ទិវាគ្រូបង្រៀន៥ តុលា ជាទិវាដឹងគុណគ្រូដែលស្ថិតនៅជាអមតៈក្នុងបេះដូងរបស់សិស្សានុសិស្សនិស្សិត យុវជន និងប្រជាពលរដ្ឋគ្រប់វ័យ។ នេះបើតាមការលើកឡើងរបស់ ឯកឧត្តមបណ្ឌិតសភាចារ្យ ហង់ជួ ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា។

ឯកឧត្តមបណ្ឌិតសភាចារ្យ ហង់ជួ ណារ៉ុន មានប្រសាសន៍ថា ឯកឧត្តមតែងតែចងចាំនូវគុណនុបការរបស់លោកគ្រូ អ្នកគ្រូទាំងអស់ដែលធ្លាប់បានបង្ហាត់បង្ហាញឯកឧត្តមផ្ទាល់ ក៏ដូចជាគ្រូបង្រៀនដែលកំពុងបង្រៀនសិស្សផ្សេងៗទៀតឱ្យក្លាយទៅជាធនធានមនុស្សដ៏ល្អសម្រាប់កម្ពុជា។ ជាមួយគ្នានេះ ឯកឧត្តមក៏បានថ្លែងអំណរគុណដល់គ្រូបង្រៀននៅទូទាំងប្រទេស ក៏ដូចជាលោកគ្រូ អ្នកគ្រូរបស់ឯកឧត្តមដែលបានខិតខំប្រឹងប្រែងបង្រៀនសិស្សឱ្យចេះដឹង ដែលចូលរួមចំណែកក្នុងការបណ្ដុះបណ្ដាលធនធានមនុស្ស ផ្ដល់ឱ្យសិស្សមានចំណេះដឹង មានអាកប្បកិរិយាល្អ និងក្លាយជាពលរដ្ឋល្អ។

រដ្ឋមន្រ្តីអប់រំ បញ្ជាក់បន្ថែមថា គ្រូបង្រៀន គឺជាភ្នាក់ងារដ៏សំខាន់ក្នុងការលើកកម្ពស់លទ្ធផលសិក្សារបស់សិស្ស។ ការបង្កើនគុណភាព និងឧត្តមភាពរបស់គ្រូបង្រៀន គឺជាកត្តាគន្លឹះ ដោយក្រសួងនឹងបន្តកំណែទម្រង់សាលាគរុកោសល្យ ពោលគឺការប្រែក្លាយសាលាគរុកោសល្យឱ្យក្លាយទៅជាមជ្ឈមណ្ឌលឧត្តមភាពក្នុងការបណ្តុះបណ្តាល និងវិក្រឹតការគ្រូបង្រៀនគ្រប់កម្រិត ដើម្បីធានាបាននូវគុណភាព និងឧត្តមភាព ឆ្លើយតបនឹងតម្រូវការក្នុងបរិបទថ្មីនេះ។

រដ្ឋមន្រ្តីក្រសួងអប់រំ បន្ថែមថា ការអភិវឌ្ឍគ្រូបង្រៀន ត្រូវការនូវគោលនយោបាយអប់រំគ្រូបង្រៀនដែលគ្រប់ជ្រុងជ្រោយ និងឆ្លើយតបទៅនឹងការផ្លាស់ប្តូរនៃតម្រូវការអប់រំជាតិ ការអភិវឌ្ឍសេដ្ឋកិច្ច-សង្គម និងការលើកកម្ពស់ឋានៈរបស់គ្រូបង្រៀននៅក្នុងសង្គម។ ហេតុដូចនេះហើយ ទើបគោលនយោបាយស្តីពីគ្រូបង្រៀន ត្រូវបានអភិវឌ្ឍ និងកែលម្អជាបន្តបន្ទាប់ ដើម្បី ទី១.ទាក់ទាញ និងលើកទឹកចិត្តអ្នកមានសមត្ថភាពឱ្យប្រកបវិជ្ជាជីវៈជាគ្រូបង្រៀន, ទី២. ធានាការបណ្តុះបណ្តាលមុនពេលបម្រើការងារជាគ្រូបង្រៀន, ទី៣. ធានាការអភិវឌ្ឍវិជ្ជាជីវៈគ្រូបង្រៀនក្នុងពេលបម្រើការងារជាប់ជាប្រចាំ និង ទី៤. ធានាលក្ខខណ្ឌចាំបាច់ចំពោះគ្រូបង្រៀនក្នុងការបំពេញការងារប្រកបដោយប្រសិទ្ធភាព និងភាពស័ក្ដិសិទ្ធ។

