ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងឱកាសពិធីបុណ្យភ្ជុំបិណ្ឌ ដែលក៏ជាឱកាសប្រជាពលរដ្ឋខ្មែរដែលជាពុទ្ធសាសនិកតែងតែជួបជុំក្រុមគ្រួសារសាច់ញាតិ ក្រោយការនឹករលឹកអំពីការរស់នៅឆ្ងាយគ្នាព្រោះកត្តារៀងៗខ្លួន សម្រាប់និស្សិតខ្មែរដែលកំពុងរស់នៅ និងសិក្សានៅប្រទេសរុស្សីឯណោះវិញ ពួកគេក៏កំពុងតែមានក្ដីនឹករលឹកដល់ស្រុកកំណើត សាច់ញាតិបងប្អូនដែរ ។ ដើម្បីកាត់បន្ថយការនឹករលឹក និងចង់បង្ហាញពីការដឹងគុណ ក្រុមនិស្សិតទាំងនោះបានមូលមតិទៅធ្វើបុណ្យរួមគ្នានៅទីវត្តអារាមក្នុងប្រទេសរុស្ស៉ី។
លោក ខ្វែង ភារម្យ ប្រធានសមាគមនិស្សិតខ្មែរនៅប្រទេសរុស្សី បានប្រាប់ AMS Education ថា ក្នុងថ្ងៃបុណ្យទាន ឬបុណ្យជាតិនានា ជាពិសេសថ្ងៃបុណ្យចូលឆ្នាំខ្មែរ និងបុណ្យភ្ជុំបិណ្ឌដែលគ្រប់គ្នាអាចត្រឡប់ទៅស្រុកកំណើតជួបជុំឪពុកម្ដាយ និងសាច់ញាតិ ដោយឡែកនិស្សិតខ្មែរដែលកំពុងរស់នៅ និងសិក្សាក្រៅប្រទេសនានា ក៏ពិតជានឹកស្រុកកំណើតដូចគ្នា ប៉ុន្តែមិនអាចត្រឡប់ទៅក្នុងពេលនេះ ដូច្នេះមានតែការនឹករលឹកពីចម្ងាយ។
មិនខុសពីឆ្នាំមុនៗ នៅឆ្នាំនេះ លោក ខ្វែង ភារម្យ ព្រមទាំងនិស្សិតខ្មែរមួយចំនួន នឹងមានគ្រោងទៅវត្តមីយ៉ាន់ម៉ាក្នុងប្រទេសរុស្សីនាថ្ងៃទី២៩ ខែកញ្ញា ខាងមុខនេះ ដើម្បីយកតេយ្យទានទៅប្រគេនព្រះសង្ឃ និងបានធ្វើបុណ្យរួមគ្នាជាមួយបណ្ដាមិត្តនិស្សិតដទៃទៀត និងអាចជាកត្តាចម្បងដើម្បីកាត់បន្ថយការនឹកផ្ទះ នឹកស្រុកផងដែរ។
ប្រធានសមាគមនិស្សិតខ្មែរ នៅប្រទេសរុស្សីរូបនេះបន្ថែមថា ការទៅវត្តនេះ គឺអាចជួយឱ្យនិស្សិតខ្មែរទាំងអស់អាចនឹកឃើញអំពីទំនៀមទម្លាប់ខ្មែរនារដូវកាលបុណ្យភ្ជុំបិណ្ឌដែលតែងតែរៀបចំចង្ហាន់ ឬតេយ្យទានមួយចំនួនសម្រាប់ប្រគេនព្រះសង្ឃនៅទីវត្តអារាម ដើម្បីឧទ្ទិសកុសល្យទៅកាន់ញាត្តិកាទាំងប្រាំពីរសណ្ដានដែលបានចែកឋានទៅ។ លើសពីនេះក៏បានផ្ដល់ឱកាសជួបជុំគ្នាដល់និស្សិតខ្មែរ បានជួបជុំ ពិភាក្សា និងធ្វើបុណ្យរួមគ្នា កាត់បន្ថយការនឹកផ្ទះជាដើម ព្រោះនិស្សិតភាគច្រើនសុទ្ធតែជាប់រវល់ក្នុងការសិក្សារៀងខ្លួន ដូចនេះមិនសូវមានពេលបានជួបជុំគ្នាឡើយ។
សម្រាប់ លោក ខ្វែង ភារម្យ ផ្ទាល់ លោកពិតជាសប្បាយចិត្តដែលកូនខ្មែរដែលសិក្សានៅក្រៅប្រទេសគ្រប់រូបមិនបំភ្លេចនូវប្រពៃណីរបស់ខ្លួន បើទោះបីជាកំពុងរស់នៅឆ្ងាយប្រទេសកំណើតក្ដី។ លើសពីនេះ បានស្ដាប់ព្រះធម៌ ប្រគេនចង្ហាន់ទៅកាន់ព្រះសង្ឃ និងចែករំលែកនូវចំណេះដឹងថ្មីៗទៅគ្នាទៅវិញទៅមកជាមួយនិស្សិតខ្មែរដែលបានមកពីទីជិតឆ្ងាយ នៃប្រទេសរុស្សី និងជុំគ្នា។
គួរបញ្ជាក់ថា កន្លងមកជារៀងរាល់ឆ្នាំ ស្ថានទូតកម្ពុជាប្រចាំនៅប្រទេសរុស្សីតែងតែនិមន្តព្រះសង្ឃ ឬរៀបចំការជួបជុំឱ្យនិស្សិតខ្មែរទាំងអស់បានធ្វើបុណ្យ ញ៉ាំអាហារជុំគ្នា និងលេងល្បែងប្រជាប្រិយជាដើម។ ដោយឡែកឆ្នាំនេះពុំមានការរៀបចំពិធីធំដុំឡើយ ព្រោះប្រធានស្ថានទូត និងសិស្សនិស្សិតភាគច្រើនមានភារកិច្ច និងជាប់ការសិក្សារៀនសូត្រជាដើម៕
