ខណៈបច្ចុប្បន្ន​ មនុស្ស​ម្នា​កំពុង​តែជជែក​គ្នា​យ៉ាង​ផុសផុល​ពី​ភាពរីកចម្រើន​នៃវិទ្យាសាស្រ្ត និង​បច្ចេកវិទ្យា ដែល​ជះ​ឥទ្ធិពល​យ៉ាង​សម្បើម​ដល់​មនុស្ស​ជាតិ មហោស្រពអក្សរសិល្ប៍ខ្មែរ បានប្រកាស​ពី​កម្មវិធី​ “ប្រកួត​អក្សរសិល្ប៍ច្នៃប្រតិដ្ឋ” ដោយផ្តោត​សំខាន់លើប្រធានបទ “អក្សរសិល្ប៍​នាយុគសម័យថ្មី” ដោយ​ប្រកាស​ដល់អ្នកស្នេហាអក្សរសិល្ប៍ ដាក់ស្នាដៃចូលរួម​ប្រកួត ដោយ​អ្នក​និពន្ធ​អាច​ចាប់យក​ឱកាស​នេះ លើក​ឡើងពី​បញ្ហា​ប្រឈម​នានា​ក្នុងយុគសម័យថ្មី និង​ចូលរួម​ផ្តល់ដំណោះស្រាយ ដើម្បីជាទុនពុទ្ធិបន្ថែម​សម្រាប់​មនុស្សជាតិ។

លោក ចេង រតនា អ្នករៀបចំកម្មវិធីប្រកួតអក្សរសិល្ប៍ច្នៃប្រតិដ្ឋ មានប្រសាសន៍ថា នៅឆ្នាំនេះមហោស្រពអក្សរសីល្ប៍ខ្មែរ មិន​បានប្រារព្ធធ្វើ​ទេ ប៉ុន្តែ​មហោស្រព​​បានបង្កើត​កម្មវិធី “ប្រកួត​អក្សរសិល្ប៍ច្នៃប្រតិដ្ឋ” ឆ្នាំ២០២៥ ដោយផ្ដោតសំខាន់លើបញ្ហាប្រឈមនានាកំពុងកើតឡើងនាយុគសម័យថ្មីដែលយើងកំពុងស្ថិតនៅ ជាពិសេស ពាក់ព័ន្ធនឹងវិទ្យាសាស្ត្រ និងបច្ចេកវិទ្យាដែលកំពុងតែរីកចម្រើនយ៉ាងខ្លាំង។

បើតាមលោក ចេង រតនា អ្នកនិពន្ធអាចលើកឡើងពីបញ្ហាណាមួយ រួមទាំងដំណោះស្រាយដែលខ្លួនយល់ថាសមស្រប ដោយប្រើប្រាស់គំនិតច្នៃប្រតិដ្ឋផ្ទាល់ខ្លួន ដើម្បីបង្កើតដំណើររឿងមួយដ៏ទាក់ទាញ។

ចំពោះ​ស្នាដៃដែលដាក់ចូលរួម​ប្រកួត លោក រតនា បញ្ជាក់ថា កម្មវិធីនឹងទទួលក្រោមទម្រង់ជារឿងខ្លី និងកំណាព្យតែប៉ុណ្ណោះ ដោយ​មិនមែនជាសំណេរបែបតែងសេចក្ដីនោះទេ។ ស្របគ្នានេះ ផ្នែករឿងខ្លី សំណេរមិនត្រូវលើសពី ៨ទំព័រនៃក្រដាសទំហំ A4 ពុម្ពអក្សរទំហំ ១២ (Khmer Os Siemreap)។ ចំណែក ផ្នែកកំណាព្យ សំណេរមិនត្រូវលើសពី ៣ទំព័រ នៃក្រដាសទំហំ A4 ពុម្ពអក្សរទំហំ ១២ (Khmer Os Siemreap)។

សម្រាប់កម្មវិធីប្រកួតអក្សរសិល្ប៍ច្នៃប្រតិដ្ឋឆ្នាំនេះ លោក ចេង រតនា ចង់ឃើញស្នាដៃអក្សរសិល្ប៍មានចំនួនកាន់តែច្រើនឡើងៗ ប៉ុន្តែប្រកបដោយគុណភាព និងភាពច្នៃប្រតិដ្ឋ ហើយថែមទាំងអាចផ្ដល់ជាចំណេះដឹងដល់អ្នកអានវិញទៀតផង។ ជាមួយគ្នានេះដែរ លោកក៏ចង់ឃើញយុវជនកាន់តែច្រើនចូលរួមបង្ហាញស្នាដៃរបស់ខ្លួន ជាពិសេសអ្នកដែលចូលចិត្តតែងនិពន្ធ ប៉ុន្តែមិនដែលដាក់ស្នាដៃចូលរួមប្រកួតសោះ។

“នេះជាឱកាសហើយដែលពួកគេអាចសាកល្បងសមត្ថភាពលើការតែងនិពន្ធរបស់ខ្លួន ហើយបន្តវិវត្តខ្លួនទៅមុខទៀតបន្ទាប់ពីពួកគាត់បានសាកល្បងដោយជោគជ័យ”

សម្រាប់លក្ខខណ្ឌនៃការដាក់ពាក្យ ត្រូវតែជាបទនិពន្ធថ្មី មិនចម្លងពីអ្នកដទៃ មិនធ្លាប់ជាប់រង្វាន់ពីមុន ឬត្រូវបានផ្សាយជាសាធារណៈ។ ក្នុងនោះ បេក្ខជនម្នាក់អាចដាក់បានច្រើនបំផុត ២ស្នាដៃ (អាចជារឿងខ្លីទាំង២ កំណាព្យទាំង២ ឬរឿងខ្លី១ កំណាព្យ ១)។ បេក្ខជនត្រូវផ្ញើស្នាដៃជា Word និង PDF ហើយមិនត្រូវបង្ហាញឈ្មោះ ឬអត្តសញ្ញាណផ្ទាល់ខ្លួន ក្នុងផ្នែកណាមួយ នៃស្នាដៃឡើយ។ រង្វាន់ដែលទទួលបាន រួមមាន ជ័យលាភីលេខ១ ថវិកា ៨០ម៉ឺនរៀល និងបណ្ណសរសើរ ជ័យលាភីលេខ២ ថវិកា ៦០ម៉ឺនរៀល និងបណ្ណសរសើរ និងជ័យលាភីលេខ៣ ថវិកា ៤០ម៉ឺនរៀន និងបណ្ណសរសើរ។

ដូច្នេះសម្រាប់ កវី អ្នកនិពន្ធ អ្នកស្រាវជ្រាវ អ្នកប្រាជ្ញអក្សរសិល្ប៍ សាស្ត្រាចារ្យ អ្នកគ្រូ លោកគ្រូ សិស្ស និស្សិត អ្នកចូលចិត្តតែងនិពន្ធ ដែល​មាន​បំណងអាចដាក់ស្នាដៃអក្សរសិល្ប៍ច្នៃប្រតិដ្ឋរបស់ខ្លួន រួមមាន រឿងខ្លី និងកំណាព្យ សូម​ផ្ញើទៅកាន់ទំព័រហ្វេសប៊ុកមហោស្រពអក្សរសិល្ប៍ខ្មែរ ឬ អ៊ីមែល ៖ khmerliteraturefestival@gmail.com៕