ដើម្បីឱ្យទិវាគ្រូបង្រៀនកាន់តែត្រូវបានចាត់ទុកជាទិវាដ៏មានសារៈសំខាន់ ឯកឧត្តមបណ្ឌិតសភាចារ្យ ហង់ជួន ណារ៉ុន ស្នើដល់ក្មួយៗសិស្សានុសិស្ស និស្សិត និងយុវជន ព្រមទាំងប្រជាពលរដ្ឋគ្រប់រូប គប្បីប្រកាន់ខ្ជាប់នូវកតញ្ញូតាធម៌ តាមរយៈការតបស្នងសងគុណដោយប្រការផ្សេងៗគ្រប់ពេលវេលា និងគ្រប់មធ្យោបាយ ដែលជាប្រពៃណីដ៏ល្អផូរផង់របស់ជាតិយើង។ ឯកឧត្តម ក៏ស្នើដល់លោកឪពុក អ្នកម្ដាយ និងអ្នកអាណាព្យាបាលទាំងអស់នៅទូទាំងប្រទេស សូមចូលរួមចំណែកឱ្យកាន់តែសកម្មខ្លាំងក្លាថែមទៀត ក្នុងការជួយអប់រំកូនចៅឱ្យចេះគោរពឱនលំទោន មានចរិយាល្អ មានគុណធម៌ និងចេះដឹងគុណគ្រូ ដោយសារពួកគាត់បានបង្ហាត់បង្រៀនឱ្យកូនចៅរបស់យើងមានចំណេះដឹង ជំនាញ សមត្ថភាព ទេពកោសល្យ ដឹងខុស ដឹងត្រូវ ស្គាល់ល្អ ស្គាល់អាក្រក់ យល់ការណ៍រាក់ជ្រៅ និងកសាងអនាគតបានភ្លឺស្វាង និងរុងរឿង។

សម្រាប់ យុវសិស្ស វ៉ាន ច័ន្ទសុវណ្ណ ជាសិស្សថ្នាក់ទី១២ នៃវិទ្យាល័យសម្ដេចកិតិ្តព្រឹត្តបណ្ឌិតប៊ុនរ៉ានីហ៊ុនសែនដើមឬស និយាយថា រូបគេពិតជាអរគុណដល់លោកគ្រូ អ្នកគ្រូដែលបានខិតខំបង្រៀនចាប់តាំងពីថ្នាក់មត្តេយ្យសិក្សារហូតដល់ថ្នាក់វិទ្យាល័យ ដោយផ្ដល់ចំណេះដឹង យកចិត្តទុក្ខដាក់បង្រៀន និងអាចឱ្យរូបគេសម្រេចនូវគោលបំណងដែលប៉ងទុកតាំងពីតូច។

សិស្សថ្នាក់ទី១២ រូបនេះ បញ្ជាក់ថា រូបគេគោរពស្រឡាញ់លោកគ្រូ អ្នកគ្រូបង្រៀនគ្រប់មុខវិជ្ជាទាំងអស់ ព្រោះពួកគាត់បានលះបង់ពេលវេលា និងទឹកចិត្តមកបង្ហាត់បង្រៀនខ្លួនលោកឱ្យមានចំណេះដឹង និងសីលធម៌ល្អសម្រាប់ការរស់នៅក្នុងសង្គម។ ច័ន្ទសុវណ្ណ ប្ដេជ្ញាចិត្តថា នឹងរស់នៅធ្វើជាពលរដ្ឋល្អក្នុងសង្គម ខិតខំសិក្សារៀនសូត្រ ដោយប្រព្រឹត្តតែអំពើល្អដែលសង្គមទទួលស្គាល់ និងជៀសវាងអំពើមិនល្អ។

