គម្រោង​សហគមន៍ “Meet Me Meet My Major” ឬ “ជំនាញខ្ញុំ” ដែលបង្កើត​ឡើង​ដោយយុវទូត​និស្សិត នៃ​សាកលវិទ្យាល័យ​អន្តរជាតិផារ៉ាហ្គន គ្រោងនឹងធ្វើបេសកកម្ម ទៅកាន់វិទ្យាល័យ​ចំនួន៣ ក្នុងខេត្ត​កំពង់ស្ពឺ និង​កំពត នៅដើមខែសីហា​ខាងមុខនេះ ដើម្បីចែករំលែកចំណេះដឹង ព័ត៌មាន និង​គន្លឹះក្នុងការ​ជ្រើសរើសជំនាញ​នៅ​ថ្នាក់ឧត្តមសិក្សា ទៅ​ដល់សិស្សានុសិស្ស​ដែលកំពុងសិក្សាថ្នាក់ទី១២ ត្រៀម​ប្រឡង​សញ្ញាបត្រមធ្យមសិក្សា​ទុតិយភូមិ​នៅ​ពេលខាងមុខ។

លោក សយ សីហទេវន្ត ប្រធានក្រុមយុវទូតនិស្សិត នៃសាកលវិទ្យាល័យ​អន្តរជាតិផារ៉ាហ្គន បាន​ឱ្យដឹងថា នៅដើមខែសីហានេះ ពោលគឺពីថ្ងៃទី៣ ដល់ថ្ងៃទី៥ ខែសីហា ឆ្នាំ​២០២៣ ក្រុមយុវជន​និស្សិត​ នៃសាកលវិទ្យាល័យអន្តរជាតិផារ៉ាហ្គន នឹងចុះទៅកាន់វិទ្យាល័យ​ចំនួន៣ គឺ វិទ្យាល័យ​កំពង់ស្ពឺ នៅ​ក្នុងខេត្ត​កំពង់ស្ពឺ, វិទ្យាល័យ​ហ៊ុនសែនឈូក និង​វិទ្យាល័យ​មិត្តភាព​កម្ពុជា-ជប៉ុន​កំពតក្រុង នៅខេត្តកំពត ដើម្បីចែកជូននូវចំណេះដឹង និងបទពិសោធន៍​ទៅកាន់សិស្សថ្នាក់ទី១២ ក្នុងការ​​ត្រៀម​ខ្លួន​យកនិទ្ទេស A នៅក្នុងការប្រឡងបាក់ឌុបខាងមុខ ហើយពេល​ប្រឡងចប់ តើគាត់គួរបន្ត​សិក្សា​នៅ​ខេត្ត ឬក៏​បន្តឡើង​មក​ភ្នំពេញ។

ក្នុងនោះ ក្រុមយុវទូតនិស្សិត ក៏​នឹងចែករំលែកបទពិសោធន៍ និង​ចំណេះដឹងពីជីវិតជានិស្សិត​នៅភ្នំពេញ ក៏​ដូចជាចំណេះដឹងក្នុងការជ្រើសរើសជំនាញដែលខ្លួនពេញចិត្ត​នៅ​តាម​មហាវិទ្យាល័យ ព្រមជាមួយ​នឹង​ការ​រៀន​នូវ​មុខ​វិជ្ជាទាំងនោះ​ផងដែរ។ ក្រៅពីនេះ ក្រុមយុវទូតនិស្សិតក៏នឹងណែនាំឱ្យស្គាល់ពីឧកាសអាហារូបករណ៍​​ដែលមាននៅភ្នំពេញទៀតផង។

បើតាមប្រធានក្រុមយុវទូតនិស្សិត វាគ្មិនដែលនឹង​ចូលរួម​ក្នុងការ​ចែករំលែក​គន្លឹះក្នុងការប្រឡងបាក់ឌុប ក៏ដូចជាបទពិសោធន៍​រស់​នៅ​រាជធានីភ្នំពេញ គឺសុទ្ធសឹងតែជា​អតីតនិស្សិតនិទ្ទេស A ដែលមានបទពិសោធន៍​ក្នុង​ការ​ប្រឡង​ទទួលបានពិន្ទុល្អ ។

វាគ្មិនរបស់យើងគាត់ជាអតីតសិស្សនិទ្ទេស A ផ្ទាល់… បន្ទាប់មក​យើងចែករំលែកនូវបទពិសោធន៍​ដែលរស់នៅភ្នំពេញថា យើងរស់នៅភ្នំពេញយើង​ជួបបញ្ហាអីគេខ្លះ គាត់នឹងចែកបទពិសោធន៍ផ្ទាល់…ហើយ​នឹង​មានការ​ចែក​រំលែកពីឱកាស​អាហារូបករណ៍ទៅរៀននៅភ្នំពេញ ក៏​ដូចជាអាហារូបករណ៍​ទៅរៀន​នៅបរទេស…

លោក សយ សីហទេវន្ត ប្រធានក្រុមយុវទូតនិស្សិត នៃសាកលវិទ្យាល័យ​អន្តរជាតិផារ៉ាហ្គន

សម្រាប់​បេសកកម្មគម្រោង ​សហគមន៍ “Meet Me Meet My Major” ឬ “ជំនាញខ្ញុំ” ទៅកាន់ខេត្ត​កំពង់ស្ពឺ និង​ខេត្តកំពតនេះ លោក សយ សីហទេវន្ត ព្រមទាំង​ក្រុមការងាររំពឹងថា ប្អូនៗ​សិស្សថ្នាក់ទី១២ នឹងអាចទទួលយកគន្លឹះ ទៅ​ប្រើប្រាស់បាន ដើម្បីសម្រេចគោលដៅ ដូចជាប្រឡង​យកនិទ្ទេស​ល្អ ក៏ដូចជានិទ្ទេស A ហើយ​ប្រសិន​បើពួកគេ​មាន​បំណង​ឡើង​មក​កាន់រាជធានីភ្នំពេញ​ដើម្បីបន្ត​ការ​សិក្សា ពួកគេ​ក៏អាចយកបទពិសោធន៍ និង​ចំណេះដឹងដែលក្រុមយុវទូតនិស្សិតធ្វើការចែករំលែក ទុកជាស្ពានសម្រាប់ការត្រៀមសម្របខ្លួនទៅតាមបរិបទថ្មី ដែលត្រូវរស់នៅភ្នំពេញ​​ និង​ការ​ជ្រើសរើសជំនាញ ក៏​ដូចជាស្វែងរក និង​​ដាក់ពាក្យ​អាហារូបករណ៍៕