ថ្លែងក្នុងកម្មវិធីប្រកាសផ្សព្វផ្សាយដាក់ឱ្យប្រើប្រាស់ជាផ្លូវការគោលការណ៍ណែនាំស្តីពី “ ដំណើរការទារកដ្ឋាន” កាលពីថ្ងៃទី២៨ ខែឧសភា លោកជំទាវកិត្តិបណ្ឌិត អ៊ឹ កន្ថាផាវី រដ្ឋមន្រ្តីក្រសួងកិច្ចការនារី មានប្រសាសន៍ថា ការបង្កើតឱ្យមានទារកដ្ឋាន រួមចំណែកលើកកម្ពស់ការចិញ្ចឹមកូនបែបវិជ្ជមាន។

រដ្ឋមន្រ្តីក្រសួងកិច្ចការនារី បន្ថែមថា ការចិញ្ចឹមកូនបែបវិជ្ជមាន មានសារៈសំខាន់ក្នុងការជួយឱ្យកុមារមានការអភិវឌ្ឍលើបញ្ញា ស្មារតី សុជីវធម៌ និងគុណធម៌ក្នុងការរស់នៅ និងក្លាយជាមូលធនមនុស្សនៅក្នុងសង្គមនាពេលអនាគត។

បើតាមប្រសាសន៍របស់រដ្ឋមន្រ្តីក្រសួងកិច្ចការនារី នៅ​កម្ពុជា​ មន្រ្តីរាជការ​ជា​ស្រ្តី​ គឺមាន​ចំនួន ៤១% ហើយ​ក្នុងចំណោម​មន្រ្តីទាំងនេះ មន្រ្តីជាស្រ្តី ២៨នាក់ មានទាំង​មន្រ្តីក្របខណ្ឌ និង​មន្រ្តីជាប់កិច្ចសន្យា មានកូនអាយុ​ពី ០-៣ឆ្នាំ (បញ្ចូលទាំង​មន្រ្តីដែលមានផ្ទៃពោះផងដែរ) ហេតុនេះហើយ នៅក្នុងឆ្នាំ​២០១៨ ក្រសួងកិច្ចការ​នារី​បានផ្តួចផ្តើម​គំនិត​ក្នុងការ​បង្កើតទារកដ្ឋាន ក្នុងគោលបំណងលើកកម្ពស់ការផ្តល់សេវាថែទាំសម្រាប់កុមារតូចពីអាយុ ០ដល់៥ឆ្នាំ ប្រកបដោយសុវត្ថិភាព គុណភាព និងស្ដង់ដារ ដើម្បីឱ្យឪពុកម្តាយជាមន្រ្តីរាជការមានលទ្ធភាពធ្វើការងារប្រកបដោយប្រសិទ្ធភាព ព្រមទាំងកាត់បន្ថយអវត្តមាន និងលើកកម្ពស់តុល្យភាពរវាងជីវិតការងារ និងជីវិតគ្រួសារ។ គោលការណ៍ណែនាំនេះ ត្រូវបានរៀបចំឡើងដើម្បីណែនាំអំពីវិធីសាស្ត្រផ្ដល់សេវាអំពីទារកដ្ឋាន ដោយផ្ដោតលើគោលការណ៍គន្លឹះមួយចំនួនដូចជា ការថែទាំ ការអភិវឌ្ឍកុមារតូច សុខភាពនិងអនាម័យ អាហារូបត្ថម្ភ និងការអប់រំតាមអាយុរបស់កុមារ។

បើតាមក្រសួងកិច្ចការនារី គោលការណ៍ណែនាំស្តីពី “ ដំណើរការទារកដ្ឋាន” នេះ ផ្ដល់នូវគោលការណ៍សំខាន់ៗពាក់ព័ន្ធទៅលើរចនាសម័្ពន្ធ និងការបង្ហាញផ្លូវជាច្រើនប្រកបដោយភាពជាក់លាក់ សមស្រប និងបង្កលក្ខណៈងាយស្រួលដល់ក្រសួងស្ថាប័ន និងវិស័យឯកជន ដែលអាចទៅយកប្រើប្រាស់បានទៅតាមលទ្ធភាព និងស្ថានភាពជាក់ស្ដែងរបស់ខ្លួន។

ទារកដ្ឋាន គឺជាកន្លែងសុវត្ថិភាព និងផ្ដល់នូវបរិយាកាសល្អប្រសើរដល់កុមារឱ្យមានអារម្មណ៍ថា ទទួលបានភាពកក់ក្ដៅ ការការពារ និងការថែទាំយ៉ាងល្អពីអ្នកផ្ដល់ការថែទាំរបស់ពួកគេ។ គ្រប់សកម្មភាពនៅទារកដ្ឋាន រួមមាន ការលេង ការញ៉ាំអាហារ ការគេង និងការរៀនសូត្រ ត្រូវតែមានសុវត្ថិភាព សន្តិសុខ និងមានមេត្រីភាពបរិស្ថានសម្រាប់កុមារ។

យ៉ាងណាក៏ដោយ បើតាមក្រសួងកិច្ចការនារី ការ​ផ្តល់សេវាថែទាំកុមារ​ប្រកប​ដោយ​គុណភាព​ដល់មន្រ្តី គឺជាដំណោះស្រាយ​មួយ​ក្នុងចំណោម​ដំណោះស្រាយ​សំខាន់ៗ​របស់​ក្រសួង ដើម្បី​បង្កើនភាពអង់អាច​ដល់ស្រ្តី និង​បង្កើន​ការ​ចូលរួម​ក្នុងសកម្មភាព​សេដ្ឋកិច្ច​របស់ពួកគេ ដែលនាំ​ឱ្យ​ពួកគេ​កាន់តែមានការ​ងារ​ល្អប្រសើរជាងមុន៕