ក្រសួងអប់រំ យុវជន និងកីឡា នឹង​ធ្វើជាម្ចាស់ផ្ទះរៀបចំសិក្ខាសាលាថ្នាក់តំបន់អាស៊ីអាគ្នេយ៍ស្តីពីការផ្តល់អាហារតាមសាលារៀនលើកទី១ ដែល​នឹងប្រព្រឹត្តទៅចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២៤ នៅខេត្តសៀមរាប ដោយ​នឹងមានអ្នកចូលរួមមកពីប្រទេសចំនួន ១៣ រួមមាន ប្រទេសព្រុយណេ មីយ៉ាន់ម៉ា ឥណ្ឌូណេស៊ី ឡាវ ម៉ាឡេស៊ី ហ្វីលីពីន សិង្ហបុរី ថៃ វៀតណាម កម្ពុជា ជប៉ុន ចិន និងសាធារណរដ្ឋកូរ៉េ។

ក្រសួងអប់រំ យុវជន និងកីឡា បាន​ឱ្យដឹងថា សិក្ខាសាលាថ្នាក់តំបន់អាស៊ីអាគ្នេយ៍ស្តីពីការផ្តល់អាហារតាមសាលារៀនលើកទី១ ទទួលបានការជួយគាំទ្រពីកម្មវិធីស្បៀងអាហារពិភពលោក (WFP) និង KOICA ។ សិក្ខាសាលាថ្នាក់តំបន់នេះ គឺជាព្រឹត្តិការណ៍លើកដំបូង នៅទ្វីបអាស៊ី ដែលហៅថា “បណ្តាញមិត្តជួយមិត្តនៅក្នុងតំបន់អាស៊ី” ក្នុងគោលបំណងដើម្បីចែករំលែក ឧត្តមានុវត្តន៍ នៃការអនុវត្តកម្មវិធីផ្តល់អាហារតាមសាលារៀនពីបណ្តាប្រទេសក្នុងទ្វីបអាស៊ី, លើកកម្ពស់ការយល់ដឹងអំពីអត្ថប្រយោជន៍ នៃការផ្តល់អាហារតាមសាលារៀន, បង្កើនការវិនិយោគលើកម្មវិធីផ្តល់អាហារតាមសាលារៀន និងពង្រឹងកិច្ចសហប្រតិបត្តិការនិងភាពជាដៃគូរវាងរដ្ឋាភិបាល និងដៃគូអភិវឌ្ឍ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងអំណរគុណ និងវាយតម្លៃខ្ពស់ចំពោះកម្មវិធីស្បៀងអាហារពិភពលោក ដែលបានជួយគាំទ្រក្នុងប្រទេសកម្ពុជានាពេលកន្លងមក ជាពិសេសផ្នែកអាហារូបត្ថម្ភ ដែលឈានទៅដល់ការលើកកម្ពស់វិស័យអប់រំនៅកម្ពុជា។

ឯកឧត្តមបណ្ឌិតសភាចារ្យ ក៏​បានណែនាំដល់មន្រ្តីទទួលបន្ទុករៀបចំ ដោយថា ដើម្បីឱ្យការរៀបចំសិក្ខាសាលាថ្នាក់តំបន់អាស៊ីអាគ្នេយ៍ប្រព្រឹត្តទៅបានរលូន គឺត្រូវមានវិធានការ ដោយរៀបចំអ្នកឯកទេសលើផ្នែកជំនាញផលិតកម្មសង្គម ក៏ដូចជាការចុះពិនិត្យសាលារៀនពាក់ព័ន្ធ មានកម្មវិធីវប្បធម៌សម្រាប់ប្រទេស រៀបចំការអញ្ជើញប្រទេសគោលដៅ និងការប្រើប្រាស់ថវិកាឱ្យបានត្រឹមត្រូវ។ លើសពីនេះ ក្រសួងក៏បានគាំទ្រទៅលើគំនិតផ្តួចផ្តើមក្នុងការលើកកម្ពស់អាហារូបត្ថម្ភបន្ថែមក្នុងកម្មវិធីជាតិដែលនេះសមស្របទៅនឹងគោលដៅរបស់ក្រសួងអប់រំក្នុងការកែលម្អអាហារូបត្ថម្ភរបស់សិស្ស។

ឧបនាយករដ្ឋមន្ត្រី រដ្ឋមន្ត្រីក្រសួងអប់រំ សង្ឃឹមថា កម្មវិធីស្បៀងអាហារពិភពលោក នឹងបន្តធ្វើសហប្រតិបត្តិការបន្តទៀត ជាមួយក្រសួងអប់រំ យុវជន និងកីឡា ដើម្បីបន្តអភិវឌ្ឍន៍អាហារូបត្ថម្ភនៅកម្ពុជា ដូចជាការជួយគាំទ្រទៅលើគម្រោងអាហារូបត្ថម្ភរបស់ក្រសួងដែលមានស្រាប់។

បើតាមការបញ្ជាក់របស់ក្រសួងអប់រំ ការរៀបចំសិក្ខាសាលាថ្នាក់តំបន់អាស៊ីអាគ្នេយ៍នៅកម្ពុជា គឺជាឱកាសល្អមួយសម្រាប់កម្ពុជាក្នុងការដកស្រង់បទពិសោធន៍ល្អៗ និងសិក្សាកាន់តែស៊ីជម្រៅលើការអនុវត្តកម្មវិធីផ្តល់អាហារតាមសាលារៀន ពីបណ្តាប្រទេសនានា ដៃគូអភិវឌ្ឍ និងអង្គការអន្តរជាតិ ដើម្បីយកមកបំពេញបន្ថែម និងកែលម្អការអនុវត្តកម្មវិធីផ្តល់អាហារ តាមសាលារៀននៅកម្ពុជាឱ្យកាន់តែល្អប្រសើរ៕