នៅខែក្រោយនេះ ក្រសួងអប់រំ យុវជន និងកីឡា នឹង​រៀបចំសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ ក្រោមប្រធានបទ “មាគ៌ាកម្ពុជាឆ្ពោះទៅកាន់ការអប់រំឌីជីថល”។ សន្និសីទនេះ ត្រូវ​បានចាត់ទុកថា គឺជាព្រឹត្តិការណ៍​បច្ចេកវិទ្យាសម្រាប់ការអប់រំលើកទី១ និង​ធំបំផុត​នៅ​ប្រទេស​កម្ពុជា ដោយនឹងប្រព្រឹត្តទៅពីថ្ងៃទី១៧ ដល់ ១៨ ខែកុម្ភៈ ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា។

ក្នុងកិច្ចប្រជុំស្ដីពីការត្រៀមរៀបចំសន្និសីទ និងពិព័រណ៍បច្ចេកវិទ្យាអប់រំលើកទី១ កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា សម្រាប់សន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ នឹង​ត្រូវ​ធ្វើឡើងដោយមានលំនាំតាម EdTech Asia Summit។

បើតាម​ប្រសាសន៍របស់រដ្ឋមន្ត្រី ក្នុងសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ នេះ នឹងមានសកម្មភាពចម្រុះ រួមមាន បទអន្តរាគមន៍ជាយុទ្ធសាស្ត្រពីអ្នកជំនាញជាតិ និងអន្តរជាតិ វេទិកា ពិភាក្សា និងចែករំលែកចំណេះដឹង ការតាំងពិព័រណ៍បច្ចេកវិទ្យាអប់រំ កម្មវិធីប្រកួតប្រជែងគ្រូបង្រៀនដែលប្រើប្រាស់បច្ចេកវិទ្យាអប់រំប្រកបដោយភាពច្នៃប្រឌិតបំផុតរបស់កម្ពុជាប្រចាំឆ្នាំ២០២៥ និងការប្រកួតប្រជែង សមត្ថភាពឌីជីថលដែលអ្នកចូលរួមទាំងអស់អាចវាស់ស្ទង់សមត្ថភាព និងចំណេះដឹង ឌីជីថលរបស់ខ្លួននៅក្នុងព្រឹត្តិការណ៍នេះ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍បញ្ជាក់ថា សារសំខាន់ក្នុងការរៀបចំបង្កើតនូវសន្និសីទ និងពិព័រណ៍អប់រំលើកទី១នេះ គឺក្នុងគោលដៅប្រមូលផ្ដុំសហគមន៍ដែលមកពីស្ថាប័នចម្រុះ រួមមាន អ្នកបង្កើតគោលនយោបាយ អ្នកឯកទេសអប់រំ អ្នកឯកទេសព័ត៌មានវិទ្យា អ្នកច្នៃប្រឌិតបច្ចេកវិទ្យាអប់រំ អ្នកដឹកនាំផ្នែកឧស្សាហកម្ម និងអ្នកពាក់ព័ន្ធផ្សេងទៀតដើម្បីជំរុញការចែករំលែក ចំណេះដឹង ការច្នៃប្រឌិត និងការសហការគ្នា ដើម្បីដោះស្រាយបញ្ហាប្រឈម និងចាប់យកឱកាសក្នុងការរួមបញ្ចូលបច្ចេកវិទ្យាទៅក្នុងប្រព័ន្ធអប់រំ ដើម្បីលើកកម្ពស់ និងធ្វើទំនើបកម្មអប់រំតាមរយៈបច្ចេកវិទ្យា។

ជាមួយគ្នានេះ ដើម្បី​ជួយ​ឱ្យ​សន្និសីទ និង​ពិព័រណ៌​បច្ចេកវិទ្យាអប់រំលើកទី១ កាន់តែផុសផុលថែមទៀតនោះ ឯកឧត្តម​រដ្ឋមន្រ្តី​បានស្នើ​ឱ្យមានការ​រៀបចំជាការប្រកួតវីដេអូខ្លីស្តីពីព្រឹត្តិការណ៍ពិព័រណ៍ EdTech រយៈពេល២ថ្ងៃក្នុងចំណោមអ្នកចូលរួម ដើម្បីជំរុញការផ្សព្វផ្សាយឱ្យបានទូលំទូលាយ និងមានការចូលរួមគាំទ្រពីគ្រប់មជ្ឈដ្ឋាន។

គួរជម្រាបជូនដែរថា សន្និសីទ និងពិព័រណ៍បច្ចេកវិទ្យាអប់រំកម្ពុជា លើកទី១ ដែល​គ្រោង​ប្រព្រឹត្តធ្វើ​នៅ​ខែក្រោយនេះ ត្រូវ​គេ​រំពឹងថា នឹងមានអ្នក​ចូលរួម​ប្រមាណ២ម៉ឺននាក់ ដែលជាមន្រ្តីគ្រប់គ្រង មន្រ្តីជំនាញ សាស្រ្តាចារ្យ សិស្សនិស្សិត មកពីក្រសួងស្ថាប័ន ដៃគូអភិវឌ្ឍ មន្ទីរអប់រំ យុវជនកីឡា រាជធានី/ខេត្ត គ្រឹះស្ថានឧត្តមសិក្សាសាធារណៈនិងឯកជក គ្រឹះស្ថានបណ្ដុះបណ្ដាលគ្រូ និងគ្រឹះស្ថានសាធារណៈ និងឯកជនទូទាំងប្រទេស៕