រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លើកឡើងថា គម្រោងគំនិតផ្ដួចផ្ដើមសាលារៀនកម្ពុជា ដែលក្រសួងនឹងដាក់​ឱ្យ​ដំណើរ នឹង​ជួយជំរុញឪពុកម្ដាយសិស្សបញ្ជូនកូនមករៀនដោយទំនុកចិត្ត។

ក្នុងពិធីប្រកាសដាក់ឱ្យដំណើរការគម្រោងគំនិតផ្ដួចផ្ដើមសាលារៀនកម្ពុជា និងសម្ពោធកម្មវិធីស្ថាបត្យកម្មខ្មែរ កាលពីថ្ងៃទី១៣ វិច្ឆិកា ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និង​សំណង់ មានប្រសាសន៍ថា គម្រោងគំនិតផ្ដួចផ្ដើមសាលារៀនកម្ពុជា ត្រូវ​បានសាកល្បងអនុវត្តនៅវិទ្យាល័យសម្ដេចអគ្គសេនាបតីតេជោ ហ៊ុន សែន សំរោង ដើម្បីផ្លាស់ប្ដូរផ្នត់គំនិតឪពុកម្ដាយសិស្សឱ្យមានទំនុកចិត្តថា សាលារៀននេះជាកន្លែងមួយដែលអាចបង្ហាត់បង្រៀនកូនៗរបស់ពួកគាត់បាន។

រដ្ឋមន្រ្តីក្រសួងរៀបចំដែនដី បានសង្កត់ធ្ងន់ថា អនាគតរបស់ប្រទេសកម្ពុជា គឺអាស្រ័យលើការចូលរួមរបស់យើងទាំងអស់គ្នាក្នុងស្មារតីស្នេហាជាតិ។ ហើយដើម្បីប្រែក្លាយប្រទេសជាតិឱ្យកាន់តែល្អជាងមុនតាមរយៈស្ថាបត្យកម្ម គឺត្រូវរៀបចំកែលំអរបន្ទប់គេងឱ្យបានស្អាត បន្ទប់ទទួលភ្ញៀវស្អាត បន្ទប់ទឹកស្អាត និងចង្ក្រានបាយស្អាត ដោយផ្អែកនៅលើកិច្ចការរៀបចំដែនដី នគរូបនីយកម្ម និងសំណង់។

ឯកឧត្តមបន្ថែមថា យើងត្រូវរួមគ្នាធ្វើយ៉ាងណាឱ្យកម្ពុជាដែលជាប្រទេសតូច ក្លាយជាភូមិឋានក្សេមក្សាន្តសម្រាប់ប្រជាពលរដ្ឋគ្រប់រូប ដោយមានលំនៅឋានរស់នៅសមរម្យ មានជីវភាពល្អប្រសើរ មានការងារធ្វើ មានប្រាក់ចំណូល មានប្រាក់សន្សំ មានអាហារហូបចុកគ្រប់គ្រាន់, មានជីវិតលំហែ និងធ្វើឱ្យកម្ពុជាក្លាយជាទីកន្លែងដែលមនុស្សគ្រប់រូបមានក្តីប្រាថ្នាចង់មករស់នៅ។

រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ក៏​បានលើកឡើងដែរថា បច្ចុប្បន្នក្រសួងកំពុងតែបណ្ដុះផ្នត់គំនិតដល់ប្រជាពលរដ្ឋគ្រប់រូប និងគ្រប់កោសិកានៃសង្គមជាតិឱ្យទទួលបានផ្នត់គំនិត នៃការរស់នៅបែបថ្មីតាមរយៈស្ថាបត្យកម្ម។ ដូច្នេះ ទី១ យើងត្រូវចាប់ផ្ដើមលុបបំបាត់សំណង់មិនរៀបរយបន្តិចម្តងៗ ដោយក្នុងរយៈពេល ១០ ឆ្នាំចុងក្រោយនេះក្រសួងរៀបចំដែនដី នគរូបនីយកម្ម និងសំណង់ បានដោះស្រាយបញ្ហាសំណង់មិនរៀបរយនេះជូនប្រជាពលរដ្ឋចំនួន ៥០ម៉ឺនគ្រួសារដែលប្រៀបបានជាការជួយទាញប្រជាពលរដ្ឋទាំង៥០ម៉ឺនគ្រួសារនេះឱ្យចាកចេញពីភាពក្រីក្រដូច្នោះដែរ, និងទី២ បញ្ចៀសបញ្ហាកកស្ទះចរាចរណ៍ និងបញ្ហាលិចទឹកតាមដងផ្លូវ ការកសាងចំណតយានយន្ត និងសួនច្បារទីធ្លាលំហរសាធារណ:តាមសាលារៀន ឬពង្រីកផ្លូវធ្វើដំណើរបន្ថែម។

ជាមួយគ្នានេះ ឯកឧត្តម សាយ សំអាល់ ក៏បានថ្លែងអំណរគុណដល់គណៈស្ថាបត្យករកម្ពុជាដែលបានប្តេជ្ញាចិត្តខ្ពស់ចំពោះបុព្វហេតុលើវិស័យរបស់ខ្លួន និងបានថ្លែងអំណរគុណដល់ថ្នាក់ដឹកនាំ និងមន្រ្តីនៃក្រសួងរៀបចំដែនដី នគរូបនីយកម្ម និងសំណង់ ដែលបង្ហាញអំពីវីរៈភាពក្នុងការបំពេញកិច្ចការងារជាច្រើននារយៈពេលជាង ២ឆ្នាំក្នុងអាណត្តិទី៧នេះ ដើម្បីរួមចំណែកជំរុញឱ្យជាតិសាសន៍ខ្មែរមានជីវិតកាន់តែល្អប្រសើរ៕