ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានស្នើ និងលើកទឹកចិត្តទៅដល់បងប្អូនកម្មករនិយោជិត ទាំងនៅក្នុងប្រព័ន្ធ និងក្រៅប្រព័ន្ធដែលកំពុងតែមានការងារធ្វើស្រាប់ ត្រូវខិតខំឆ្លៀតធ្វើយ៉ាងណាឱ្យមានជំនាញមួយ ដើម្បីមានផលិតភាពជាងមុន និងមានប្រសិទ្ធភាពជាងមុន។
ក្នុងកម្មវិធីសិក្ខាសាលាថ្នាក់ជាតិស្តីពីការអនុវត្ត “កម្មវិធីការងារសមរម្យប្រចាំប្រទេសកម្ពុជា ឆ្នាំ២០២៤-២០២៨” ដែលធ្វើឡើងកាលពីសប្តាហ៍កន្លងទៅនេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា កម្មករ និយោជិតគួរតែចំណាយពេលខ្លះដើម្បីរៀនជំនាញថ្មីៗបន្ថែមទៀត ដើម្បីឱ្យកាន់តែមានផលិតភាព និងប្រសិទ្ធភាព យល់ដឹងពីច្បាប់ និងកាតព្វកិច្ច យល់ពីរបៀបដោះស្រាយវិវាទការងារ យល់ពីរបៀបធ្វើការជាមួយមិត្តរួមការងារ និងសហគ្រាសផ្ទាល់ខ្លួន ធ្វើអ្វីៗដើម្បីមិត្តរួមការងារ មិនមែនសម្រាប់តែខ្លួនផ្ទាល់នោះទេ។
ឯកឧត្តម ហេង សួរ បញ្ជាក់ថា ជាចរន្ត ជាវដ្តនៃសេដ្ឋកិច្ច មុននឹងអាចទាក់ទាញអ្នកវិនិយោគ ឬមួយក៏ចង់ឱ្យអ្នកមានមូលធនជាថវិកា អាចមកវិនិយោគនៅប្រទេសយើងបាន គឺចាំបាច់ត្រូវមានមូលធនមនុស្ស ដែលមានសុខភាពល្អ មានជំនាញ មានចំណេះដឹង មានឥរិយាបទការងារល្អ។ ដូច្នេះ មូលធនមនុស្ស គឺជារឿងសំខាន់មួយ ហើយអ្នកដែលចង់បានការងារល្អ ក៏ត្រូវតែមានជំនាញ មានចំណេះដឹងគ្រប់គ្រាន់ដែរ។
គួរបញ្ជាក់ថា កាលពីខែឧសភា រាជរដ្ឋាភិបាលកម្ពុជា តំណាងដោយក្រសួងការងារ បានចុះហត្ថលេខាលើអនុស្សរណៈយោគយល់គ្នាជាមួយអង្គការ ILO ដើម្បីអនុវត្តកម្មវិធីការងារដំណាក់កាលទីប្រាំមួយ ដើម្បីវិបុលភាពសង្គមកាន់តែប្រសើរឡើង ស្របតាមចក្ខុវិស័យឆ្នាំ២០៣០ និងឆ្នាំ២០៥០។
កម្មវិធីការងារសមរម្យប្រចាំប្រទេសកម្ពុជាក្នុងដំណាក់កាលថ្មីត្រូវបានរៀបចំឡើងដើម្បីបំពេញបន្ថែមការអនុវត្តត្រឹមត្រូវនៃចក្ខុវិស័យឆ្នាំ២០៣០ និងក្របខ័ណ្ឌឆ្នាំ២០៥០ ។ វាមានគោលបំណងធ្វើឱ្យប្រសើរឡើងនូវយុត្តិធម៌សង្គម និងលើកកម្ពស់ការងារសមរម្យសម្រាប់ទាំងអស់គ្នា បន្ថែមពីលើស្តង់ដារការងារអន្តរជាតិ ការងារសមរម្យ និងផលិតភាព ការគាំពារសង្គម និងការសន្ទនាសង្គម យន្តការ និងជំនាញត្រីភាគី យេនឌ័រ ពលកម្មកុមារ និងជនពិការ៕
