ភ្នំពេញ – មជ្ឈមណ្ឌលអន្តេវាសិកនិស្សិតរបស់ក្រសួងអប់រំ យុវជន និងកីឡា ស្ថិតនៅរាជធានីភ្នំពេញ កំពុងក្លាយជាផ្នែកមួយ នៃការគាំទ្រនិងលើកកម្ពស់ការអប់រំនៅកម្ពុជា តាមរយៈផ្តល់ទីកន្លែងស្នាក់នៅឥតគិតថ្លៃដល់និស្សិតនារីក្រីក្រ និងនិស្សិតនារីពិការ ចាប់ពីឆ្នាំទី១ មកពីបណ្តាខេត្តនានា ។ ជារៀងរាល់ឆ្នាំមជ្ឈមណ្ឌលអន្តេវាសិកនិស្សិតមាននិស្សិតស្នាក់នៅចំនួន ៧៤៥ នាក់ ក្នុងនោះមាននិស្សិតនារីចំនួន ៥៩៨នាក់ក្នុងមួយឆ្នាំ ។

ឯកឧត្តមបណ្ឌិត រស់ សុវាចា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា នៅឆ្នាំ២០២៣ មជ្ឈមណ្ឌលអន្តេវាសិកបានជ្រើសរើសនិស្សិតនារីមកពីបណ្តាខេត្តចំនួន ៨០នាក់ ។ ចំនួននិស្សិតនារីដែលបានជ្រើសរើសឱ្យចូលស្នាក់នៅ អាចប្រែប្រួលទៅតាមឆ្នាំសិក្សានីមួយៗ ជំនួសនិស្សិតដែលបញ្ចប់ការសិក្សាថ្នាក់បរិញ្ញាបត្រឆ្នាំទី៤ និង ឆ្នាំទី៥ ក្នុងឆ្នាំនីមួយៗ ។

ទន្ទឹមគ្នានេះ ឯកឧត្តមបណ្ឌិត រស់ សុវាចា បានបញ្ជាក់បន្ថែមថា លក្ខខណ្ឌជ្រើសរើសនិស្សិតនារីដោយផ្អែកលើលក្ខខណ្ឌតម្រូវមានដូចជា ១. បេក្ខជនពិការ, ២. កូនកំព្រា, ៣. គ្រួសារមានកូនច្រើន, ៤. គ្រួសារក្រីក្រ និង ៥. បេក្ខជនមកពីខេត្តដាច់ស្រយាល និងតំបន់ជួបការលំបាក ។ ពេលនិស្សិតដាក់ពាក្យស្នើសុំនៅតាមគ្រឹះស្ថានសិក្សានីមួយៗ មិនមានបង់ថ្លៃនោះទេ ប៉ុន្តែពេលបានជ្រើសរើសឱ្យចូលស្នាក់នៅរួច និស្សិតចូលរួមវិភាគទាន ១២ម៉ឺនរៀល ឬ៣០ដុល្លារក្នុងមួយឆ្នាំ ។

បើតាមព័ត៌មានទទួលបានពីក្រសួងអប់រំ យុវជន និងកីឡា មជ្ឈមណ្ឌលអន្តេវាសិកនិស្សិតមាន ៧អគារ ដោយក្នុងនោះអគារ A, C, F និស្សិតនារីស្នាក់នៅបានចំនួន៤៨០ នាក់ សម្រាប់និស្សិតឆ្នាំ១ ដល់ឆ្នំា៥ ។ អគារ B, E សម្រាប់និស្សិតសាលាតិចណូស្នាក់នៅបាន ១១៥នាក់ ក្នុងនោះស្រី ៥៣នាក់ ។ អគារ D និងអគារ ៧ជាន់សម្រាប់និស្សិតអាហារូបករណ៍បរទេសចិន ឡាវ និងវៀតណាម អាចស្នាក់នៅបាន ១៥០នាក់ ក្នុងនោះមានស្រី ៦៥នាក់ ។ សរុបទាំងអស់មាននិស្សិតស្នាក់នៅក្នុងមជ្ឈមណ្ឌលអន្តេវាសិកនិស្សិតចំនួន ៧៤៥នាក់ក្នុងមួយឆ្នាំ ។

សូមជម្រាបថា ជារៀងរាល់ឆ្នាំក្រសួងអប់រំ យុវជន និងកីឡា តែងតែជ្រើសរើសនិស្សិតនារីក្រីក្រពីបណ្តា ២៥រាជធានី-ខេត្ត ចំនួន ១០០ ទៅ ១២០នាក់ ឱ្យស្នាក់នៅក្នុងមជ្ឈមណ្ឌលអន្តេវាសិកនិស្សិតនារីរបស់ក្រសួងអប់រំ យុវជន និងកីឡា មានទីតាំងក្បែរវិទ្យាស្ថានបច្ចេកវិទ្យាកម្ពុជា (សាលាតិចណូ) ៕