ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងកម្មវិធីសំណេះសំណាលជាមួយនិស្សិតអាហារូបករណ៍អឺរ៉ាស្មូសផ្លឹស (ERASMUS+) នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ កាលពីពេលកន្លងទៅថ្មីៗនេះ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ដោយលើកទឹកចិត្តដល់និស្សិតអាហារូបករណ៍អឺរ៉ាស្មូសផ្លឹស ខិតខំសិក្សាក្រេបយកចំណេះដឹងពីប្រទេសបារាំង ដើម្បីក្លាយជាធនធានមនុស្សកម្ពុជាដ៏មានសក្តានុពល។
រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា នៅឆ្នាំនេះ កម្មវិធីអាហារូបករណ៍អឺរ៉ាស្មូសផ្លឹស (ERASMUS+) ក៏មាននិស្សិតកម្ពុជាជាស្រ្តីម្នាក់អាចបន្តជាប់អាហារូបករណ៍របស់រដ្ឋាភិបាលបារាំង, ក្នុងន័យនេះ លោកជំទាវមើលឃើញថា កម្មវិធីអាហារូបករណ៍នេះ មិនត្រឹមតែបង្ហាញពីចក្ខុវិស័យលើការអភិវឌ្ឍធនធានមនុស្សសម្រាប់កម្ពុជានោះទេ ក៏ប៉ុន្តែក៏បង្ហាញពីសមភាពយេនឌ័រនៅក្នុងវិស័យអប់រំកម្ពុជា ជាពិសេសលើថ្នាលបច្ចេកវិទ្យា និងជំនាញបច្ចេកទេស។
លោកជំទាវ សុវណ្ណ វណ្ណារតន៍ បានគូសបញ្ជាក់បន្ថែមថា អាហារូបករណ៍អឺរ៉ាស្មូសផ្លឹស (ERASMUS+) គឺជាលទ្ធផលផ្លែផ្កានៃទំនាក់ទំនងល្អលើកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋបារាំង។
ជាមួយគ្នានេះ លោកជំទាវសង្ឃឹមយ៉ាងមុតមាំថា និស្សិតកម្ពុជាដែលនឹងទៅបន្តការសិក្សានៅសាធារណរដ្ឋបារាំងទាំងអស់នឹងចេះស្រលាញ់គ្នា ចេះជួយគ្នាទៅវិញទៅមក ហើយនឹងខិតខំសិក្សារៀនសូត្រពង្រឹងសមត្ថភាពឱ្យបានខ្ពស់ ដើម្បីត្រឡប់មកកាន់មាតុភូមិវិញប្រកបដោយលទ្ធផលផ្លែផ្កាសម្រាប់ជាធនធានមនុស្សកម្ពុជាដ៏មានសក្តានុពល។
គួរជម្រាបជូនថា និស្សិតកម្ពុជាដែលជាប់ជ័យលាភីអាហារូបករណ៍អឺរ៉ាស្មូសផ្លឹស (ERASMUS+) ទៅបន្តការសិក្សានៅប្រទេសបារាំង ឆ្នាំសិក្សា២០២៥-២០២៦ មានចំនួន៣រូប ក្នុងនោះក៏មានស្រ្តី១រូបដែរ៕
