ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ- ថ្លែងក្នុងពិធីសម្ពោធបណ្ណាល័យនៃមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ការជំរុញការអាន និងការស្រាវជ្រាវ គឺជាធាតុមួយចាំបាច់មិនអាចខ្វះបាន ហេតុនេះហើយទើបក្រសួងធ្វើការកែលម្អបណ្ណាល័យ នៃមជ្ឈមណ្ឌលគរុកោសល្យភូមិភាគចំនួន៤ ចាប់ពីឆ្នាំ២០២០មក ក្នុងនោះមានដូចជាគរុកោសល្យភូមិភាគកំពង់ចាម តាកែវ ព្រៃវែង និងខេត្តកណ្តាល។
បើតាមប្រសាសន៍ធ្លាប់លើកឡើងរបស់ ឯកឧត្តម ហង់ជួន ណារ៉ុន ប្រទេសដែលមានការរីកចំរើន គឺជាប្រទេសដែលមានប្រជាពលរដ្ឋ និងយុវជនចូលចិត្តក្នុងការអានច្រើន ទាក់ទងទៅនឹងអក្សរសិល្ប៍ ប្រលោមលោក និងការអានជាលក្ខណៈវិទ្យាសាស្ដ្រ ហើយនៅពេលបច្ចុប្បន្ននេះបច្ចេកវិទ្យាគឺបានវិវត្តទៅយ៉ាងលឿន ដូច្នេះ ទាមទារឱ្យយុវជនត្រូវតែអានឱ្យបានច្រើន ដើម្បីសម្រេចបាននូវជោគជ័យ ព្រោះបើសិនជាយុវជនអានមិនបានអានច្រើននោះទេ នោះក៏មិនអាចធ្វើអ្វីបានសម្រេចជោគជ័យនោះដែរ។
ក្នុងឱកាសនោះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន ក៏បានវាយតម្លៃខ្ពស់ចំពោះក្រុមការងាររៀបចំបណ្ណាល័យនៅតាមមជ្ឈមណ្ឌលភូមិភាគឱ្យទៅជាបណ្ណាល័យមួយថ្មីមានស្តង់ដាខ្ពស់មានសោភណ្ឌភាពដែលអាចទាក់ទាញ គរុសិស្ស គ្រូឧទ្ទេស ចូលអានក្នុងការស្រាវជ្រាវដើម្បីបង្កើនចំណេះដឹងថ្មីៗបន្ថែមទៀត សម្រាប់ពង្រឹងការបណ្តុះបណ្តាលធនធានមនុស្ស។
សូមបញ្ជាក់ថា បណ្ណាល័យនៃមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល ត្រូវបានធ្វើការជួសជុលកែលម្អ ដោយបំពាក់នូវគ្រឿងបរិក្ខារទំនើបទាន់សម័យ មានកន្លែងអង្គុយមានផាសុខភាព ម៉ាស៊ីនត្រជាក់ មានបន្ទប់ពហុបំណង និងបន្ទប់បំរើការងាររបស់បណ្ណារក្ស និងបញ្ជកុំព្យូទ័រ ព្រមទាំងសៀវភៅជាភាសាបារាំង អង់គ្លេស និងភាសាខ្មែរជាច្រើនសម្រាប់ស្រាវជ្រាវផងដែរ។
រដ្ឋមន្ត្រីក្រសួងអប់រំ យុវជន និងកីឡា បានផ្តាំផ្ញើដល់លោកគ្រូអ្នកគ្រូដែលជាបណ្ណារក្សជួយថែរក្សាបណ្ណាល័យ និងសម្ភារបរិក្ខារទាំងនេះឱ្យបានគង់វង្សទុកជាប្រយោជន៍ដល់កូនចៅយើងទាំងអស់គ្នា៕
