ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា រួមជាមួយភាគីពាក់ព័ន្ធ ដែលមានក្រសួងស្ថាប័ន អង្គការក្រៅរដ្ឋាភិបាល ក៏ដូចជាវិស័យឯកជន កំពុងរួមគ្នាបង្កើតជា “ការកំណត់លក្ខណៈវិនិច្ឆ័យសម្រាប់ការបង្កើតទារកដ្ឋាននៅកម្ពុជា” ដើម្បីជាប្រយោជន៍ផ្ទាល់ដល់កុមារតូចដែលជាកូនចៅបងប្អូនប្រជាជនកម្ពុជា។
ក្នុងសិក្ខាសាលាពិគ្រោះយោបល់សេចក្តីព្រាងអនុក្រឹត្យស្តីពី “ការកំណត់លក្ខណៈវិនិច្ឆ័យសម្រាប់ការបង្កើតទារកដ្ឋាននៅកម្ពុជា” កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានគូសបញ្ជាក់ពីសារៈសំខាន់ នៃការវិនិយោគលើកុមារតូច តាមរយៈការយកកូនមកចុះឈ្មោះចូលទារកដ្ឋាន ដែលមានអ្នកជំនាញទទួលបានការបណ្តុះបណ្តាលបច្ចេកទេសត្រឹមត្រូវ សម្រាប់មើលថែទាំកុមារនៅតាមទារកដ្ឋានដែលមានស្តង់ដាគុណភាព ដូចជា មានការផ្តល់អាហារប្រកបដោយអនាម័យនិងល្អចំពោះសុខភាព មានកន្លែងគេង មានសម្ភារៈសម្រាប់កុមារលេង ទីធ្លាលេងក្នុងនិងក្រៅបន្ទប់ស្របតាមលក្ខណៈបច្ចេកទេស ដែលបង្កលក្ខណៈឱ្យមាតាបិតា អ្នកអាណាព្យាបាល មានឱកាសប្រកបមុខរបរនិងការងារប្រចាំថ្ងៃ ដោយមិនមានការបារម្ភពីកូនតូច។
ឯកឧត្តមបន្តថា តបតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត ក្រសួងអប់រំ យុវជន និងកីឡា និងក្រសួង ស្ថាប័នពាក់ព័ន្ធ បានសហការគ្នាបង្កើតទារកដ្ឋាន សហគមន៍រោងចក្រសហគ្រាស សម្រាប់កូនកម្មករកម្មការិនីអាយុចាប់ពី ៣ខែ ដល់ក្រោម ៣ឆ្នាំ ដោយទទួលបានសេវាថែទាំ គាំពារ និងអភិវឌ្ឍន៍ប្រកបដោយជំនាញវិជ្ជាជីវៈ ក្នុងគោលដៅសម្រាលបន្ទុកគ្រួសារ បន្តលើកកម្ពស់សុខុមាលភាពទាំងឪពុកម្ដាយ និងកុមារតូច ដែលជាមូលដ្ឋានគ្រឹះក្នុងការផ្ដល់នូវការអប់រំពហុវិស័យ។ ក្នុងន័យនេះ ក្រសួងអប់រំ យុវជន និងកីឡា ក្នុងនាមជាស្ថាប័នដឹកនាំ បានកំណត់កម្មវិធីកំណែទម្រង់ការគ្រប់គ្រងការអប់រំកុមារតូច ដោយផ្តោតជាសំខាន់លើការបង្កើតកម្មវិធីទារកដ្ឋានសហគមន៍រោងចក្រសហគ្រាសជាអាទិភាពចំពោះមុខ ក្នុងចំណោមការងារអាទិភាពដទៃទៀត។ ជាលទ្ធផល ក្រោមកិច្ចសហប្រតិបត្តិការជាមួយអង្គការពិភពកុមារនិងអភិវឌ្ឍ(PE&D) ក្រោមការគាំទ្រថវិកាពីធនាគារពិភពលោក បានរួមគ្នារៀបចំបង្កើតទារកដ្ឋានផ្តល់សេវាថែទាំ គាំពារ និងអភិវឌ្ឍន៍ប្រកបដោយវិជ្ជាជីវៈបានចំនួន ១៣កន្លែង នៅខេត្តកំពង់ស្ពឺ និងខេត្តកំពង់ចាម។
យ៉ាងណាក៏ដោយ ក្នុងគោលបំណងឆ្លុះបញ្ចាំងអំពីកិច្ចខិតខំប្រឹងប្រែងរួមគ្នាប្រកបដោយការយកចិត្តទុកដាក់ និងការទទួលខុសត្រូវចំពោះអនាគតកុមារកម្ពុជា គ្រប់ភាគីពាក់ព័ន្ធបានរួមគ្នាធ្វើ សេចក្ដីព្រាងអនុក្រឹត្យស្ដីពី”ការកំណត់លក្ខណៈវិនិច្ឆ័យសម្រាប់ការបង្កើតទារកដ្ឋាននៅកម្ពុជា” ដោយមាន៦ជំពូក និង២៧មាត្រា។ បើតាមឯកឧត្តមបណ្ឌិតសភាចារ្យ ហង់ជួន ណារ៉ុន សេចក្តីព្រាងអនុក្រឹត្យដ៏មានសារៈសំខាន់នេះ បានផ្ដល់នូវអនុសាសន៍ឱ្យយកចិត្តទុកដាក់ទៅលើចំណុចសំខាន់ៗចំនួន៥រួមមាន ៖ ១) ផ្តល់នូវសុខភាពល្អ ២) ផ្តល់អាហារូបត្ថម្ភ ៣) ផ្តល់ឱកាសសម្រាប់ការរៀនសូត្រតាំងពីវ័យដំបូង ៤) ផ្តល់ការថែទាំប្រកបដោយការឆ្លើយតប ៥) ផ្តល់សន្តិសុខ និងសុវត្ថិភាព។
ជាមួយគ្នានេះដែរ ឯកឧត្តមរដ្ឋមន្រ្តីក៏បានស្នើឱ្យមានការគាំទ្រពីគ្រប់ភាគីពាក់ព័ន្ធទាំងអស់ ដើម្បីជំរុញការផ្ដល់សេវាឱ្យបានល្អ និងមាននិរន្តរភាព ស្របតាមចក្ខុវិស័យលើកកម្ពស់សុខុមាលប្រជាជន និងការអភិវឌ្ឍធនធានមនុស្សរបស់រាជរដ្ឋាភិបាល។
គួរបញ្ជាក់ដែរថា រាជរដ្ឋាភិបាលកម្ពុជា បានកំណត់នូវទិសដៅអភិវឌ្ឍផ្តោតជាសំខាន់គឺការបង្កើតទារកដ្ឋានដែលមានលក្ខណៈជំនាញ និងស្តង់ដាបច្ចេកទេសវិជ្ជាជីវៈពិតប្រាកដ ក្នុងគោលបំណងលើកកម្ពស់សុខមាលភាពកុមារអាយុពី៣ខែ ដល់ក្រោម៣ឆ្នាំ ដោយធានាបាននូវមូលដ្ឋានអភិវឌ្ឍន៍សម្បទាពេញលេញ ដើម្បីភាពជោគជ័យក្នុងការសិក្សាពេញមួយជីវិតរបស់មនុស្ស ព្រមទាំងរក្សាបាននូវកំណើនសេដ្ឋកិច្ចជាតិ និងសង្គមសន្តិភាព៕