លោក សឹម ឆៃ ជាគរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ​ នៃវិទ្យាស្ថានជាតិអប់រំ មានប្រសាសន៍ថា លោកបានឆ្លងកាត់ការសិក្សារៀនសូត្រពីលោកគ្រូ អ្នកគ្រូ តាំងពីកម្រិតថ្នាក់បឋមសិក្សា រហូតដល់សាកលវិទ្យាល័យ ហើយបានបន្តក្តីស្រមៃប្រែក្លាយជាការពិត គឺជាគរុនិស្សិតដែលត្រៀមខ្លួនជាគ្រូបង្រៀនមួយរូបនៅពេលដ៏ខ្លីខាងមុខ។

គរុនិស្សិតបរិញ្ញាបត្រ+២ ឯកទេសអក្សរសាស្រ្តខ្មែរ​ នៃវិទ្យាស្ថានជាតិអប់រំ រូបនេះ បញ្ជាក់បន្ថែមថា លោកគ្រូ អ្នកគ្រូ គឺជាអ្នកត្រួសត្រាយបង្ហាញផ្លូវ ទើបនាំលោកឱ្យឈានមកដល់ទីនេះ។ “មានគ្រូបង្រៀន ទើបខ្ញុំមានថ្ងៃនេះ”។

លោក សឹម ឆៃ បានថ្លែងអំណរគុណ និងគោរពជូនពរ លោកគ្រូ អ្នកគ្រូទាំងអស់ សូមមានសុខភាពល្អ មានសុខសុវត្ថិភាព ជោគជ័យគ្រប់ភារកិច្ចការងារ និងក្លាយជាគ្រឹះដ៏រឹងមាំក្នុងការកសាងមូលធនមនុស្សនៅកម្ពុជាឱ្យកាន់តែរីចម្រើន។

គួរជម្រាបជូនថា ឆ្នាំ២០២៤នេះ ទិវាគ្រូបង្រៀន ៥តុលា បានកំណត់យកប្រធានបទ “ការអភិវឌ្ឍគ្រូបង្រៀន គឺអភិវឌ្ឍមូលធនមនុស្សឆ្ពោះទៅរកចក្ខុវិស័យកម្ពុជាឆ្នាំ២០៥០” គឺដើម្បីបង្ហាញអំពីទិសដៅគោលនយោបាយរបស់ក្រសួងអប់រំ យុវជន និងកីឡា ក្នុងការចូលរួម និងកសាងមូលដ្ឋានគ្រឹះពាក់ព័ន្ធនឹងការអភិវឌ្ឍគ្រូបង្រៀន តាមរយៈកំណែទម្រង់សាលាគរុកោសល្យគ្រប់ជ្រុងជ្រោយ ស្របតាមខ្លឹមសារនៃយុទ្ធសាស្ត្របញ្ចកោណ-ដំណាក់កាលទី១ ដែលបានកំណត់យកអាទិភាពគន្លឹះ៥ គឺ “មនុស្ស ផ្លូវ ទឹក ភ្លើង និងបច្ចេកវិទ្យា” សម្រាប់ឆ្លើយតបទៅនឹងបដិវត្តកម្មឧស្សាហកម្ម៤.០ និងបរិវត្តកម្មសេដ្ឋកិច្ចនិងសង្គមឌីជីថលនៅកម្ពុជា ព្រមទាំងតម្រូវការក្នុងការលើកកម្ពស់ផលិតភាពសេដ្ឋកិច្ច ដែលជាគ្រឹះដ៏សំខាន់ក្នុងការសម្រចបានចក្ខុវិស័យកម្ពុជាឆ្នាំ២០៥០៕