ភ្នំពេញ – ក្នុងឱកាសសំណេះសំណាលជាមួយសិស្សានុសិស្សជាប់សញ្ញាបត្រមធ្យមសិក្សាទុតិយភូមិ កាលពីពេលថ្មីៗនេះ ឯកឧត្តម សោម ពិសិដ្ឋ អភិបាលខេត្តកែប បានផ្តល់អនុសាសន៍ដល់សិស្សានុសិស្សដែលទើបប្រឡងជាប់ទាំងអស់ សូមប្រឹងប្រែងរៀនសូត្រ ដើម្បីចាប់យកនូវមុខជំនាញវិជ្ជាជីវៈមួយពិតប្រាកដ ប្រកបដោយសមត្ថភាពពេលលេញ ដើម្បីបំពេញការងារទទួលប្រាក់កម្រៃ និងមានចំណេះជំនាញមកអភិវឌ្ឍន៍មូលដ្ឋានរបស់ខ្លួនវិញ។
ឯកឧត្តម សោម ពិសិដ្ឋ មានប្រសាសន៍ថា សញ្ញាបត្រមធ្យមសិក្សាទុតិយភូមិ គឺជាផ្លែផ្កាទទួលបានបន្ទាប់ពីក្មួយៗខិតខំប្រឹងប្រែងសិក្សារៀនសូត្រអស់រយៈពេល ១២ឆ្នាំ កន្លងមក ។ ជាមួយគ្នានេះ ជួសមុខក្មួយៗទាំងអស់ ឯកឧត្តមក៏សូមថ្លែងអំណរគុណចំពោះឪពុកម្តាយ និងអាណាព្យបាលទាំងអស់ ដែលបានខិតខំដោយមិនខ្លាចនឿយហត់ក្នុងការចិញ្ចឹមបីបាច់ និងផ្គត់ផ្គង់ដល់ការសិក្សារៀនសូត្រដល់កូនៗរហូតទទួលបានលទ្ធផលល្អគួជាទីពេញចិត្តនៅជំហ៊ានដំបូងនេះ។

ឆ្លៀតក្នុងឱកាសនោះដែរ ដើម្បីផ្តល់ភាពងាយស្រួលដល់បេក្ខជន ដែលបានប្រឡងជាប់សញ្ញាបត្រមធ្យមសិក្សាទុតិយភូមិថ្មីៗ ឯកឧត្តមអភិបាលខេត្តកែប ក៏បានចែកវិញ្ញាបនបត្របណ្ដោះអាសន្នមធ្យមសិក្សាទុតិយភូមិ ដែលមានការបញ្ជាក់ពីអាជ្ញាធរ ភ្ជាប់ជាមួយច្បាប់ដើម ដើម្បីឱ្យសិស្សានុសិស្សដែលបានប្រឡងជាប់ យកទៅប្រើប្រាស់តាមការចាំបាច់ ជាពិសេសបន្តថ្នាក់ទៅថ្នាក់ឧត្តមសិក្សា។
ឯកឧត្តម សោម ពិសិដ្ឋ មានប្រសាសន៍បញ្ជាក់ថា ដើម្បីអបអរសាទរ និងលើកទឹកចិត្តដល់សិស្សានុសិស្សទូទាំងខេត្តកែប ដែលបានប្រឡងជាប់សញ្ញាបត្រមធ្យមសិក្សាទុតិយភូមិ ក្នុងសម័យប្រឡងថ្ងៃទី០៥ ខែធ្នូ ឆ្នាំ២០២២ កន្លងទៅនេះ ឯកឧត្តមទទួលខុសត្រូវចំណាយលើសេវាបញ្ជាក់ថតចម្លងត្រឹមត្រូវតាមច្បាប់ដើម វិញ្ញាបនបត្របណ្ដោះអាសន្នមធ្យមសិក្សាទុតិយភូមិ ជូនសិស្សានុសិស្សដែលបានប្រឡងជាប់ទាំងអស់ សម្រាប់ប្រើប្រាស់តាមតម្រូវការចាំបាច់។

យោងតាមរបាយការណ៍របស់លោក ងួន ច័ន្ទសុជាតា ប្រធានមន្ទីរអប់រំ យុវជន និងកីឡា ខេត្តកែប បានឱ្យដឹងថា នៅក្នុងការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២២ មានបេក្ខជនចំនួន៣១២នាក់បានដាក់ពាក្យប្រឡង ក្នុងនោះមានបេក្ខជនជាប់ ២៨៣នាក់ ហើយនិន្ទេស A មានចំនួន១នាក់៕