម្តែង​នូវ​សេចក្តីរំភើប ព្រមជាមួយ​មោទនភាព ដែលបានក្លាយ​ជាតំណាង​កម្ពុជា ប្រកួត​ទទួលបានមេដាយប្រាក់ ។

លោក ហឿង ហេងហេង ជាជនមានពិការភាពភ្នែក មក​ពីខេត្ត​រតនគិរី ។ លោកបានចូលហ្វឹកហាត់ប្រកួតកីឡាយូដូជនពិការ នៅចុងខែមករា ឆ្នាំ២០២៣នេះ​ ដើម្បីត្រៀមខ្លួនមកប្រកួតក្នុងព្រឹត្ដិការណ៍កីឡាអាស៊ីប៉ារ៉ាហ្គេម លើកទី១២។ លោកថា មុនពេលប្រកួត លោកបានរំពឹងថា នឹងយកជ័យលាភីជូនប្រទេសកម្ពុជាឱ្យបាន ហើយទីបំផុតការខិតខំរបស់លោកក៏ទទួលលទ្ធផលល្អ។

លោក ហឿង ហេងហេង ម្ចាស់មេដាយប្រាក់ប្រភេទកីឡាយូដូជនពិការ

“ខ្ញុំចូលចិត្តកីឡាយូដូជនពិការ ព្រោះកីឡានេះផ្ដល់អត្ថប្រយោជន៍ដល់សុខភាព ជួយឱ្យរាងកាយមាំមួន ព្រមទាំងអាចការពារខ្លួនបាន”

លោក ហឿង ហេងហេង បានរៀបរាប់ពីពិការភាពរបស់លោកថា លោកបានពិការភ្នែកកាលពីនៅអាយុ៨ឆ្នាំ ដោយសារដាច់សរសៃបាតភ្នែក។ លោកបន្តថា កាលរៀននៅថ្នាក់បឋមសិក្សា ឪពុកម្ដាយលោកតែងឃើញលោកឧស្សាហ៍ជ្រុះប៊ិក ឬខ្មៅដៃ ហើយខំរាវរករបស់ទាំងនោះ ក្រោយមកទើបឪពុកម្ដាយលោកជូនទៅពិនិត្យនៅមន្ទីរពេទ្យ ជាលទ្ធផលគ្រូពេទ្យប្រាប់ថា លោកបានដាច់សរសៃបាតភ្នែក គឺមិនអាចមើលឃើញតែម្ដង។ លោកថា ពិការភាពភ្នែកនេះ ធ្វើឱ្យលោកមានភាពលំបាកក្នុងការធ្វើសកម្មភាពផ្សេងៗប្រចាំថ្ងៃ។

លោក ហឿង ហេងហេង ម្ចាស់មេដាយប្រាក់ ប្រភេទកីឡាយូដូជនពិការ

“ប្រសិនជាមានវិទ្យាសាស្រ្ត ឬបច្ចេកទេសដែលអាចជួយឱ្យភ្នែករបស់ខ្ញុំមើលឃើញវិញបាន ខ្ញុំសូមសំណូមពរដល់អ្នកវិទ្យាសាស្រ្ត ឬអ្នកឯកទេសភ្នែក ជួយព្យាបាលភ្នែកខ្ញុំឱ្យភ្លឺឡើងវិញដូចមនុស្សធម្មតា ព្រោះខ្ញុំចង់ឱ្យភ្នែករបស់ខ្ញុំអាចមើលឃើញដូចមនុស្សទូទៅដែរ”

យ៉ាងណាក៏ដោយ ម្ចាស់មេដាយប្រាក់កីឡាករយូដូជនពិការតំណាងឱ្យប្រទេសកម្ពុជារូបនេះ លើកទឹកចិត្តដល់កីឡាករ ក៏​ដូចជាយុវជនផ្សេងទៀតត្រូវតស៊ូ និងហ្វឹកហាត់ ក៏​ដូចជាខិតខំសិក្សារៀនសូត្រ ដើម្បីជាសរសរទ្រូងរបស់ប្រទេសជាតិ៕