ពិភពលោកវិវត្តយ៉ាងលឿនស្របជាមួយបច្ចេកវិទ្យាទំនើបកំពុងរីកចម្រើនឥតឈប់ឈរ ប៉ុន្តែវាក៏បានជះឥទ្ធិពលមកលើការរស់នៅរបស់មនុស្សផងដែរ។ ទន្ទឹមគ្នានេះ ប្រសិនមនុស្សមួយក្រុមប្រកាន់គោលគំនិតរស់នៅដើម្បីតែផលប្រយោជន៍ផ្ទាល់ខ្លួន ហើយមិនគិតពីមនុស្សជុំវិញខ្លួន នោះនឹងនាំឱ្យបាត់គុណតម្លៃ។ តើមនុស្សត្រូវស្គាល់អំពីអត្ថន័យជីវិតបែបណាក្នុងយុគសម័យថ្មី?

អ្នកឧកញ៉ាវេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាលក្រុមហ៊ុន ម៉េងលី ជេ. គួច អេឌ្យូខេសិន មានប្រសាសន៍ថា ដើម្បីឱ្យយុវជនកម្ពុជាខ្លាំងពូកែ យុវជនចាំបាច់ត្រូវតែចេះ មានចំណេះដឹង និងដើរឱ្យទាន់ការវិវត្តនៃសង្គម។ ទន្ទឹមគ្នានេះ យុវជនត្រូវរៀនស្គាល់ខ្លួនឯង ស្គាល់ពីអត្ថន័យនៃជីវិតក្នុងយុគសម័យថ្មី ។

អ្នកឧកញ៉ាវេជ្ជបណ្ឌិត គួច ម៉េងលី បន្តថា ដើម្បីយុវជនអាចស្គាល់ខ្លួនឯង និងមានជីវិតរស់នៅល្អប្រសើរ មានកត្តាចំនួន រួមមាន ទី១. កែប្រែអត្តចរិត ឥរិយាបទ របៀបរស់នៅ ដោយធ្វើឱ្យជីវិតមានភាពភ្លឺស្វាងជាងអ្វីដែលយើងកំពុងគិត ដូចជា កុំតូចចិត្ត ពិបាកចិត្តហួសហេតុពេក, ទី២. មើលជីវិតក្នុងផ្លូវវិជ្ជមាន ហើយត្រូវក្លាហានហ៊ានប្រកួតប្រជែង និងរស់នៅក្នុងជីវិតមួយពេញលេញ, ទី៣. ចាប់យកអាជីពមួយឱ្យច្បាស់លាស់ ចង់បានអ្វីត្រូវតែមោះមុតដើម្បីសម្រេចជោគជ័យ, ទី៤. ស្វែងយល់ខ្លួនឯង ដឹងឱ្យច្បាស់អំពីក្ដីស្រមៃ កម្លាំងជំរុញចិត្ត ហើយធ្វើអ្វីក៏ដោយកុំសោកស្ដាយ ហើយឆាប់តូចចិត្ត ត្រូវខិតខំតស៊ូជាមួយការលំបាក។

សាស្រ្តាចារ្យបណ្ឌិត អ៊ុន លាង ព្រឹទ្ធបុរសមហាវិទ្យាល័យសង្គមសាស្រ្ត-មនុស្សសាស្រ្ត សាកលវិទ្យាល័យភូមិន្ទភ្នំពេញ មានប្រសាសន៍ថា ការរស់នៅរបស់មនុស្សត្រូវមានឆន្ទៈ និងរស់នៅដើម្បីសម្រេចគោលបំណងនៃក្ដីស្រមៃរបស់ខ្លួន ប៉ុន្តែមិនមែនសម្រាប់តែខ្លួនឯង គឺសម្រាប់មនុស្សជាតិ។ លោកសាស្រ្តាចារ្យបណ្ឌិត បន្តថា ទស្សនៈវិជ្ជានៅតែជារឿងសំខាន់បំផុតសម្រាប់ជាការណែនាំមនុស្ស និងជាប្រទីបសម្រាប់ការរស់នៅរបស់សង្គមកម្ពុជា។

គួរជម្រាបជូនថា បញ្ញត្តិ «ជីវិត» និង «អត្ថន័យនៃជីវិត» គឺជាការយល់ដឹងមួយដែលស្មុគស្មាញ និងទាមទារការស្វែងយល់ ការសិក្សា ការពិគ្រោះយោបល់ និងពិសោធន៍គ្រប់មធ្យោបាយដើម្បីអាចឈរនៅក្នុងទីតាំងណាមួយនៅក្នុងភាពជាបុគ្គល និងក្នុងសង្គមដែលបុគ្គលកំពុងតែរស់នៅ និងបញ្ហាស្មុគស្មាញនានាដែលកំពុងជួបប្រទះ៕