ភ្នំពេញ – មិន​ដល់១០០ថ្ងៃទៀតនោះទេ ព្រឹត្តិការណ៍​កីឡា​ស៊ីហ្គេម​លើកទី៣២ និង​ព្រឹត្តិការណ៍​កីឡា​ជនពិការ អាស៊ាន​ប៉ារ៉ាហ្គេម​លើកទី១២ នឹងចាប់ផ្តើម​ដោយ​កម្ពុជាធ្វើជា​ម្ចាស់ផ្ទះ ក្រោយ​កម្ពុជារង់ចាំរយៈពេល៦៤ឆ្នាំ។ ក្នុង​នាមជា​ម្ចាស់ផ្ទះ​ នៃព្រឹត្តិការណ៍កីឡា​ស៊ីហ្គេម​លើកទី៣២ និង​កីឡា​អាស៊ាន​ប៉ារ៉ាហ្គេម​លើកទី១២ ក្រុមយុវជនបាន​សម្តែង​នូវ​មោទនភាព និងមានក្តីសង្ឃឹមថា ព្រឹត្តិការណ៍កីឡាថ្នាក់អាស៊ាន​ទាំងពីរនេះ នឹងធ្វើ​ឱ្យ​គេស្គាល់កម្ពុជា ទាក់ទាញ​ភ្ញៀវទេសចរ និងផ្សព្វផ្សាយ​វប្បធម៌​ខ្មែរ​ទៅ​កាន់ពិភពលោក។​

កញ្ញា អ៊ុង រង់ផលទេវី សហស្ថាបនិកនៃចលនាទម្លុះ បាននិយាយថា នៅពេល​ដែល​កម្ពុជាធ្វើជាម្ចាស់ផ្ទះស៊ីហ្គេម២០២៣នេះ កម្ពុជានឹង​ទទួលបានផលប្រយោជន៍ជាច្រើនដូចជា ទី១.ផ្សព្វផ្សាយឱ្យកាន់តែទូទំលាយនូវវប្បធម៌ អរិយធម៌ និង ប្រពៃណីតាមរយ:សិល្ប:គ្រប់ទម្រង់ ដល់ប្រទេសនានាក្នុងតំបន់ និងសកលលោកបានដឹង, ទី២. ការកើនឡើងនៃវិស័យទេសចរណ៍មកទស្សនានូវការប្រកួតនេះ និងមកគាំទ្រអត្តពលិកតំណាងប្រទេសរបស់ខ្លួន, ទី៣. ការផ្សព្វផ្សាយអំពីកម្ពុជាទៅកាន់សកលលោកកាន់តែទំលំទូលាយដែលនាំមកនូវមុខមាត់ប្រទេស និងជះផលវិជ្ជមានដល់វិស័យសេដ្ឋកិច្ចក្នុងកំឡុងពេល និងទៅថ្ងៃអនាគត និងទី៤. ពង្រឹងចំណងមិត្ដភាព និងវិស័យកីឡារវាងកម្ពុជា អាស៊ាន និងប្រទេសនានាដែលបានចូលរួម។

កញ្ញា អ៊ុង រង់ផលទេវី បន្ថែមថា ស៊ីហ្គេម២០២៣នេះ នឹងចូលរួមបំផុសគំនិតដល់យុវជនដែលជាអត្តពលិកកម្ពុជាឱ្យចូលរួមផុលផុសក្នុងវិស័យកីឡា ដើម្បីត្រៀមខ្លួនរួចជាស្រេចចំពោះការប្រកួតនាពេលខាងមុខនេះ ហើយចំពោះយុវជនដែលមិនមែនជាអត្តពលិកក៏មានគំនិតចាប់អារម្មណ៍ចូលរួមលើកីឡាណាមួយដែលធ្វើឱ្យយុវជនមានគំនិតស្រឡាញ់វិស័យកីឡា។ ម៉្យាងវិញទៀត ជាឱកាសឱ្យយុវជនបានចូលរួមផ្ទាល់ក្នុងកម្មវិធីដ៏ធំនេះ ដើម្បីរៀនសូត្រ ផ្លាស់ប្ដូរ និងទទួលបានបទពិសោធន៍ អំពីប្រទេសនានាក្នុងតំបន់អាស៊ាន និងពិភពលោក ដើម្បីរឹតចំណងមិត្ដភាពនៃយុវជនកម្ពុជាជាមួយយុវជននានាក្នុងតំបន់អាស៊ាន និង ពិភពលោកអោយកាន់តែល្អទាំងក្នុងពេលនេះ និងនាពេលអនាគត។

សហស្ថាបនិកនៃចលនាទម្លុះ បញ្ជាក់បន្ថែមថា ក្នុងនាមជាយុវជននៅពេលកម្ពុជាធ្វើជាម្ចាស់ផ្ទះស៊ីហ្គេម២០២៣នេះ អាចចូលរួមចំណែកជាម្ចាស់ផ្ទះក្នុងនាមជាពលរដ្ឋខ្មែរ ដោយផ្ដល់នូវការស្វាគមន៍ ប្រកបដោយស្នាមញញឹម និងភាពកក់ក្ដៅដល់ភ្ញៀវទេសចរណ៍ទាំងឡាយដោយស្មើភាព មិនមានការរើសអើងពូជសាសន៍ សាសនា ឬអត្ដសញ្ញាណយេនឌ័រឡើយ។ មិនត្រឹមតែប៉ុណ្ដោះយុវជនអាចចូលរួមចែករំលែក និងចូលរួមផ្សព្វផ្សាយកម្មវិធីដ៏អស្ចារ្យនេះ។

