ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – មានប្រសាសន៍លើកឡើងនៅក្នុងកម្មវិធី កតញ្ញូ ដែលរៀបចំឡើងដោយសាកលវិទ្យាល័យបញ្ញាសាស្រ្តកាលពីថ្ងៃទី១៤ កុម្ភៈ លោកជំទាវ ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា បានបញ្ជាក់ថា ការប្រព្រឹត្តិនូវអំពើល្អក៏ជាការឆ្លុះបញ្ចាំងពីក្ដីស្រឡាញ់ទៅកាន់អ្នកជុំវិញខ្លួនដែរ តាមរយៈការផ្តល់ស្នាមញញឹមមួយទៅកាន់អ្នកដទៃ ទៅកាន់នរណាម្នាក់ ដែលអាចធ្វើឱ្យគេសប្បាយចិត្ត។
ពាក់ព័ន្ធនឹងថ្ងៃ១៤ កុម្ភៈ ជាថ្ងៃនៃក្តីស្រឡាញ់វិញ លោកជំទាវអនុរដ្ឋលេខាធិការមានប្រសាសន៍ដោយចោទជាសំណួរថា ហេតុអ្វីបានជាថ្ងៃមួយនេះ ជាថ្ងៃពិសេសជាងគេ? តែយ៉ាងណាបើតាមលោកជំទាវ យុវជនគួរបង្វែរថ្ងៃ១៤កុម្ភៈ ឱ្យចូលទៅជាអត្ថន័យជ្រាលជ្រៅ នៃសណ្តានចិត្តរបស់យើងវិញ ហើយសូមកុំឱ្យលើកតម្លៃថា ថ្ងៃនៃក្ដីស្រឡាញ់ ជាថ្ងៃត្រូវបរិច្ចាគ ត្រូវលះបង់អ្វីដែលជាលក្ខណៈមិនសមហេតុផល។ ហើយមួយវិញទៀតការផ្តល់អ្វីមួយទៅកាន់អ្នកដែលខ្វះខាត ក៏ប្រៀបដូចជាកំពុងតែបញ្ជ្រាបនូវសេចក្ដីមេត្តា និងក្ដីស្រឡាញ់ជាមួយគ្នានោះ។
លោកជំទាវ ទន់ សាអ៊ីម
“តើសេចក្ដីល្អពិបាកធ្វើទេ? ធ្លាប់ឮគេនិយយាយថាធ្វើល្អពិបាកដូចឡើងភ្នំ ប៉ុន្តែពេលធ្វើអាក្រក់ដូចរមៀលពីលើភ្នំ ត្រង់ចំណុចនេះខ្ញុំមើលឃើញថា វាគ្រាន់តែជាទស្សនៈប៉ុណ្ណោះ ប៉ុន្តែការពិត ការធ្វើល្អមិនពិបាកនោះទេ”
លោកជំទាវ ទន់ សាអ៊ីម បន្តថា ការផ្តល់ជាក្ដីករុណា មេត្តា ដល់អ្នកជុំវិញខ្លួន អ្នកដែលត្រូវការជំនួយ គឺសុទ្ធតែធ្វើឱ្យគេទទួលបាននូវភាពកក់ក្តៅ និងក្ដីសង្ឃឹម ដោយនេះគឺជាទង្វើល្អ ដូច្នេះហើយយើងធ្វើល្អបានច្រើនវិធីណាស់ ហើយមិនចាំបាច់រើសពេលទេ ព្រោះពេលណាក៏អាចធ្វើបានដែរ។
ឆ្លៀតក្នុងឱកាសនោះដែរ លោកជំទាវ ទន់ សាអ៊ីម ក៏បានផ្តល់ដំបូន្មានទៅដល់សិស្ស និស្សិត ដោយគួរខិតខំដុះខាត់ជំនាញដែលខ្លួនរៀន កុំមានមោទនភាពខ្លាំងពេក ហើយក៏កុំលះបង់នូវការព្យាយាម ការតាំងចិត្តរបស់ខ្លួន ដោយធ្វើយ៉ាងណារក្សាឱ្យបាននូវគុណធម៌របស់ខ្លួនឯង៕
