វិទ្យាស្ថានសិក្សា និងបណ្ដុះបណ្ដាលវិជ្ជាជីវៈជាច្រើនបាន​ចូលរួមដាក់ស្តង់របស់ខ្លួន ដើម្បីផ្ដល់ព័ត៌មានសិក្សាជំនាញវិជ្ជាជីវៈវគ្គខ្លីនៅក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ ក្រោមប្រធានបទ «TVET រៀនឱ្យចប់ ឱ្យចេះ ឱ្យមានការងារធ្វើ» ដែលប្រព្រឹត្តទៅរយៈពេល២ថ្ងៃគឺថ្ងៃទី១៥-១៦ ខែមិថុនា​ឆ្នាំ២០២៤។

អ្នកស្រី នួន ចន្ថន ជាគ្រូបច្ចេកទេស និងអ្នកទទួលបន្ទុកផ្នែកសិស្សចុះឈ្មោះសិក្សាអាហារូបករណ៍នៃកម្មវិធីសិក្សា១លាន៥សែននាក់ នៃវិទ្យាស្ថានបច្ចេកទេស ហ្ស៊ី វ៉េ សេ (JCV) បានលើកឡើងថា​ ក្នុងឱកាសទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ ក្រោមប្រធានបទ «TVET រៀនឱ្យចប់ ឱ្យចេះ ឱ្យមានការងារធ្វើ» ខាងវិទ្យាស្ថានបច្ចេកទេស ហ្ស៊ី វ៉េ សេ មានផ្ដល់ និងបង្ហាញព័ត៌មានអំពីការសិក្សាជំនាញវគ្គវែង និងវគ្គខ្លីដោយការសិក្សាវគ្គខ្លីនេះផ្ដោតទៅលើការសិក្សាជំនាញក្នុងកម្មវិធី១លាន៥សែននាក់។

គ្រូបច្ចេកទេសរូបនេះបានបន្តថា សម្រាប់វិទ្យាស្ថានបច្ចេកទេស ហ្ស៊ី វ៉េ សេ ផ្ទាល់មានវគ្គសិក្សាខ្លីអំពីរថយន្ត មានការសិក្សាជំនាញបីគឺ ការថែទាំ និងជួសជុលរថយន្ត, ការថែទាំ និងជួសជុលអគ្គិសនីរថយន្ត, ការថែទាំ និងជួសជុលម៉ាស៊ីនត្រជាក់រថយន្ត។ អ្នកស្រីបន្តថា ក្រោយបញ្ចប់ការសិក្សាជំនាញវគ្គខ្លីនេះ សិស្សមានឱកាសចុះកម្មសិក្សាជាមួយក្រុមហ៊ុនជាដៃគូ និងឱកាសទទួលបានការងារធ្វើផងដែរ។ អ្នកស្រីបន្ថែមថា ការសិក្សាជំនាញនេះយុវជនត្រូវមានអាយុចាប់ពី១៥ឆ្នាំឡើង ជាយុវជនមកពីគ្រួសារក្រីក្រ និងគ្រួសារងាយរងគ្រោះ ដោយគ្រាន់តែភ្ជាប់អត្តសញ្ញាណបណ្ណសញ្ជាតិខ្មែរ ឬសំបុត្រកំណើត និងមានបណ្ណក្រីក្រ១ ក្រីក្រ២ និងបណ្ណងាយរងហានិភ័យ។

ទន្ទឹមនឹងនេះ លោក ឡា សុវណ្ណដារ៉ូ ជាគ្រូបង្រៀន និងអ្នកទទួលបន្ទុកផ្នែកសិស្សចុះឈ្មោះសិក្សាអាហារូបករណ៍នៃកម្មវិធីសិក្សា១លាន៥សែននាក់ នៃវិទ្យាស្ថានពហុបច្ចេកទេសព្រះកុសុមៈ(PPI) បានប្រាប់មកកាន់​ AMS ថា PPI មានការសិក្សាជំនាញវគ្គវែង និងវគ្គខ្លីជាច្រើនជំនាញដែលសិស្សអាចជ្រើសរើសសិក្សាបានជាពិសេសការសិក្សាវគ្គខ្លីមាន១៤ជំនាញសម្រាប់ជ្រើសរើស។

ជាមួយគ្នានេះ ជំនាញវគ្គខ្លីសម្រាប់កម្មវិធី TVET ១លាន៥សែននាក់ រួមមាន៧មុខជំនាញដូចជា ជំនាញសេវាកម្មបរិក្ខាត្រជាក់ក្នុងគេហដ្ឋាន ការដំឡើងបណ្ដាញអគ្គិសនីក្នុងអគារ ការរចនាក្រាហ្វិចដោយកុំព្យូទ័រ សេវាកម្មកុំព្យូទ័រ ការថែទាំ និងជួសជុលម៉ូទ័រអគ្គិសនី ការដំឡើងប្រព័ន្ធបញ្ជាម៉ូទ័រអគ្គិសនី និងជំនាញសេវាកម្មអតិថិជន។ លោក ឡា សុវណ្ណដារ៉ូ បន្ថែមថា ជំនាញវគ្កខ្លីដែលអាហារូបករណ៍ផ្ដល់ជូនសម្រាប់សិក្សាមានរយៈពេល៤ខែ ដែលមានវេនសិក្សាច័ន្ទ-សុក្រ និងរយៈពេល៨ខែសម្រាប់វគ្គយប់ និងរយៈពេល១០ខែសម្រាប់វេនសៅរ៍-អាទិត្យ។

ជារួម លោកគ្រូ អ្នកគ្រូទាំងពីររូបសូមលើកទឹកចិត្តដល់សិស្សានុសិស្ស និងយុវជនចូលរួមក្នុងទិវានេះឱ្យបានច្រើនកុះករ ដើម្បីស្វែងយល់អំពីការសិក្សាជំនាញវគ្គខ្លី ឱ្យរៀនចេះ រៀនចប់ និងមានការងារធ្វើ៕