នៅក្នុងទស្សនកិច្ចពិនិត្យវឌ្ឍនភាពការងារអប់រំក្រោមការអនុវត្តគម្រោងកែលម្អការអប់រំចំណេះទូទៅ (GEIP) នៅវិទ្យាល័យ ទា ចំរ៉ាត់ ខេត្តពោធិ៍សាត់ កាលពីពេលកន្លងទៅថ្មីៗនេះ ក្រសួងអប់រំ រកឃើញថា លទ្ធផលសិក្សាសិស្សបានល្អប្រសើរ ទាំងលទ្ធផលតេស្តស្ដង់ដា និងលទ្ធផលប្រឡងមធ្យមសិក្សាទុតិយភូមិ ដែលមានការកើនឡើងខ្ពស់ពី ៦៥% រហូតដល់ ៨២% ក្នុងរយៈពេល ៣ឆ្នាំចុងក្រោយនេះ ក្រោយអនុវត្តគម្រោងកែលម្អការអប់រំចំណេះទូទៅ(GEIP)។

ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា លទ្ធផលសិក្សារបស់សិស្សក្នុងការអនុវត្តគម្រោងកែលម្អការអប់រំចំណេះទូទៅ(GEIP) នេះ បានបង្ហាញឱ្យឃើញថា លោកគ្រូ អ្នកគ្រូ ចេះអំពីរបៀបប្រើវិធីសាស្ត្របង្រៀនក្នុងការបង្រៀនសិស្ស ជាពិសេស សិស្សានុសិស្សមានភាពក្លាហាន ឈ្លាសវៃ យកចិត្តទុកដាក់ក្នុងការសិក្សា គោរពពេលវេលា យល់ពីតម្លៃនៃការសិក្សា និងមានគោលដៅដើម្បីបន្តការសិក្សាច្បាស់លាស់។

រដ្ឋមន្រ្តីក្រសួងអប់រំ ក៏បានវាយតម្លៃខ្ពស់ និងថ្លែងអំណរគុណចំពោះសាលា ដែលបានខិតខំក្នុងការអនុវត្តគម្រោង GEIP រហូតទទួលបាននូវលទ្ធផលសិក្សារបស់សិស្សបានល្អប្រសើរ។ ឯកឧត្ដមបណ្ឌិតសភាចារ្យ ហង់ជួន ណារ៉ុន បន្តថា លទ្ធផលទាំងនេះ បង្ហាញពីការចូលរួមយ៉ាងសកម្មពីលោកគ្រូ អ្នកគ្រូ និងមានការគាំទ្រពីអាណាព្យាបាលសិស្ស សហគមន៍ ដែលជួយឧបត្ថម្ភ និងគាំទ្រសាលាកន្លងមក។

ឯកឧត្ដមបណ្ឌិតសភាចារ្យ ហង់ជួន ណារ៉ុន បានកោតសរសើរចំពោះលោកគ្រូ អ្នកគ្រូ ដែលបានលះបង់ទាំងកម្លាំងកាយចិត្ត មកបង្រៀនទាំងទីឆ្ងាយ អគារសិក្សានៅមានកម្រិត ហើយថែមទាំងបង្រៀនរហូតដល់ទទួលបានលទ្ធផលសិក្សាល្អប្រសើរថែមទៀតផង។ លទ្ធផលនេះអាចទៅរួចបានគឺ មកពីមានការប្ដេជ្ញាចិត្តខ្ពស់របស់លោកគ្រូ អ្នកគ្រូ ការធ្វើតេស្តស្តង់ដា ការរៀបចំផែនការសម្រាប់សិស្សច្បាស់លាស់ និងការបង្រៀនបន្ថែមម៉ោង ដើម្បីឱ្យសិស្សានុសិស្សគ្រប់គ្នាអាចចាប់បាន និងទទួលបានលទ្ធផលល្អគ្រប់ៗគ្នា។

គួរជម្រាបជូនថា ក្រសួងអប់រំ យុវជន និងកីឡា បានដាក់អនុវត្តគម្រោងកែលម្អការអប់រំចំណេះទូទៅ (GEIP) ដែលមានរយៈពេលអនុវត្ត៥ឆ្នាំ ចាប់ពីឆ្នាំ២០២២ ដល់ ២០២៦ ក្រោមការគាំទ្រពីថវិការួមគ្នា រវាងឥណទានកម្ចីពីធនាគារពិភពលោក និងមូលនិធិសកលសម្រាប់ការអប់រំ( GPE) ។ គម្រោង GEIP ក៏បានឆ្លើយតបទៅនឹងការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការកសាងមូលធនមនុស្សកម្ពុជា ព្រមទាំងឆ្ពោះទៅសម្រេចឱ្យបាននូវចក្ខុវិស័យកម្ពុជានៅឆ្នាំ២០៣០ និង២០៥០៕