សម្រាប់យុវជន នៀ ឧត្តម និស្សិតឆ្នាំទី២ ជំនាញសំណង់ស៊ីវិល នៃវិទ្យាស្ថានបច្ចេកវិទ្យាកម្ពុជា និយាយថា ខណៈកម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេម២០២៣ មិនត្រឹមតែបង្ហាញពីសក្កានុពល នៃប្រទេសដែល​មានធនធានគ្រប់គ្រាន់ក្នុង​ការ​ធ្វើជាម្ចាស់ផ្ទះកីឡាលំដាប់ថ្នាក់កំពូលនៅក្នុងអាស៊ានប៉ុណ្ណោះទេ ហើយថែមទាំងជាឱកាសមួយឱ្យកម្ពុជាបង្ហាញនូវវប្បធម៌ អរិយធម៌ជនជាតិខ្មែរយើងទៅកាន់អាស៊ាន ក៏ដូចជាពិភពលោកទាំងមូលផងដែរ។

យុវជន ឧត្តម បន្ថែមថា សម្រាប់អត្ថប្រយោជន៍ចំពោះយុវជន គឺមានច្រើនសន្ធឹកសន្ធាប់ដូចជា នៅព្រឹត្តិការណ៍ស៊ីហ្គេមឆ្នាំ២០២៣ កម្ពុជាក៏មានកម្មវិធីមួយដែលគេហៅថា Beyon The Game គឺមិនមែនធ្វើសម្រាប់តែកីឡាប្រកួតយកចាញ់ឈ្នះមួយមុខទេ ប៉ុន្តែចង់បង្ហាញថា ជាកីឡាមួយបង្កើតនូវមិត្តភាពក៏ដូចជាសាមគ្គីភាព និងការឱ្យតម្លៃគ្នាដូចគ្នា។

យុវជន នៀ ឧត្តម

“ព្រឹត្តិការណ៍ខាងមុខនេះ យុវជនកម្ពុជា អាចចូលរួមចំណែកនៅក្នុងកីឡាស៊ីហ្គេមឆ្នាំ២០២៣នេះ ខណៈដែលកម្ពុជាធ្វើជាម្ចាស់ផ្ទះដូចជា ចូលរួមជួយផ្សព្វផ្សាយ គាំទ្រទៅលើការប្រកួតរបស់កីឡាករខ្មែរ និងអាចចូលរួមផ្សព្វផ្សាយពីវប្បធម៌ អរិយធម៌របស់យើងទៅកាន់ជាតិសាសន៍ដ៏ទៃ”

យុវជន លាន សុខលាភ និស្សិតឆ្នាំទី៤ ជំនាញវិស្វកម្មសំណង់ស៊ីវិល នៃវិទ្យាស្ថានបច្ចេកវិទ្យា បាននិយាយថា កម្ពុជាបានចាប់ផ្ដើមយុទ្ធនាការណ៍រាប់ថយក្រោយ ១០០ថ្ងៃដើម្បីអបអរកម្ពុជាធ្វើជាម្ចាស់ផ្ទះនៃព្រឹត្តិការណ៍ការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ និងអាស៊ានប៉ារ៉ាហ្គេមជាទី១២ (12th ASEAN Para Games)។ ព្រឹត្តិការណ៍នេះ ជំរុញឱ្យកម្ពុជាធានាសុខសន្តិភាព ក៏ដូចជាសុវត្ថិភាពដល់អត្តពលិកមកពីប្រទេសផ្សេងៗអាចមកទេសចរណ៍នៅប្រទេសកម្ពុជាហើយបន្តផ្សព្វផ្សាយរូបភាពល្អៗរបស់កម្ពុជាផងដែរ។

យុវជន លាន សុខលាភ

 “ខ្ញុំមានអារម្មណ៍ថាមានមោទកភាពក៏ដូចជាសប្បាយចិត្តដែលកម្ពុជាមានលទ្ធភាពធ្វើជាម្ចាស់ផ្ទះព្រឹត្តិការណ៍ការប្រកួតកីឡាអាស៊ីអាគ្នេយ៍ បានស្មើមុខស្មើមាត់ដូចនៅប្រទេសដទៃទៀត ហើយសង្ឃឹមថា ប្រទេសកម្ពុជានឹងធ្វើឱ្យបានល្អក្នុងការប្រកួតស៊ីហ្គេមឆ្នាំ២០២៣ខាងមុខនេះ”

សូមជំរាបថា ព្រឹត្តិការណ៍ការកីឡាអាស៊ីអាគ្នេយ៍លើកទី៣២ (The 32nd SEA Games) ដែល​កម្ពុជាធ្វើជាម្ចាស់ផ្ទះ​ នឹងប្រារព្ធ​ធ្វើឡើងពីថ្ងៃទី០៥ ដល់ថ្ងៃទី១៧ ខែ ឧសភា ឆ្នាំ២០២៣។ ដោយឡែក ព្រឹត្តិការណ៍ការប្រកួតកីឡាប៉ារ៉ាហ្គេម  នឹងប្រារព្ធ​ធ្វើ​ឡើងពី​ថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