ក្រសួងអប់រំ យុវជន និងកីឡា ប្រកាសជ្រើសរើសកុមារីមានវ័យចាប់ពី ០៨ ដល់១៨ឆ្នាំ ចូលរួមកម្មវិធី Technovation កម្ពុជា២០២៤ ដែលនឹងប្រព្រឹត្តទៅចាប់ពីខែធ្នូ ឆ្នាំ២០២៣ រហូតដល់ខែសីហា ឆ្នាំ២០២៤។

កម្មវិធីប្រកួតប្រជែងកម្រិតអន្តរជាតិនេះ រៀបចំឡើងដើម្បីចូលរួមគាំទ្រការប្រើប្រាស់បច្ចេកវិទ្យាព័ត៌មានសម្រាប់ប្រទេសកម្ពុជា និងបង្កើនបរិមាណកុមារី ដែលបញ្ចប់ការសិក្សាលើជំនាញកុំព្យូទ័រ ជំរុញលើកទឹកចិត្តកុមារីឱ្យក្លាយជាអ្នកអភិវឌ្ឍកម្មវិធី អ្នកច្នៃប្រឌិត បង្កើតដំណោះស្រាយថ្មីដោយប្រើប្រាស់បច្ចេកវិទ្យា ដើម្បីចូលរួមដោះស្រាយបញ្ហាក្នុងសហគមន៍ និងបង្ហាញលទ្ធផលសម្រេចបានរបស់កុមារី។

បើតាមក្រសួងអប់រំ កម្មវិធីប្រកួតប្រជែងក្នុងវិស័យបច្ចេកវិទ្យា និងធុរកិច្ច Technovation កម្ពុជា ២០២៤ ឆ្លើយតបទៅនឹងបរិបទនៃការអប់រំបែបឌីជីថល ដោយផ្ដល់វគ្គបណ្តុះបណ្តាល ១២សប្ដាហ៍នឹងប្រព្រឹត្តទៅតាមប្រព័ន្ធអនឡាញ ចាប់ផ្តើមពីខែមករា ដល់ខែមេសា ឆ្នាំ២០២៤ លើជំនាញសរសេរកូដបង្កើតកម្មវិធីទូរសព្ទដៃ និងសហគ្រិនភាព ដោយផ្ដោតសំខាន់លើមុខវិជ្ជា ៖ Ideation, Coding, Entrepreneurship, Pitching និង Artificial Intelligence (AI) ។ បន្ទាប់ពី បញ្ចប់វគ្គបណ្តុះបណ្តាលតម្រូវឱ្យក្រុមកុមារីធ្វើកម្មវិធីទូរសព្ទដៃ ដែលបានអភិវឌ្ឍគម្រោងអាជីវកម្ម និងវីដេអូខ្លី ទៅក្នុងគេហទំព័រ Technovation Global ដើម្បីចូលរួមប្រកួតប្រជែងនៅថ្នាក់ជាតិ និងថ្នាក់អន្តរជាតិ។

សម្រាប់លក្ខខណ្ឌចូលរួមប្រកួត ត្រូវតែជាក្មេងស្រីមានអាយុចាប់ពី ០៨-១៨ ឆ្នាំ, ត្រូវជ្រើសរើសក្រុមដែលមានសមាជិកចាប់ពី ០៣-០៥នាក់, ជាសិស្សដែលកំពុងរៀននៅតាមគ្រឹះស្ថានសិក្សាសាធារណៈ ឬឯកជន, មានការប្ដេជ្ញាចិត្តខ្ពស់ក្នុងការប្រើប្រាស់បច្ចេកវិទ្យា និងការសិក្សាស្រាវជ្រាវ, ត្រូវចូលរួមវគ្គបណ្តុះបណ្តាលរយៈពេល ១២សប្តាហ៍, មានការគាំទ្រពីគណៈគ្រប់គ្រងសាលារៀន អាណាព្យាបាល ឱ្យចូលរួមកម្មវិធីប្រកួតប្រជែង។

សម្រាប់អត្ថប្រយោជន៍ទទួលបាន រួមមាន អភិវឌ្ឍជំនាញបច្ចេកវិទ្យា ភាពច្នៃប្រឌិត ការរចនា និងសហគ្រិនភាព, ផ្តល់ជំនាញដល់កុមារីកម្ពុជាដើម្បីត្រៀមខ្លួនក្នុងការដោះស្រាយបញ្ហាជុំវិញការអភិវឌ្ឍសហគមន៍, បង្ហាញពីសក្តានុពលនៃភាពជោគជ័យរបស់ស្រ្តីវ័យក្មេង លើផ្នែកបច្ចេកវិទ្យា និងសហគ្រិនភាព, ចេះធ្វើការងារជាក្រុម, ទទួលបានពានរង្វាន់ជ័យលាភីថ្នាក់ជាតិ និងទទួលបានលិខិតសរសើរ ពីក្រសួងអប់រំ យុវជន និងកីឡា និងសហគមន៍។

កុមារី និងយុវនារីដែលមានចំណាប់អារម្មណ៍ចង់ចូលរួមកម្មវិធីប្រកួតប្រជែង Technovation កម្ពុជា២០២៤ អាចដាក់ពាក្យស្នើសុំតាមរយៈតំណភ្ជាប់ https://my.technovationchallenge.org/signup ចាប់ពីថ្ងៃផ្សាយដំណឹងនេះ រហូតដល់ ថ្ងៃទី៣១ ខែមករា ឆ្នាំ២០២៤ ។

គួរជម្រាបជូនថា កម្មវិធី Technovation ជាកម្មវិធីប្រកួតប្រជែងដែលផ្តោតសំខាន់ទៅលើការលើកទឹកចិត្តកុមារី និងយុវនារីកម្ពុជា ចាប់ពីកម្រិតបឋមសិក្សា រហូតដល់មធ្យមសិក្សាទុតិយភូមិ ជាពិសេសកុមារីដែលមានវ័យចាប់ពី ០៨-១៨ឆ្នាំ ឱ្យចូលរួមក្នុងវិស័យបច្ចេកវិទ្យា និងសហគ្រិនភាព តាមរយៈការបង្ហាញគំនិតច្នៃប្រឌិតក្នុងការប្រើប្រាស់បច្ចេកវិទ្យាព័ត៌មាន លើជំនាញសរសេរកូដបង្កើតកម្មវិធីទូរសព្ទដៃ ដើម្បីចូលរួមដោះស្រាយបញ្ហាកើតមានក្នុងសហគមន៍៕