ដើម្បីចូលរួមអភិរក្ស និងលើកកម្ពស់វប្បធម៌ ដូចជាជំនឿ ទំនៀមទម្លាប់ ប្រពៃណីជាតិខ្មែរឱ្យបានគង់វង្ស និងរីកចម្រើនព្រមទាំងចៀសវាងបាតុភាពផ្សេងៗ នៅក្នុងឱកាសត្រៀមអបអរសាទរសង្ក្រាន្តតាមគ្រឹះស្ថានសិក្សា និងថ្ងៃប្រារព្ធពិធីបុណ្យចូលឆ្នាំប្រពៃណីជាតិខ្មែរ ក្រសួងអប់រំ យុវជន និងកីឡា បានធ្វើការ​ណែនាំឱ្យ​គ្រឹះស្ថានសិក្សា​សាធារណៈ និង​ឯកជនទាំងអស់ បង្កលក្ខណៈ​ឱ្យ​ប្អូនៗ​សិស្សានុសិស្ស និងយុវជនបានលេងល្បែង និងរបាំប្រជាប្រិយខ្មែរ ដូចជា របាំរាំវង់ រាំក្បាច់ សារ៉ាវ៉ាន់ របាំត្រុដិ និងល្បែងប្រជាប្រិយខ្មែរមួយចំនួន ដូចជា ល្បែងបោះអង្គញ់ ចោលឈូង ដណ្តើមស្លឹកឈើ ទាញព្រ័ត្រជាដើម។ តែជាមួយ​គ្នា​នេះ ក្រសួងអប់រំ ក៏​បានហាមឃាត់ និងទប់ស្កាត់រាល់ល្បែងទាំងឡាយណាដែលប្រឈមនឹងហានិភ័យ អសុវត្ថិភាព និងគ្រោះថ្នាក់ ដូចជាដុត ឬបាញ់ផាវ បាញ់ទឹក ជះទឹក លាបម្សៅ ជាដើម។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ល្បែង និងរបាំប្រជាប្រិយខ្មែរ ផ្តល់ការកម្សាន្តសប្បាយស្របតាមបរិបទ និងអាកាសធាតុរបស់ខ្មែរ និងមានភាពទាក់ទាញមិនចាញ់ល្បែងកំសាន្តនៃជាតិសាសន៍ណាមួយនោះទេ។

អ្នកនាំពាក្យក្រសួងអប់រំ បញ្ជាក់បន្ថែមថា ប្រពៃណីទំនៀមទម្លាប់ និងវប្បធម៌ខ្មែរ អាចល្បីរន្ទឺបានត្រូវការកូនខ្មែរអភិរក្ស និងចូលរួមថែរក្សា។ ដូច្នេះ ក្នុងបុណ្យចូលឆ្នាំខ្មែរខាងមុខនេះ ក្នុងនាមក្រសួងអប់រំ លោកជំទាវ ឃួន វិច្ឆិកា សង្ឃឹមថា ប្អូនៗនឹងរីករាយជាមួយនឹងការកំសាន្តសប្បាយជាមួយនឹងល្បែង និងរបាំខ្មែរ។

លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា សេចក្តីណែនាំរបស់ក្រសួងអប់រំ បានបង្ហាញពីការយកចិត្តទុកដាក់ក្នុងការចូលរួមការលេងល្បែងប្រជាប្រិយខ្មែរ ដើម្បីលើកកម្ពស់អត្តសញ្ញាណប្រពៃណីជាតិ។

“អត្តសញ្ញាណខ្មែរ គឺល្បែងប្រជាប្រិយខ្មែរ”

បើតាម​លោកបណ្ឌិត ឈត ប៊ុនថង ដើម្បីលើកទឹកចិត្តឱ្យសិស្សានុសិស្សលេងល្បែងប្រជាប្រិយខ្មែរ សាលារៀននីមួយៗ ថ្នាក់ដឹកនាំសាលា លោកគ្រូ អ្នកគ្រូ ត្រូវពន្យល់ណែនាំសិស្សានុសិស្សឱ្យយល់ច្បាស់ពីអត្ថន័យ និងសារៈសំខាន់នៃល្បែងប្រជាប្រិយខ្មែរ ព្រមទាំងរៀបចំសម្ភារៈ ទីធ្លា សម្រាប់លេងល្បែងប្រជាប្រិយខ្មែរ ហើយដឹកនាំសិស្សានុសិស្សលេងល្បែងប្រជាប្រិយខ្មែរ។

លោកបណ្ឌិត ឈត ប៊ុនថង ក៏សង្ឃឹមថា សាលារៀននីមួយៗ គណៈគ្រប់គ្រងសាលា នឹងអនុវត្តតាមសេចក្ដីណែនាំរបស់ក្រសួងអប់រំ ឱ្យមានប្រសិទ្ធភាព និងលើកទឹកចិត្តជំរុញឱ្យប្អូនៗចូលរួមលេងល្បែងប្រជាប្រិយខ្មែរទាំងអស់គ្នា ជាប្រយោជន៍ឈានទៅអភិរក្ស អភិវឌ្ឍ ផ្សព្វផ្សាយអត្តសញ្ញាណវប្បធម៌ ក្នុងឱកាសបុណ្យចូលឆ្នាំប្រពៃណីខ្មែរ៕